BIBLIAMANTA TAPUKUYKUNA
¿Kanmanchu hamuq tiempopi enteron pachapaq huk kamachiqlla?
¿Imaynatam Diospa kamachikuynin lliw runakunata huk sunqullata kawsachinqa? Isaias 32:1,17; 54:13
Kay pachata huklla kamachiptinqa lliw runakunapaqchá allin kanman. Kunanqa pisi runakunallam apu kanku, achka runakunañataqmi ñakarinku wakcha kasqankurayku. Enteron pachata allin gobierno kamachispanqa, lliw runakunapa munasqantachá qunman. ¿Chayna kamachiyta atinmanchu runakuna? (Leey Jeremias 10:23).
Ñawpaq tiempomantaraqmi gobiernokunaqa runakunaman prometesqankunataqa mana cumpliyta atinchu nitaq wakchakunata yanapaytapas. Wakin gobiernokunañataq runakunataqa astawan ñakarichin (Eclesiastes 4:1; 8:9). Jehova Diosmi ichaqa prometewanchik llapallan kay pachapi gobiernokunata chinkachispan churin Jesusta kamachinanpaq churananmanta (leey Isaias 11:4; Daniel 2:44).
¿Imaynam tukuy imapas kanqa Dios kamachimuptin?
Diosmi Jesucristota akllarun kamachinanpaq, paymi pimantapas allin kamachiqqa kanqa (Lucas 1:31-33). Kay pachapi kaspanmi runakunata yanaparqa. Kamachispanñataqmi enteron pachapi runakunata huk sunqullata kawsachispan ñakariyninkunatapas chinkachinqa (leey Salmo 72:8, 12-14).
¿Lliw runakunachu munanqa Jesus kamachinanta? Manam. Jehova Diosmi ichaqa munan lliw runakuna salvakunankuta (2 Pedro 3:9). Chaymi payqa suyachkan runakuna imayna kasqankuta cambianankuta. Kay pachamanmi pisi tiempollamanta Jesusqa lliw mana allin runakunata chinkachispan hawkayayta apamunqa (leey Miqueas 4:3, 4).