Eliseom rupachkaq carretakunata qawarqa ¿Qawankichu qampas?

Siria nacionpa reyninmi Eliseota qatikachachkarqa. Dotan llaqtapi kasqanta yacharuspanmi reyqa tutallan kacharqa “silladakunata, carretakunata hinaspa achkallaña soldadokunata”. Achikyaruptinñataqmi, Dotan llaqtaqa reypa soldadonkunawan muyurisqaña tarikurqa (2 Rey. 6:13, 14).

Eliseopa serviqnin tutapayta hatariruspanmi chay muyuriqninpi enemigonkunata qawaspan mancharikuywan nirqa: “Ay taytáy ¿imatataq ruraykullasunchik”, nispa. Chaymi Eliseoñataq nirqa: “Ama manchakuychu, paykunawan kaqkunamantapas aswan achkam kachkan ñoqanchikwan kaqkunaqa”, nispan. Hinaspanmi Diosta mañakuspan nirqa: “Dios Taytalláy, kay mozopa ñawintayá kichaykuy chaynapi rikunanpaq”, nispa. Hinaptinmi, ‘chay mozopa ñawinta Tayta Dios kichaykuptin rikururqa orqopa hawanpi silladakunawan rupachkaq carretakuna Eliseopa muyuriqninpi kachkaqta’ (2 Rey. 6:15-17). ¿Imatam yachachiwanchik Eliseopa vidanpi kay pasakusqanqa?

Eliseoqa manamá mancharikurqachu Siria tropakunata qawaspanqa, payqa Jehova Diospim hapipakurqa hinaspapas manam iskayrayarqachu waqaychananmantaqa. Kunan tiempopiqa manamá suyanchikchu hatun milagrokunata Dios ruwanantaqa, ichaqa qawanchikmi llaqtanta imayna waqaychasqanta. Huk rimaypiqa ñoqanchikpa muyuriqninchikpipas ‘silladakunawan rupachkaq carretakunam’ kachkan. Sichum chaykunata qawachkanchikmanpas hina Diospi hapipakuspanchikqa, manam imamantapas iskayrayasunchu hinaspam bendicionninta tarisun (Sal. 4:8). ¿Imakunatawanraqmi Eliseopa vidanmanta yachachwan?

ELISEOM HUK KAMACHIKUYTA CHASKIN

Huk kutipim, Eliseo chakrapi yapuchkarqa. Hinaptinmi Diosmanta willakuq Elias waqtanta richkaspan EIiseota capanwan capaykachirqa. Eliseoñataqmi chay ima ninan kasqanta yachaspan huk fiestata ruwarqa, chaymantañataqmi tayta-mamanmanta despedikuykuspan Eliasta serviq pasakurqa (1 Rey. 19:16, 19-21). Tukuy sonqonwan Diosta serviy munasqanraykum, Jehova Diosqa allintapuni Eliseota servichikurqa, chaymi tiempopa risqanman hina Eliaspa rantinpi willakuq rikurirurqa.

Eliseoqa yaqa soqta watakunam Eliaspa serviqnin karqa. Tukuy chay tiempopiqa “Eliaspa makinman yaku talliqmi karqa” (2 Rey. 3:11). ¿Ima ninantaq chayna ruwasqanqa? Chay tiempokunapi runakunaqa ima mikuytapas makillankuwanmi mikuqku. Chaymi mikuyta tukuruptinku sirvientekunaqa patronninpa makinman yakuta talliqku aywikunankupaq. Qawasqanchikman hinaqa, Eliseopa ruwayninkunaqa sirvientekunapa ruwayninmi karqa, chayna kaptinpas hatun kusikuywanmi Eliasta serviq.

Kunan tiempopipas achka cristianokunam tukuy tiemponkuwan Jehova Diosta servinku, chaynatam ruwanku Jehova Diosta tukuy sonqonkuwan serviyta munaspanku. Wakinkum ayllunkunata hinaspa amistadninkunata saqespanku karu llaqtakunaman astakunku Betelpi otaq huñunakuna wasikunata ruwaspa Diosta servinankupaq. Wakin runakuna chay llamkayta mana chaninniyoqpaq hapiptinkupas, chay llamkayqa ancha allinmi hinaspapas manam penqaypichu churan. Jehova Diospaqqa aswan chaninniyoqraqmi. ¿Manachu ñoqanchikpas chaynata qawananchik? (Heb. 6:10.)

ELISEOQA MANAM SAQERQACHU DIOSPA KAMACHISQANTAQA

Manaraq ‘remolino wayrawan Eliasta hanaq pachaman hoqarichkaspanmi’ Jehova Diosqa kamachirqa Gilgal llaqtamanta Betelkama rinanpaq. Eliasqa manamá suyarqachu Eliseo riysinantaqa, chaywanpas Eliseoqa nirqam: “Manam qepaymanchu”, nispa. Kuska richkaptinkum iskay kutikamaraq Eliasqa nirqa ama riysinanpaq. (2 Rey. 2:1-6). Chayna kaptinpas Eliseoqa manam saqerqachu. Chayna ruwasqanqa Rutpa ruwasqanwanmi tupan, Rutpas manamá Noemiytaqa saqerurqachu (Rut 1:8, 16, 17). Arí, Eliseoqa anchatamá chanincharqa Eliasta servinanpaq Diospa kamachisqantaqa.

¿Imaynatam Eliseota qatipakuchwan? Ñoqanchikpas pay hinam anchata chaninchananchik Jehova Diospa llaqtanpi qowasqanchik ima ruwaykunatapas. ¡Ancha kusikunapaqmi chaykunata ruwaspa Jehova Diosta serviyqa! (Sal. 65:4; 84:10.)

MAÑAKUWAY “QAMPAQ IMAPAS RURANAYTA”

Eliasmi Eliseowan purichkaptinku nirqa: “Qampaq imapas ruranayta munaspaykiqa mañakuway manaraq qanmanta rakikuchkaptiy”, nispa. Rey Salomon hinam Eliseopas qori-qollqetaqa mana mañakurqachu, aswanmi Eliseoqa kaynata mañakurqa: “Espirituykimanta herenciata hina huk chaynatawan qoykuway rantikipi qepanaypaq”, nispa (1 Rey. 3:5, 9; 2 Rey. 2:9). ¿Imatataq chaywanqa mañakuchkarqa? Israelpi taytakuna churinkuman herenciata qospankuqa, wakin churinkunamantapas piwi churinkumanmi huk chaynatawanraq herenciata qonanku karqa (Deut. 21:15-17). Chaymi Eliseoqa Eliaspa rantinpi Diosmanta willakuq kananpaq mañakuchkarqa. Payqa munarqamá Diosmanta ‘llumpayllataña sientiq’ Elias hina espirituyoq kayta otaq qarinchakuq kayta (1 Rey. 19:13, 14).

Eliasñataqmi nirqa: “Sasa rurana kaqtam mañakurunki. Qanmanta rakikusqayta rikuspaykiqa mañakusqaykitam chaskinki, mana rikuspaykim ichaqa mana chaskinkichu”, nispa (2 Rey. 2:10). Yaqachusmi chayna nisqanwanqa qawachichkarqa Jehova Dioslla chay mañakusqanta qoy atisqanta, hinaspapas chaskiyta munaspanqa Eliaswanmi wañukunankama kanan karqa.

ELISEOPA RIKUSQAN

¿Qorqachu Diosqa Eliseopa mañakusqanta? Bibliapa willakusqanman hinaqa, “rimastin paykuna richkaptinkum rupachkaq caballokunapa aysasqan rupachkaq carreta rikuriykuspa paykunata rakirurqa, remolino wayrapa hoqarisqanmi Elias hanaq pachaman hoqarikururqa. Eliseom Eliasta qawarispan” kachkarqa.a Chaynatam Jehova Diosqa Eliseopa mañakusqanta qorqa. Eliseoqa qawarqam Eliaspa ripukusqanta hinaptinmi espiritunmanta herenciata hina huk chaynatawan chaskirqa hinaspanmi rantinpi Diosmanta willakuq rikurirurqa (2 Rey. 2:11-14).

Eliseoqa Eliaspa capanta hoqarispanmi hinakuykurqa. Chaynata runakuna qawaspankum musyakunanku karqa payña Diosmanta willakuq kasqanta. Chayna kasqanmi sutilla qawakurqa Jordan mayuta iskayman rakiruptin.

Maynatachá Eliseoqa admirakurqa remolino wayrawan Elias hanaq pachaman hoqarisqa kaptin. Eliseoqa manamá sapa punchawchu ‘rupachkaq caballokunapa aysasqan rupachkaq carretataqa’ qawaq. Chayqa sutillam qawachirqa mañakuyninta Jehova Dios uyariykusqanta. Kunan tiempopiqa manamá chaykunaqa qawakunchu, ichaqa musyakuchwanmi munayninta ruwananpaq hinaspa yanapawananchikpaq Jehova Dios atiyninta servichikusqanta. Kay Pachapi llaqtanta imayna bendecisqanta qawaspanchikmi, musyakunchik hanaq pachapi Diospa carretanpas otaq llaqtanpas hinalla risqanta (Ezeq. 10:9-13).

Eliseoqa achka milagrokunatam qawarqa Jehova Diospa ancha atiyninmanta mana iskayrayananpaq. Arí, Eliaspa ruwasqan milagrokunamantaqa, Eliseoqa Diospa chuya espiritunwanmi 16 milagrokunata ruwarqa.b Silladakunawan rupachkaq carretakunata Eliseopa qawasqanqa manam chay kutillapichu karqa, qawarqataqmi kay yachachikuypa qallariyninpi qawamusqanchikman hina Dotan llaqtapi kachkaspanpas.

ELISEOQA JEHOVA DIOSPIM HAPIPAKURQA

Eliseoqa manamá mancharikurqachu Dotan llaqtapi enemigonkuna muyuriqninpi rikuriruptinqa. ¿Imataq yanaparqa? Jehova Diospi mana iskayrayaspan iñisqanmi. Chayna iñiyniyoqmi ñoqanchikpas kananchik. Chaynaqa Jehova Diospa chuya espirituntayá mañakusun chaynapi iñiyniyoq hinaspa chuya espiritupa wakin rurunkunatapas vidanchikpi qawachinapaq (Luc. 11:13; Gal. 5:22, 23).

Dotan llaqtapi Eliseopa rikusqanqa allintam yanaparqa Jehova Diospi hinaspa angelninkunapi hapipakunanpaq. Payqa rikurqamá Dotan llaqtapa chaynataq Siria tropakunapa muyuriqninpi Diospa angelninkuna kasqanta. Eliseowan serviqninqa manam wañurqakuchu enemigonkunata Jehova Dios ñawsayarachiptinqa (2 Rey. 6:17-23). Chayna sasachakuypi tarikuspapas Eliseoqa mana iskayrayaspanmi ñawpaqpi hina Jehova Diospi hapipakurqa.

Eliseo hinayá Jehova Diospi hapipakusun (Prov. 3:5, 6). Chaynapim Diosqa ‘ñoqanchikta llakipayaykuwasun’ hinaspa bendeciykuwasun (Sal. 67:1). Silladakunawan rupachkaq carretakunataqa manamá kunanqa qawanchikchu, chaywanpas Jehova Diosqa waqaychanmi llaqtantaqa, waqaychanqataqmi “llumpa-llumpay ñakariy” punchawkuna chayamuptinpas (Mat. 24:21; Apoc. 7:9, 14). Chay punchaw chayamunankamaqa, ama qonqasunchu Jehova Dios amparawaqninchik kasqanta (Sal. 62:8).