Diosqa llakikunmi ¿imatam ruwachwan kusisqa sientekunanpaq?

¿Haykapipas waqarqankichu imaykipas nanasuptiki? . . .a Yaqa llapanchiktam chayqa pasawarqanchik. Wakinpiqa waqanchik manam imanchikpas nanaptinchu. Aswanqa imatapas rimaspanku hukkuna sientechiwaptinchikmi ¿aw, icha manachu? . . . Diostapas sientechinkum paymanta llullakunata rimaspanku. Imata rimaspanku sientechisqankumanta chaynataq imayna kusirichinamantayá rimasun.

Diosta kuyani nispankupas wakin runakunaqa Bibliapa nisqanman hinam payta llumpayta ‘llakichirqaku’ otaq sonqonta nanachirqaku. ¡Mayna llakisqaraq Diosqa sientekurqa, aw! Ichaqa, ¿imanasqataq llakisqa sientekurqa?

Jehova Diosmi unancharqa punta kaq iskay runakunata hinaspam ‘Eden huertapi’ kawsanankupaq permitirqa, ichaqa Diostam paykunaqa llumpayta llakichirqaku. ¿Imataq paykunapa sutin karqa? . . . Adan hinaspa Eva. Yachasunyá ima ruwasqankumanta.

Jehova Diosqa Adanmanwan Evamanmi nirqa Eden huertapi kaspanku cuidanankupaq. Nirqataqmi wawa-churiyoq kanankupaq chaynataq chaypi wiñaypaq kawsanankupaqpas. Ichaqa manaraq wawa-churiyoq kachkaptinkum huk mana allin pasarurqa. ¿Yachankichu ima pasasqanmanta? . . . Huk angelmi Evata convencechirqa Diosta mana kasukunanpaq, Adanpas manam kasukurqachu. Yachasunyá imata ruwaspa mana kasukusqankumanta.

Chay angelmi culebrantakama Evata rimapayarqa. Evaqa yacharqam culebraqa mana rimaq kasqanta, ichaqa ‘Dios hinañam’ kanki nisqatam allinpaq hapirqa. Chaymantam chay culebraqa nirqa imata ruwananpaq kasqanmanta. ¿Imatam ruwarqa? . . .

Jehova Diosmi Adanman kamachirqa huk sachapa rurunta ama mikunanpaq, chaytam Evaqa mikururqa. Evata manaraq unanchachkaspanmi Diosqa Adanman nirqa: ‘Huertapi llapallan sachapa ruruntaqa mikunkim. Allin kaqta hinaspa mana allin kaqta yachanapaq sachapa ruruntam ichaqa ama mikunkichu, chayta mikuruspaykiqa wañunkipunim’, nispa.

Chayna kamachisqantaqa allintam Evaqa yacharqa, ichaqa chay sachatam qawarayarqa ‘mikunapaq allin sacha kasqanta, qawarqataqmi sumaqllaña kasqantapas [. . .] chaymi rurunta pallaruspa mikururqa. Qosanmanpas qoykuptinmi paypas mikururqa’. ¿Imanasqataq mikururqa? . . . Jehova Diosmantaqa Evatam payqa astawan kuyarqa, chaymi warminpa nisqanta ruwarqa. Ichaqa pimantapas puntataqa Jehova Diosta kasukuymi aswan allinqa, ¿icha manachu?

¿Yuyachkankichu Evata rimapayaq culebramanta? Rimasqanpaqmi rikchakurqa, ¿aw? Imaynam pipas pakakuspan muñecata rimachichkaq hina vozninta uyarichikun, chaynatam culebrata servichikuspan vozninta uyarichikurqa, ¿pipa voznintataq Evaqa uyarirqa? . . . Satanas Diablowan sutichasqa ‘ñawpaqmantaraq culebrapa’ voznintam.

¿Imaynatam Jehova Diosta kusichiwaq? . . . Kamachisqankunata sapa kutilla kasukuspam. Satanasmi nin lliw runakunaqa payllataña kasukuspa Diostaqa manaña kasukunankupaq kasqanmanta. Chaymi Jehova Dios kaynata consejawanchik: “Churilláy yachayniyoq kaspayá kusiriykachiy sonqoyta. Chayna kaptikiqa contestasaqmi insultaqniy runata”, nispa. Satanasqa Jehova Diosmantam burlakun. Payqa ninmi lliw runakunata Diosmanta karunchachiy atisqanta. Chaymi Jehova Diosta kasukuspa servinaykipaq kallpanchakunayki. ¿Kallpanchakunkichu chayta ruwanaykipaq? . . .