Jehová Diospa testigonkunapa 2007 Distrito Asambleanku “¡Señorninchik Jesucristota Qatikusunchik!”
1, 2. a) ¿Imatam huñunakuymanta Moisés nirqa Israel runakunata? b) ¿Ima arreglokunatam rurananchik kunamantapacha?
1 Diospa siervon Moisesmi kamachirqa lliw Israel runakunata hinaspa forasterokunatapas sapa qanchis wata huñunakunankupaq. ¿Imarayku? Diospa Leyninpa “yachachikuykunata uyarinankupaq chaynapitaq yupaychasqanchik Tayta Diosta respetanankupaq” (Deu. 31:10-12). Qawasqanchikman hinaqa Jehová Diospaqmi allinpuni karqa hatun huñunakuykunapi llaqtanpa huñunakuyninqa. Hichpamuchkanñam Jehová Diospa llaqtan “¡Señorninchik Jesucristota Qatikusunchik!” sutichasqa Distrito Asambleankupi mosoqmanta huñunakunankupaq.
2 ¿Ñachu allichakuchkankiña? ¿Llamkaynikimantachu permisota mañakunayki kanqa? ¿Yanapawaqchu Bibliamanta estudiachisqaykikunata otaq mana iñiq aylluykikunatapas asambleaman rinaykichikpaq? ¿Congregacionpi sasachakuq wawqe-paninchikkunata yanapachwanchu asambleaman rinankupaq? ¿Sapaq asambleamanchu rinayki kanqa? ¿Asamblea apakunan llaqtapi samapakunaykipaq wasitachu mañakunayki kanqa? Qatiqnin yachachikuykunam arreglo rurakunaykipaq yanapasunki.
3. a) ¿Imaynatam Isaias 25:6 nisqan kunan tiempopi cumplikuchkan? b) ¿Imatam nichwan asamblea qallariq punchawmanta hinaspa imatam kikinchik rurananchik?
3 Kimsantin punchawman riy: Jehová Diosmi espiritualpi achka mikuyta qowanchik (Isa. 25:6). Kay achkallaña espiritual mikuytam watan-watan asambleakunapipas chaskinchik. Ichaqa qawarqanchiktaqmi asamblea qallariq punta kaq punchawpi pisilla huñunakusqanchikta. Chaymi kallpanchamuykichik Jehová Diospa llaqtan ñoqanchikpaq kimsa punchaw asamblea rurasqanman rinaykichikpaq. Llamkaynikimanta permisota mañakunayki kaptinqa, Jehová Diosta yanapasunaykipaq mañakuy. Chaymantañataq asambleayki haykapi kasqanta yacharuspallayki “mana manchakuspa” patronnikiwan rimariy (1 Tes. 2:2; Neh. 2:4, 5). Ichapas allin kanman patronnikiman reqsichiyniki watan-watan asambleaman riyqa Dios yupaychayniki kasqanta. Ñawpaqmantaraq permisota mañakuptikiqa ichapas llamkaynikipi ima arreglotapas ruranqa permisasunaykirayku.
4. ¿Imaynatam yanapachwan Bibliamanta yachachisqanchikkunata hinaspa ayllunchikkunatapas asambleaman rinankupaq?
4 Imaynatam yanapachwan Biblia estudiaqkunatawan ayllunchikkunatapas: Mayna kusikunapaqchá kanqa Biblia estudiachisqaykikunawan distrito asambleapi kuska kayninchikqa, chaynapim musyakunqaku ‘hatun huñunakuypipas’ wawqe-paninchikkuna kuyanakusqankuta (Sal. 22:25). Ñawpaqmantaraq niy tiemponkuta horqospanku asambleaman rinankupaq. Willariy imaraykum qampas kusikunki asambleakunamanta. Asambleanchikkuna imayna kasqanta yachanankupaqmi qawachiwaq asambleamanta videokunata, aswanraqchá allin kanman Unidos gracias a la enseñanza divina nisqan videota qawayninkuqa. Asambleaman rinaykimanta mana iñiq aylluykikunaman rimariy, ichapas drama qawanankupaq rinmanku otaq huk punchawllapas qanwan rinmanku.
5. ¿Imaynatam qawachichwan yanapakuq kasqanchikta 1 Timoteo. 6:18 nisqanman hina?
5 Wawqe-paninchikkunata yanapasun: Apóstol Pablom apu kaq cristianokunata nirqa: “Allinkuna ruraypiyá apuqa kachunku, mana imayoqkunamanyá kusikuywan qochunku”, nispa (1 Tim. 6:17, 18). Pay hina yanapakuq kasqanchiktam qawachisunchik yuyaqkunapa, onqoqkunapa, precursor kaqkunapa, taytallankuwan otaq mamallankuwan yachaq wawqe-paninchikkunapa imayna kasqankuta reparaspanchik hinaspa asambleaman rinankupaq sasachakuqkunapatapas. Yachanchikmi kay wawqe-paninchikkunata iñiq ayllunkuna puntata yanapanankutaqa, chaywanpas anciano kaqkuna hinaspa huk wawqe-paninchikkunapas iñiqmasinkunatam yanapanmanku yanapanankupaq kaptinqa (Gal. 6:10; 1 Tim. 5:4).
6. a) ¿Imanasqam tupawaqninchik asambleaman rinanchik? b) ¿Imakunatam ruranayki sapaq asambleaman rinayki kaptinqa?
6 Sapaq asambleaman rinamanta: Asambleapi achka tiyanakuna, Bibliamanta qellqakuna, samapakunapaq wasikuna hinaspa tukuy imapas haypananpaqmi, ruegakamuniku tupasuqnikichik asambleaman rinaykichikpaq. Mana atisqaykirayku sapaq asambleaman rinayki kaptinqa, congregacionpi secretario wawqenchikta mañakuy samapakuymanta formulariota huntanaykipaq. Asamblea rurakusqan llaqtapi huk asambleakunapas kaptinqa willakuy haykapi rinaykita. Chay fomulariota huntaruspayki, congregacionpi secretario wawqenchikman qoykuy, hinaspam payña apachinqa asamblea rurakusqan llaqtaman.
7-9. ¿Imakunatam yuyarinanchik samapakuymanta? ¿Imarayku?
7 Samapakunamanta: Samachiypi llamkaq wawqenchikkunam kallpanchakunku allin ejemployoq wawqe-paninchikkuna hinaspa allin portakuq wawa-churinkupas huk wawqe-paninchikkunapa wasinkupi samapakunankupaq, congregacionpi ancianokuna allinta qawaptinkuqa. Samapakunapaq wasikunaqa sasachakuqkunallapaqmi. Kay arreglom allinta apakun samachiq hinaspa samapakuq wawqe-paninchikkuna kuyakuywan yanapakuptinku.
8 Asamblea rurakusqan llaqtapi yachaspaqa, atinchikmanmi huklawmanta hamuq wawqe-paninchikkunata wasinchikpi samachiyta. Achka asambleakunapaqqa pachakninpim samapakunapaq cuartokunata necesitakun. Samaykachikuq kaspaqa, segurochá Jehová Diosmanta achka bendicionkunata chaskisun Hebreos 13:16 nisqanman hina: “Allin ruraytawan kapuqnikichikwan yanapanakuytaqa amayá qonqaychikchu, chay rurasqaykichikwanmi kañasqa ofrendawan hina Diosta agradankichik”. Congregacionpi secretario wawqenchikwan rimarisun hinaspa asambleaman hamuq wawqe-paninchikkuna wasinchikpi samapakunankupaq niykusun.
9 Samapakunapaq wasiqa asamblea punchawkunallapaqmi; manam allinchu kanman manaraq asamblea qallariyta otaq asamblea tukuyta paseakunarayku otaq imapas rurananchikrayku samapakuyqa. Chaymantapas, cristiano hina kuyakuyninchikmi kallpanchawananchik imaymana rurasqanchikwan samachiwaqninchik wawqe-paninchikkunata mana hukmanyachinapaq. Wawa-churikunapas samachiwaqninchikpa wasintam respetananku mana yaykuna cuartokunaman yaykuspanku. Kay yachachikuykunata llapallanchik allinta kasukuspanchikqa, iñiqmasinchikkunawanmi allintapuni kallpanchanakusunchik (Rom. 1:11, 12).
10, 11. a) Asamblea rurakusqanman manaraq chayachkaptinchik, ¿ima arreglokunatam rurakurqaña? b) ¿Imaynatam agradecekusqanchikta qawachichwan ñoqanchikrayku tukuy kaykuna rurakusqanmanta? (Leey Hebreos 13:17.)
10 Yanapakuq kay: Asambleapa rurakunan lawman chayaruspanchikqa sutillatam qawanchik tukuy imaymana rurakusqanmanta. Acomodador wawqenchikkunam kuyakuywan chaskiwanchik, asambleapa programanta qowanchik hinaspapas yanapawanchikmi maypi tiyananchikpaq. Chaymantapas karqataqmi asamblea rurakunan lawta limpiaq wawqe-paninchikkuna chaynataq ñawpaqmanta rimanapaq lawta sumaq allichaqkunapas. Chaymantapas discursokuna allin kananpaqmi yachachiq wawqenchikkuna allinta preparakurqaku hinaspapas imaymana ruraykunatam atienderqaku.
11 Sapa asamblea rurakunanpaqmi killan-killan achka wawqe-paninchikkuna arreglokunata ruraspanku llamkarqaku, chaynallataqmi ayllunkupas yanapakurqaku paykunaman tiempota qospanku. ¿Manachu agradecekuchwan ñoqanchikrayku tukuy kaykuna rurakusqanmanta? Agradecekusqanchiktam qawachichwan kay yachachikuykunata kasukuspanchik chaynataq manaraq asamblea qallarichkaptin niwasqanchikkunatapas (Heb. 13:17). Llapallanchik sonqomanta yanapakuptinchikmi ‘tukuy imapas rurasqa kanqa respetowan hinaspa ordenninpi’ (1 Cor. 14:40).
12. a) ¿Imanasqam Jehová Diospa llaqtanpa huñunakuyninkuna kunan tiempopi ancha allin? b) ¿Imatam qam rurawaq?
12 Jehová Diospa ‘chaylla kutimunan’ punchaw hichpaykamusqanraykum ancha allinpuni huñunakuyninchikqa (Heb. 10:25). Asambleakunapim allin yuyayniyoq confianzapaq sirviente qowanchik Jehová Diospa ‘yachachikuyninkunata kasukunanchikpaq’ (Deu. 31:12). Kallpanchamuykichikmi kunanmantapacha arreglota rurakunaykichikpaq “¡Señorninchik Jesucristota Qatikusunchik!” sutichasqa Distrito Asambleaman kimsantin punchaw rinaykichikpaq hinaspa lliw yachachikuykunata uyarinaykichikpaq chaynataq kallpanchanakunaykichikpaqpas.
[3 kaq paginapi recuadro]
Imay hora asamblea qallarinanmanta
Iskaynin punchawpaq
9.20 tutamanta - 5.05 tardekama
Kimsa kaq punchaw
9.20 tutamanta - 4.10 tardekama