Sasachakuykunawan mana hukmanyarunapaq

Kunanqa wakin sasachakuyqa manam makillanchikpichu kachkan allicharunapaq. Ayllunchik wañukuptinqa waqaspallanchikmi sunqunchikta tiyachinchik, mana hampiy atina unquywan ñakariqkunañataqmi imawanpas sunqunkuta tiyachinankupaq kallpanchakunku. ¿Chaynakunapiqa bibliaqa yanapawachwanchu?

MANA HAMPIY ATINA UNQUYWAN ÑAKARISQANMANTA

Rosam nin: “Mana hampiy atina unquywanmi unayña llumpayta ñakarillani. Manañam allintachu kawsakuni”, nispa. Bibliata hinaspa bibliamanta yachachiq qillqakuna ñawinchaytam sasachakuq, chayraykum hukmanyasqa tarikurqa. Ichaqa Mateo 19:26 nisqanpim Jesus nirqa: ‘Diospaqqa tukuy imapas atinallanmi’, nispa. Jesuspa chayna nisqanmi anchata kallpancharqa. Chaymi Rosaqa bibliamanta hinaspa bibliamanta yachachiq qillqakunamantaa hinalla yachananpaq grabasqataña uyarirqa, chaynataqa ruwaq unquyninwan mana ñawinchay atisqanraykum. Rosam nirqa: “Mana chaynata ruwaspayqa iñiyniypich chiriyaruyman karqa”, nispa.

Rosaqa manaña ñawpaqpi hina ruwasqanwanmi hukmanyasqa tarikun, ichaqa 2 Corintios 8:12 nisqanmi sunqunta tiyaykachin, chaypim nin: “Imapas tukuy sunquwan yanapakuy qusqanchiktaqa Diosqa chaskinmi, payqa munan pipas atisqanman hina qunantam, manam mana atisqanman hina qunantachu”, nispa. Bibliapa chayna nisqanmi Rosataqa yuyarichin ruway atisqanwan Diosqa kusikusqanta.

AYLLUN WAÑUKUPTIN

Dianam nirqa: “18 watallanpiraq sipas waway wañukuptinmi llumpa-llumpayta waqarqani”, nispa. Ichaqa Salmo 94:19 nisqanpi Diospaq kaynata Salmo qillqaqpa takisqanmi kallpancharqa, kaynatam takirqa: ‘Llakipa intusqan kallaptiymi sunqullayta tiyaykachispa kusiykachillawarqanki’ nispa. Dianam nirqa: “Jehova Diostam mañakurqani kusichiwaqniy llamkayta tarinaypaq, chaynapi llakiykunata qunqanaypaq”, nispa.

Dianam ancha kusichiqnin llamkayta tarirurqa, chaypim yanapakurqa mana ima qullqillapaq. Llakikuna qatiruptinqa warmakunapa servichikusqanku pakisqa pintura hinam tarikurqa, ichaqa cuentatam qukururqa imaynam pakisqa pinturapas servikunraq chayna paypas yanapakuy atisqantaraq. Paymi nirqa: “Cuentatam qukururqani bibliapa nisqankunawan runakunapa sunqunta tiyachispayqa ñuqapas kallpanchasqa tarikusqayta, chaynatam Jehova Diosqa sunquyta tiyaykachirqa”, nispa. Qillqarurqataqmi bibliapa rimasqan wakin runakuna llakipi tarikusqankumantapas. Paykunamanta ima yachasqanmantam nirqa: “Diosta serviqkunaqa tukuy tiempom Diosta mañakuqku”, nispa. Yacharurqataqmi bibliata mana ñawinchaspanqa sunqunta tiyaykachiq yachachikuyta mana tarinanmanta.

Dianaqa bibliapim yacharurqataq hamuq punchawpi wawan kawsarimunanmanta. Hechos 24:15 nin: ‘Allin ruwaq hinaspa mana allin ruwaq runakunam kawsarimunqa’, nispa. ¿Ima nirqataq chaymanta Dianaqa? Nirqam: “Manamá iskayrayanichu wawaywan tupaykunaymantaqa. Jehova Diosqa kawsarichinqapunim. Huertaykupi tupaykusqaytañam piensani, imaynam naceruptin chayllaraq qawaykusqayta hina”, nispa.

a Uyarinapaq grabasqa kaqkunatam astawan tarinki internetpi jw.org nisqanpi.

Bibliapa nisqanqa sunqunchiktam tiyaykachinman sasachakuypi tarikuptinchikpas

¿IMAYNATAM DIOSQA YANAPAWANCHIK?

Bibliam nin: ‘Tayta Diosqa, qayakuqninkunapaqqa hichpallanpim kachkan, sunqumanta qayakuqninkunapaqqa hichpallanpim kachkan. Kasukuqninkunapaqqa munasqantam ruwanqa, qayakuptinkupas uyariykuspam salvaykunqa’, nispa (Salmo 145:18, 19). Mayna sumaqmi chayna nisqankunaqa ¿aw? Ichaqa, ¿imaynatam yachachwan yanapaykuwananchikpaq mañakuptinchik Dios uyariykuwasqanchikta? Chaymantam qawasun.

KALLPANCHAWANCHIKMI

Sasachakuykunaqa cuerponchikpi, yuyayninchikpi chaynataq iñiyninchikpipas hukmanyarachiwanchikmanmi (Proverbios 24:10). Ichaqa Jehova Diosmi “pisipasqakunata kallpanchan, pisi kallpayuqkunamanmi kallpata yapan” (Isaias 40:29). Apostol Pabloqa achka sasachakuykunapi tarikuspanpas manam hukmanyarurqachu, paymi nirqa: “Dios kallpata quwaptinmi tukuy imata ruwanaypaq kallpayuq kani”, nispa (Filipenses 4:13). Diosmi apostol Pablotaqa yanaparqa chuya espiritunwan, chaynam ñuqanchiktapas yanapawasun mañakuptinchikqa (Lucas 11:13).

YACHAYTAM QUWANCHIK

¿Imatam ruwananchik bibliapi mayqin yachachikuytapas mana entiendespaqa? Jesuspa qatiqnin Santiagom nirqa: “Mayqinnikichikpapas yachaynikichik pisilla kaptinqa Diostayá tukuy tiempo mañakuychik hinaptinqa payqa quykusunkichikmi, payqa mana piñakuspa tukuy sunqunmanta achkanpi llapallanman quykuqmi”, nispa (Santiago 1:5). Mañakusqanchikta Dios uyariwananchikpaqqa, bibliatam ñawinchananchik hinaspapas nisqankunatam kasukunanchik (Santiago 1:23-25). Chayta ruwaspanchikqa cuentatam qukusun bibliapa nisqankunaqa yachayniyuq kanapaq yanapawasqanchikta.

SUNQUNCHIKTAM TIYAYKACHIN

Ima sasachakuypiña tarikuptinchikpas Jehova Diosqa sunqunchiktam tiyaykachin. Palabranpim niwanchik: “Amayá imamantapas afanakuychikchu, aswanqa Diosmanyá lliwta willakuychik tukuy tiempo mañakuspaykichik, ruegakuspaykichik hinaspa graciasta quspaykichik, hinaptinqa Diospa hawkayayninmi sunquykichiktawan yuyaynikichikta Cristo Jesusnintakama waqaychanqa, chay hawkayayqa runapa mana entiendey atinanmi”, nispa (Filipenses 4:6, 7). Chaynaqa, imaña sasachakuyninchik kaptinpas Diostam mañakunanchik sunqunchikta tiyaykachinanpaq.

Ichaqa, Diosta mañakuptinchikpas hinalla sasachakuyninchik kaptinqa amayá piensasunchu Diosninchik qunqaruwasqanchiktaqa. Hinalla sasachakuyninchik kaptinpas Jehova Diosqa kallpatam quwasun aguantananchikpaq (1 Corintios 10:13). Chaymantapas, bibliam niwanchik tukuy ima sasachakuyninchikkunaqa hamuq tiempopi qalaypaq chinkananmanta.