Eden huerta hinaspa qam

BIBLIAMANTA yachaq tukuqkunam ninku Eden huertamanta willakuyqa Genesis qillqallapi rikurisqanmanta. Paul Morris sutiyuq profesormi kaynata nin: “Bibliapa wakin libronkunapiqa manam willakunchu Eden huertamantaqa”, nispa. Pay hinamá wakin runakunapas ninku. Nisqankuqa, ¿chaynachu kanman? Chaymanta yachaykusun.

Bibliapiqa achka kutikamam Adanmanta, Evamanta, culebramanta hinaspa Eden huertamantaqa riman.a Wakin religionpi punta apaqkunaqa llakikuypaqmi ninku Eden huertamanta willakuyqa cuentolla kasqanta. Chaynata nispankuqa biblia llullata willakusqantam nichkanku.

Eden huertapi ima karusqanmanta mana yachaspaqa manam Diospa palabrantaqa entiendesunchu. Eden huertapi ima karusqanmanta sumaqta yachaspanchikqa entiendesunmi imanasqa machu-payayaspa wañusqanchikmanta, ñakarisqanchikmanta hinaspa hukkunamantapas. Chaymanta astawan yachaykusun.

● ¿Imanasqataq machu-payayanchik hinaspa wañunchik? Adanwan Eva Diosta kasukuspankuqa wiñaypaqmi kawsakunmanku karqa, ichaqa Diosta mana kasukusqankuraykum wañuqña rikurirurqaku (Genesis 2:16, 17; 3:19). Paykunapa miraynin kasqanchikraykum ñuqanchikpas huchayuq hinaspa wañuqlla kanchik. Chaymi bibliapi nin: “Chullalla runapa huchanwanmi lliw runakuna huchayuq rikurirurqa, huchawantaqmi wañuypas rikurirurqa. Chaynapim wañuyqa lliw runakunaman mirarurqa lliw huchallikurusqankurayku”, nispa (Romanos 5:12).

● ¿Imanasqataq ñakarinchik? Eden huertapim Jehova Diosqa llulla kasqanta hinaspa allinkunata runakunamanta pakasqanta satanasqa nirqa (Genesis 3:3-5). Chaynata nispanqa mana allin kamachiq kasqantam nichkarqa. Adanwan Evapas satanaspa nisqanta uyarispankum Jehova Diosta qipancharurqaku. Chaywanmi nichkarqaku runakunaqa kikinchik tantiakuspa allin kawsakuyta atisqanchikta. Chayqa llulla kasqanta yachananchikpaqmi Jehova Diosqa saqiykuwarqanchik huk tiempo kikinchikpura kamachinakunanchikpaq. Kay allpa pachapiqa llumpay mana allinkunallañam kunanqa kachkan, chay mana allinkunaqa wakinpiqa satanasraykum. Chaywanmi yachanchik runakunaqa kikinchikpura mana kamachinakuy atisqanchikta (Jeremias 10:23).

● ¿Imapaqtaq kay pachata Dios unancharqa? Diosqa munarqam kay allpa pacha suma-sumaq kananta, chaytam yachanchik Eden huerta imayna kasqanwan. Chaymi Adantawan Evatapas Diosqa nirqa wawa-churiyuq kaspanku kay pachaman huntanankupaq hinaspa enteron allpata suma-sumaqta huertayachinankupaq (Genesis 1:28). Jehova Diosqa hinallam munachkan kay allpa pacha suma-sumaq kananta hinaspa chaypi llapallan runakuna wiñaypaq kusisqa kawsakunanchikta. Bibliapim willawanchik hamuq tiempopi imaynata chayta ruwananmanta.

● ¿Imapaqtaq kay allpa pachaman hamurqa? Adanwan Eva Diosta qipancharusqankuraykum wañuqña rikurirurqaku. Chaymantapacham mirayninkunapas wañuqlla kanchik. Ichaqa Jehova Diosmi kuyakuyninpi sapallan churinta qumuwarqanchik wañuymanta librawananchikpaq (Mateo 20:28). Jesusqa manam Adan hinachu karqa payqa tukuypim Jehova Diosta kasukurqa chaymi runakunata huchamantawan wañuymanta librawarqanchik. Pay wañukusqanraykum Diosta kasukuqkunaqa huchanchikmanta pampachasqa kanchik hinaspa hamuq tiempopipas kay allpa pacha kaqmanta sumaq huerta kaptin chaypi kawsakusun. Chaymi Jesustaqa bibliapipas nin: ‘Qipa kaq Adan’, nispa (1 Corintios 15:22, 45; Juan 3:16). Arí, Jesuspa wañukusqanwanmi mana iskayrayanchikchu hamuq tiempopiqa kusisqaña kawsakunanchikmanta.b

Jehova Diospa ima munasqanmanta entiendeyqa manam sasachu. Eden huertapas, Adanpas, Evapas hinaspa chaypi animalkunapas karqakum. Hamuq tiempopi kaqmanta sumaq-sumaq allpa pachapi kawsakunapaq Diospa niwasqanchikpas ciertom. Jehova Diosqa munachkanmi llapallanchik chaypi kawsakunanchikta. Mana allin ruwaqkunapas wanakuspankuqa atinqakum chaypi kawsakuyta (1 Timoteo 2:3, 4). ¿Imanasqataq chayta ninchik?

Jesus wañuchinanku qirupi kachkaptinmi waqtanpi mana allin ruwaq runa rimapayarqa. Kay runaqa yacharqam mana allin ruwasqanrayku wañuchisqa kasqanta chaywanpas paymi Jesusta nirqa: “Jesus yuyarillawankimá kamachikuynikiman yaykuspayki”, nispa. Hinaptinmi Jesus nirqa: “Chiqaptapunim kunan niki: Sumaq huertapim ñuqawan kanki”, nispa (Lucas 23:43). Mana allin ruwaq runapas kay allpa pacha suma-sumaqña kaptin kawsakunanta Jesus munachkaspanqa, ¿manachu munanman ñuqanchikpas chaypi kawsakunanchikta? Arí, Jesuswan Taytanqa munachkanmi chaypi kawsakunaykita, ichaqa kikikim kallpanchakunayki Jehova Diosmanta astawan yachanaykipaq.

[Willakuy]

[Dibujo hinaspa recuadro]

DIOSQA WILLAKURQAÑAM IMAKUNA KANANMANTA CHAYMANTA SUMAQTA YACHAYKUSUN

‘¡Warmitawan qamtam chiqninachisqayki, chiqninachisaqtaqmi miraynikitawan miraynintapas! Mirayninmi umaykita chamchasunki, qamñataqmi talonninpi kachunki’ (Genesis 3:15).

Chaynatam Jehova Dios culebrata nirqa Eden huertapi. Jehova Diospa nisqanmanta sumaqta entiendeykunapaq qatiqninpi yachaykusunchik pi culebra kasqanmanta, pi warmi kasqanmanta hinaspa pikuna mirayninkuna kasqanmanta.

¿PITAQ CULEBRAQA?

Satanasmi (Apocalipsis 12:9).

¿PITAQ WARMIQA?

Warmiqa tupan Diosta kasukuq angelkunawanmi (Galatas 4:26, 27). Diosmanta willakuq Isaiasmi nirqa chay warmi wachakunanmanta, wawankunam hanaq pachapaq akllasqakuna (Isaias 54:1; 66:8).

¿PIKUNATAQ KANKU CULEBRAPA MIRAYNINKUNAQA?

Diosta mana kasukuspanku satanaspa munasqanta ruwaqkunam (Juan 8:44).

¿PIKUNATAQ KANKU WARMIPA MIRAYNINKUNAQA?

Huknin mirayninqa Jesusmi. Payqa manaraq kay pachaman hamuchkaspam hanaq pachapi angel karqa. Wakin mirayninñataqmi hanaq pachapaq akllasqa runakuna, paykunam Jesuswan kuska hanaq pachamanta kay allpa pachata kamachimunqaku (Galatas 3:16, 29; 6:16; Genesis 22:18).

‘TALONNINPIM KACHUNKI’

Jesus kay allpa pachapi kachkaptinmi satanas runakunawan Jesusta wañurachirqa. Chayqa karqa talonninpi kachurunmanpas hinallam, Jesusqa kimsa punchawllamantam kawsarirurqa.

‘UMAYKITAM CHAMCHASUNKI’

Hamuq tiempopim Jesusqa umanta chamcharunmanpas hina satanasta chinkarachinqa. Puntatam ichaqa satanaspa mana allin ruwasqankunata allichanqa (1 Juan 3:8; Apocalipsis 20:10).

Biblia ¿imatam yachachin?, qillqapim yachanki imamanta biblia willakusqanta. Kay qillqaqa Jehova Diospa testigonkunapa ruwasqanmi.

[Dibujo]

Adanwan Evaqa Diosta mana kasukusqankuraykum machu-payayaspanku wañukurqaku