Jehová Diospa Testigonkunapa 2006 Distrito Asambleanku “Librakuyninchikqa hichpamuchkanñam”
1. ¿Imaynatam Diospa ñawpaq llaqtan qawachirqa Paypa cheqap yupaychayninta kuyasqankuta, hinaspa imaynatam kaqllata rurachwan?
1 Ñawpaq Judá nacionpi rey Ezequiasmi cartata apachirqa enteron Israel nacionmanwan Judá nacionman Jerusalén llaqtapi kamachisqankuna huñunakunankupaq (2 Cró. 30:6, 13). Chay qayachisqan runakunapa huñunakusqanmi qawachirqa Jehová Diospa yupaychayninmanta imayna sientesqankuta (2 Cró. 30:10-12). Chayna kaqllam kunan tiempopas Jehová Diospa serviqninkuna huñunakunqaku Paypa yupaychayninta mayna kuyasqankuta qawachinankupaq. Llapallanchikmi qayasqa kanchik “Librakuyninchikqa hichpamuchkanñam” sutichasqa Distrito Asambleaman rinanchikpaq. ¿Ima niwaqtaq qam?
2. ¿Imatam rurachwan distrito asambleapi yachasqanchikkunawan aswan allinta servichikunanchikpaq?
2 Arreglokunatayá rurachkayña: Asambleapi espiritual mikuyta ancha kuyakuywan rurakusqanraykum allintapuni servichikunanchik mana mayqan yachachikuyninkunatapas usuchispa. Mana imapas harkasunaykipaqyá kunanmantapacha arreglokunataña rurachkay kimsantin punchaw aylluykiwan kuska asambleapi kanaykipaq (Pro. 21:5). Yaqapaschá patronnikimanta permisota mañakunayki, arreglokuna rurasqaykimanta mana iñiq qosaykiwan otaq warmikiwanpas rimanakunayki; willakunaykitaqmi samapakunaykimanta, otaq yanapanaykitaqmi Bibliamanta estudiantekikuna kimsan punchaw asambleaman rinankupaq. Manam asamblea chayamunantaraqchu suyanayki kay allinkunata ruranaykipaqqa. Aswanmi Jehová Diosta mañakunayki hinaspam confianayki allinnikipaq ‘Paypa ruramunanmanta’ (Sal. 37:5).
3. ¿Imanasqataq kasukuchwan samapakunamanta kay yachachikuykunata?
3 Jehová Diospa llaqtanmi nisyuta llamkarqa asamblea rurakusqan llaqtapi llapallanchik samapakunachikpaq. Kay ruraykunapi sasachakuywan allinta llamkaq wawqenchikkunata agradecekuspanchikqa kasukusunchá kay qellqapa yuyarichiwasqanchikta. Chaymantapas asambleaman riq masinchikkunata hinaspa Jehová Diospa arreglon rurasqanta respetasqanchiktawan kasukusqanchiktam qawachisun (1 Cor. 13:5; 1 Tes. 5:12, 13; Heb. 13:17).
4-6. ¿Ima allin yachachikuykunatam yuyarinanchik samapakunapaq arreglokunamanta, imarayku?
4 Samapakunapaq wasi: Samapakunapaq llamkaq wawqenchikkunam kallpanchakunku wawqe-paninchikkunapa wasinkupi allin ejemployoq wawqe-paninchikkuna hinaspa allin portakuq wawa-churinkupas samapakunankupaq, congregacionpi ancianokuna aprobaptinkuqa. Samapakunapaq wasiqa kikillankumanta samapakunankupaq mana tariyta atiqkunallapaqmi. Samachiqwan samapakuqpa kuyakuywan yanapanakusqankuraykum kay arregloqa allinta apakurqa.
5 Asamblea rurakusqan llaqtapi yachaspaqa atinchikmanmi huklaw llaqtakunamanta hamuq wawqe-paninchikkunata wasinchikpi samachiyta. Pachakninpim samapakunapaq cuartokunata necesitakun achka asambleakuna rurakunanpaq. Samaykachinakuq kaspaqa, segurochá Jehová Diosmanta achka bendicionkunata chaskisunchik Hebreos 13:16, nisqanpi hina: “Allin ruraytawan kapuqnikitawan yanapanakuytaqa amayá qonqaychikchu, chay rurasqaykichikwanmi kañasqa ofrendawan hina Diosta agradankichik”. Congregacionpi secretario wawqenchikwanmi rimachwan hinaspam anotakuchwan asambleaman hamuq wawqe-paninchikkunata wasinchikpi samachinanchikpaq.
6 Samapakuna wasiqa asamblea punchawkuna samapakunallapaqmi; manaraq asamblea qallariyta otaq asamblea pasaytaqa manañam allinchu kanman hinalla samapakuyqa paseakunaraykupas otaq imapas kikinchikpaq rurananchikraykuqa. Kuyakuq cristiano kaspankuqa samaykachiqninkutam agradecekunqaku allin runa kasqanta mana sientechispanku. Wawa-churinkupas samaykachikuqpa wasintam respetananku mana yaykuna cuartokunaman mana yaykuspanku. Kay yachachikuykunata llapallanchik allinta kasukuspanchikqa iñiqmasinchikkunawanmi allintapuni kallpanchanakusunchik (Rom. 1:11, 12).
7, 8. ¿Imaynatam yanapachwan hatun yanapanapaq kaqkunata?
7 Hatun yanapanapaq kaqkuna: Proverbios 3:27 nin: “Ama recelaspayá qoykuy mañakusuqnikimanqa. Qoykuypuniyá qoykunaykipaq kachkaptinqa”. ¿Imaynatam allinta rurachwan hukkunata asambleapi? Yuyaq predicaqkuna, onqoqkunawan precursorkuna hinaspa hukkunapas yaqapaschá yanapananchikta munanmanku asambleaman rinankupaq otaq samapakunankupaq. Ayllunkunam puntataqa yanapananku (1 Tim. 5:4). Paykuna mana yanapaptinkuqa, yaqapaschá yanapanmanku iñiqmasin wawqe-paninkuna (Gál. 6:10). Estudio de libro yachachiq wawqenchikmi segurakunan huñunakusqanpi hatun yanapanapaq kaq wawqe-paninchikkunapa tukuy necesitasqanku tiempomantaraq listoña kananpaq.
8 Allin musyakuq kaspaqa, tarichwanpaschá congregacionpi imapipas yanapanapaq wawqe-paninchikkunataqa. ¿Imanasqataq paykunata rimapayachwan ñoqanchikwan kuska asambleaman rinankupaq? Precursor kaspankuqa yaqapaschá kallpanchakuq experienciankunata willawasun asambleaman illaptinchik. Mana ñoqanchikpa yachasqanchiktam yuyaq wawqe-paninchikkunaqa willawachwan imayna Jehová Diosta resisqankumanta hinaspa imayna servisqankumantapas. Wawqe-paninchikkunawan hukllawakuyqa allinchá kanqa ñoqanchikpaqwan ayllunchikpaqpas.
9. a) ¿Imanasqataq tupawasqanchik asambleaman richwan? b) ¿Imakunatam ruranayki sapaq asambleaman rinaykipaq tupasusqayki asambleaman mana riyta atispaykiqa?
9 Sapaq asambleaman rinamanta: Asambleapi huñunakunapaq sitio, Bibliamanta qellqakunapas, samapakuna wasipas hinaspa tukuy imapas haypakunanpaqmi, sapakama predicaqkunata ruegakamuniku congregacionninkupa tupaq asambleankuman rinankupaq. Mana atisqaykirayku sapaq asambleaman rinayki kaptinqa congregacionpi secretario wawqechikmanmi willakunayki samapakunaykipaq wasita mañapusunaykipaq. Asamblea rurakusqan llaqtallapi huk asambleakunapas kaptinqa willakunaykim chay asambleaman haykapi rinaykita. Samapakunaykimanta formulario mañakusqaykita qellqaruspaykiñam congregacionpi secretario wawqenchikman qonayki, hinaspam payña apachinqa asamblea rurakusqan llaqtaman.
10. ¿Imaynatam kusikuyninchikta yapachwan chayaykamuchkaqña distrito asambleapi?
10 Kikillankumanta llamkay munaqkuna: Asambleaman rispanchikqa llapanchikchá anchata kusikusunchik allin espiritual mikuy chaskisqanchikwan hinaspa wawqe-paninchikkunawan allinta kallpanchanakamusqanchikwan. Asambleanchik allinta apakunanpaq imawanpas yanapakuptinchikqa maynaniraqchá kusikuyninchik kanqa (Hech. 20:35). Asambleapa rurakusqanpi asamblea ruraq wawqenchikkunam maskayta qallaykunqakuña kikillankumanta llamkay munaq wawqenchikkunata ima ruraykunapipas yanapakunankupaq. ¿Yanapakuytachu qampas munawaq? (Sal. 110:3.)
11. ¿Imataq gustasunki sapa wata distrito asambleapi, hinaspa ima ruranaykipaqtaq chayqa yanapasunki?
11 Huk asamblea rurakusqanpim pichqa watayoq warmacha nirqa: “Jehová Diosta yupaychayniypim distrito asambleaqa anchata sonqoyta kusichiwan”. Kay cheqap rimasqanmi kusikuyninchikta qawachin sapa wata asambleaman riptinchik. Salmistapa takisqanpi hinam sientekunchik: “Waranqantin punchaw huklawpi kanaymantaqa chulla punchawllapas patioykim aswan allinqa” (Sal. 84:10). Chayna huk salmopitaqmi Davidqa sientesqanta takirqa: “Tayta Diospa templollanpiña wañukunaykama kawsakuytañam munallachkani. Tayta Diospa lliw sumaqllaña kaynin qawaykuytam ñoqaqariki munallachkani. Tayta Diospa templollanpiña yuyaymanaykuytam ñoqaqariki munallachkani.” (Sal. 27:4). Cheqaptam payqa kusikurqa Jehová Diospa yupaychaqninkunawan kuskanchakuspa. Jehová Diosta kuyasqanchiktam ñoqanchikpas qawachisun kimsan punchaw “Librakuyninchikqa hichpamuchkanñam” sutiyoq distrito asambleaman rispaqa.
[3 kaq paginapi recuadro]
Asambleapaq hora
Iskaynin punchawpaq
9.30 tutamanta - 5.05 tardekama
Kimsa kaq punchaw
9.30 tutamanta - 4.10 tardekama