¿Haykapimantataq Dios kamachiyta qallaykurqa? (PUNTA KAQ)

HINALLAYÁ MASKAYCHIK

Julio: Ernesto anchatam kusikuni bibliamanta rimasqanchikwan.a ¿Yuyachkankichu Dios haykapi kamachisqanmanta tapuwasqaykita? Tapuwarqankim 1914 watamanta. Chaymantam willaykuyta munayki.

Ernesto: Huk kaqnin qillqaykichikpim leerqani 1914 watapi Diospa rantinpi kamachiqta churasqanmanta, chaymi tapukurqayki. Qamkunaqa ninkichikmi bibliapa nisqanta yachachisqaykichikta.

Julio: Awriki chaynam.

Ernesto: Llapanta bibliata ñawinchaspaypas chay watataqa manam tarirqanichu. Internetpi kaq bibliakunapipas maskarqanim ichaqa manam tarirqanichu.

Julio: Kusikunim cabalta bibliata leesqaykimanta, chayqa ancha allinmi.

Ernesto: Arí, bibliaqa aswan allinmi ima libromantapas.

Julio: Ancha allinmi nisqaykiqa. Anchatam kusikuni imapas yachay munasqaykimanta bibliapi maskasqaykiwanqa. Chay ruwasqaykiqa bibliapa nisqanwanpas tupanmi.b ¡Allinmi kallpanchakusqaykiqa!

Ernesto: Gracias, Julio. Astawanmi yachayta munani chaymi leesqanchik libropi 1914 watamanta tarirqani. Chaypim willakuchkan hatu-hatun sachata kuchuruptinku kaqmanta wiñasqanta. Chaychaynatam leerqani.

Julio: Ah ya, chayqa kachkan Daniel libropim. Chaypim rimachkan Nabucodonosorpa musqukusqanmanta.

Ernesto: Arí, ichaqa achkakama leespaypas manam entiendenichu 1914 watapi Jehova Dios kamachiyta qallaykusqanmantaqa.

Julio: Ama llakikuychu, kikin libro qillqaqpas manam entienderqachu.

Ernesto: ¿Ciertotachu paypas mana entienderqa?

Julio: Arí. Chaynatam nichkan Daniel 12:8, chaypim Daniel nirqa tukuy chaykunata uyarispan manam entiendesqanta.

Ernesto: Ñuqalla mana entiendesqaytam piensarqani. Mana entiendesqaywanmi hukmanyaq kani.

Julio: Ichaqa, ¿yachankichu imaynanpi Daniel chayna tarikusqanmanta? Manaraqmi tiemporaqchu karqa chaykuna entiendenanpaq. Kunanmi ichaqa Danielpa qillqasqantaqa entiendenchikña.

Ernesto: Chayqa allinmi.

Julio: Awriki, Daniel 12:9 nin: “Kay willasqaykunaqa tukupay punchawkamam pakasqa hinaspa sellasqa kanqa”, nispa. Leesqanchikman hinaqa kaykunaqa tukupay tiempopim entiendekunan karqa. Tukuy ima pasasqanwanmi yachanchik tukupay tiempopiña kasqanchikta. Tukupay tiempomantaqa hukpiñam astawan yachachkasunchik.c

Ernesto: Chaymantam astawan yachayta munayman, ¿yachaykachiwankimanchu?

Julio: Atisqallaytaqa yachachisqaykim.

NABUCODONOSORPA MUSQUYNINMANTA

Julio: Puntata kamachiq Nabucodonosorpa musquyninmanta rimaykusunchik, ¿allinchu?

Ernesto: Allinmi.

Julio: Nabucodonosorqa musqukurqa cielokama chayaq sachatam. Musquyninpim Diospa angelnin kamachirqa chay sachata kuchunankupaq. Sapinwan qipaq kullullanñam qiparurqaqa. “Qanchis wata” pasaytam kaqmanta chay sacha wiñarqa.d Chay tiempopiqa kay musquyninmi kikin Nabucodonosorpi cumplikurqa. Chay kamachiqpa atiyninqa karqa musquyninpi hatu-hatun sacha hinam. Chay sachata kuchuchkaq hinam paytapas kamachisqanmanta “qanchis wata” hurqururqaku. ¿Yuyachkankichu imaynanpi kamachiq kasqanta saqirusqanmanta?

Ernesto: Mmm... Manam yuyanichu.

Julio: Bibliapim niwanchik “qanchis wata” locoyarusqanmanta, chayraykum kamachiq kasqanta saqirqa. Chay “qanchis wata” tukuruptinmi kaqmanta kamachirqa.e

Ernesto: Allintam entiendechkani. Ichaqa, ¿imaynatataq 1914 wataqa tupan Nabucodonosorpa musqukusqanwanqa?

Julio: Arí, kay willakuyqa iskay kutikamam cumplikurqa. Puntatam hina kikin Nabucodonosorwan cumplikurqa. Chaymantañataqmi Diospa rantinpi kamachiqkunawan cumplikurqa.

Ernesto: ¿Imaynatataq Diospa kamachisqanwan tupasqanta yachanki?

Julio: Chaytaqa Daniel qillqapim willakuchkan. Daniel 4:17 nin: ‘Yachanqakum lliw gobiernonpi munaychakusqanta. Yachanqakutaqmi chay gobiernotaqa pimanpas munasqanman quykusqanta’, nispa. Leesqanchikman hinaqa, ¿ima ninmi?

Ernesto: Chaypim nichkan Diosqa “lliw gobiernonpi munaychakusqanta”.

Julio: ¿Chaynaqa pitaq runakunata kamachiwaqninchikqa?

Ernesto: Diosllam.

Julio: Awriki. Chaywanmi yachanchik, chay rimasqanchik willakuyqa mana Nabucodonosorllawan tupasqanta aswanqa ‘Diospa kamachisqanwanpas’ tupasqanta. Daniel qillqata astawan leespaqa allintam entiendesunchik.

Ernesto: Allinmi kanman.

DANIEL QILLQAPI IMA WILLAKUSQANMANTA

Julio: Daniel qillqapim kuti-kutirispa willakuchkan Diospa gobiernonmanta, chaypim Jesus kamachinqa. Chaypaq qawaykusunchik Daniel 2:44. Ama hina kaspa leeykuy.

Ernesto: Ninmi: ‘Chay hamuq reykuna gobiernachkaptinmi hanaq pacha Dios hatarichinqa mana tuñichiy atina gobiernota, chay gobiernoqa huk runamanqa manam qusqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq’, nispa.

Julio: Gracias Ernesto. ¿Kaypiqa Dios kamachinanmantachu willakuchkan?

Ernesto: Mmm... Manam yachanichu.

Julio: Leesqanchikman hinaqa puchuruq gobiernollañas “wiña-wiñaypaq” takyanqa. ¿Pitaq kamachinman wiña-wiñaypaqqa mana Dios kaspanqa?

Ernesto: Manam pipas.

Julio: Arí, allinmi nisqaykiqa. Dios kamachinanmanta astawan yachaykunapaqyá qawaykusun. Chaymi kachkan Daniel 7:13, 14 chaypim nichkan Diospa gobiernonpi pi kamachimunanmanta. Daniel 7:13, 14 nin: ‘Runapa churinman rikchakuqmanmi qurqa atiyniyuq kananpaq. Runapa churinman rikchakuqmanmi qurqa yupaychasqa kananpaq. Llapallan runakuna, nacionkunam payta servinqaku. Huk rikchaq rimayniyuqkunapas paytam servinqaku. Paypa munaychakuyninqa wiñaypaq mana tukuqmi kanqa. Paypa gobiernonqa mana haykapipas chinkaqmi kanqa’, nispa. Kaypiqa Diospa gobiernonmantam rimachkan.

Ernesto: Arí.

Julio: Kaypiqa nichkantaqmi may llaqtayuq runapas chaynataq ima rimayniyuqña runapas payta servinanmanta.

Ernesto: Arí, chaynatamá nin.

Julio: Chaymantapas leesqanchikpiqa nichkantaqmi wiñaypaq kamachinanmanta. Chaynatataqmi Daniel 2:44 niwanchik.

Ernesto: Awriki.

Julio: Allinmi. Yuyariykusunchik kaykama rimasqanchikmanta. Daniel capitulo 4 willawanchik Dioslla tukuy imata kamachisqanmanta. Chayraykum yachanchik chay willakuyqa mana Nabucodonosorllapi cumplikusqanta. Daniel libropiqa willawanchiktaqmi Diospa gobiernon haykapi kamachiyta qallaykunanmanta, chay gobiernopim Jesucristo kamachinqa.

Ernesto: Allinmi chay nisqaykiqa, ichaqa 1914 watamantaqa manam entiendenichu.

QANCHIS WATAKUNAMANTA

Julio: Rimaykusun kamachiq Nabucodonosorpa musqukusqan imayna cumplikusqanmanta. Puntataqa chay musqukusqanqa paypim cumplikurqa. Musquyninpi sachata kuchurusqankum tupan locoyaruspam manaña kamachisqanwan. Nabucodonosorqa qanchis watapunim locoyarurqa, chaymanta allinyaruspanñam kaqmanta kamachiyta qallaykurqa. Nabucodonosorpa musqukusqanqa cumplikurqataqmi Diospa gobiernonpipas. Kay pachapi Diospa rantinpi kamachiqkunapas manañam qanchis watakuna pasanankama kamachinankuchu karqa.

Ernesto: ¿Imaynataq chayqa? Manataq entiendenichu.

Julio: Ñawpaq tiempopi Israel nacionta kamachiqkunaqa Jehova Diospa rantinpim kamachiqku.f Chaymi kikin Jehova Diospas kamachichkanman hina karqaku. Ichaqa akllasqan kamachiqkunaqa llapallan runakunapiwan kuskam Jehova Diosta qipancharurqaku. Chayraykum paykunata 607 watapi Babilonia runakunapa makinman Dios churaykurqa. Chaymantapacham Diospa rantinpi kamachiqkunaqa Jerusalenpiqa manaña kamachirqakuchu. Chaymi Diospa gobiernonqa manaña kay pachapiqa karqañachu. ¿Yaqachu entiendechkanki kaykama?

Ernesto: Awriki, entiendechkanim.

Julio: Ichaqa chay qanchis watakuna tukuruptinmi Diosqa kaqllamanta rantinpi kamachiqta churaykunan karqa, ichaqa hanaq pachapiña. Chay qanchis watakunaqa qallaykurqa 607 kaq watapim, Jesuspa tiempomanta ñawpaqta. Danielpi leemusqanchik wakin kaq willakuykunapas chay qanchis watakuna tukuytam cumplikurqa. Ichaqa, ¿haykapitaq chay qanchis watakunaqa tukurqa? Haykapi tukusqanta yacharuspanchikqa yachasunmi haykapi Dios kamachiyta qallaykusqanta.

Ernesto: Ah ya, ¿1914 watatachu tukunman karqa?

Julio: Awriki, chaynam.

Ernesto: ¿Imaynatataq yachanki chay watata tukusqanta?

Julio: Jesusmi kay pachapi kachkaspan nirqa chay qanchis watakunaqa manaraq tukusqanta, chaynaqa Danielqa manam qanchis watakunallamantachu rimachkarqa.g Aswanqa achka watakunamantam. Chay qanchis watakunaqa Jesuspa tiemponmanta ñawpaqtaraqmi qallaykurqa, tukurqapas Jesus hanaq pachaman pasakusqan qipatañam. Chaymantapas kay Danielpa willakusqanqa kay ‘tukupay tiempopiñam’ entiendekunan karqa.h 1870 watamantam sunqumanta bibliata estudiaqkuna chaymanta astawan yachayta qallaykurqaku. Pisi-pisimantam entienderqaku chay qanchis watakunaqa 1914 watapi tukunanmanta. Chay watamanta tukuy imakuna pasakusqanwanmi yachanchik Diosqa hanaq pachapi paypa rantinpi kamachiqta churarusqanmanta. Chaynataq tukupay punchawkunapiña kawsasqanchikta, ichaqa Ernesto amayá llakikuychu mana lliwta entiendespaykiqa.

Ernesto: Chaynaqa sumaqtach qatipanay kanqa allinta entiendenaypaq.

Julio: Sasam entiendeyqa, ñuqapas chaynam sasata entienderqani. Ichaqa yaqachá yacharunki imapas yachachisqaykuqa bibliapa nisqanman hina kasqanta.

Ernesto: Awriki chaynam. Qamkunaqa imatapas bibliapa nisqanman hinam yachachisqankichik.

Julio: Qampas chayna yachachiytaqa atiwaqmi. Nisqayman hinapas manam kunanllaqa entiendewaqchu tukuy kaykunataqa. Kunanmi rimachkarqanchik chay qanchis watakunaqa Jesuspa tiemponmanta 607 watapi ñawpaqta qallaykusqanmanta. Chay watakuna tukuruptinqa kaqmantam Diospa gobiernon kamachiyta qallaykurqa, ichaqa ¿imaynanpitaq ninchik  1914 watapi tukusqanta?

Ernesto: Awriki, chayqa iskayrayachiwanmi.

Julio: Hina bibliapi nisqankunam chayta yachanapaqqa yanapawanchik. ¿Munawaqchu huk punchaw chaymanta astawan yachayta?i

Ernesto: Arí. Yachaytaqa munaymanmi.