‘Tukuy sonqonchikwanyá servisun’
1. ¿Imaynatam predicananchik?
1 Dios serviyninchiktaqa manam obligasqa hinachu rurananchik, aswanqa tukuy sonqonchikmantam. Chaymi Biblia kaynata niwanchik: “Tukuy sonqoykichikwanyá [Jehová Diosta] serviychik”, nispa (Rom. 12:11). Chayna kaptinpas sonqomanta otaq kusikuywan predicayninchiktaqa imapas chinkarachinmanmi. ¿Imatam rurachwan tukuy sonqonchikmanta hinalla Diosta servinapaq? (2 Tim. 1:6, 7.)
2. Biblia estudiayninchik, ¿imaynatam yanapawanchik predicayninchikpi?
2 Bibliatam sapakama estudiananchik: Diosmanta allin predicaqqa, kuyanmi Diospa yachachikuyninkunata hinaspa kusikunmi cheqap yachasqankunawan (Sal. 119:97). Biblia estudiasqaykipi qori hina sumaq yachachikuykunata tarispaykiqa, ¿manachu kallpanchasqa hinaspa aswan kusisqa tarikunki? Chaymi kallpanchasqa kanki Diosta alabanaykipaq hinaspa sutinmanta willakunaykipaqpas, Diosta kuyasqaykirayku hinaspa yachasqaykikunamanta hukkunaman willayta munasqaykiraykupas (Heb. 13:15). Arí, sumaq noticiamanta kusikuywan willakuspanchikmi qawachinchik ancha chaninchasqanchikta.
3. ¿Imaynatam Diosqa chuya espiritunwan payta serviyninchikpi yanapawachwan?
3 Diosmantam chuya espiritunta mañakunanchik: Diosmanta allin yachachiytaqa manam atichwanchu kikillanchikpa kallpanchikwanqa. Tukuy sonqomanta Diosta servinapaqqa, Diospa espirituntam necesitanchik (1 Ped. 4:11). Chaymi kallpa qowaqninchik Jehová Diosman asuykuptinchikqa, payqa qowasunchikmi mana hukmanyaspa hinalla predicanapaq (Isa. 40:26, 29-31). Dios serviyninpi sasachakuykunawan kaspanmi apostol Pabloqa nirqa ‘Diosmanta yanapakuy’ chaskisqanta (Hech. 26:21, 22). Ñoqanchiktapas Jehová Diosqa chuya espiritunwanmi yanapawachwan tukuy sonqowan predicanapaq. Chayraykum mañakunanchik (Luc. 11:9-13).
4. ¿Imakunapim yanapawanchikman kusikuywan predicayninchik, ichaqa imamantam cuidakunanchik?
4 Kusikuywan predicayninchikqa iñiqmasinchikkunatapas kusikuywan predicanankupaqmi kallpanchanqa (2 Cor. 9:2). Predicasqanchik runakunapas uyariwasunmi kusikuywan predicaptinchikqa. Ichaqa sumaqllata hinaspa kuyakuywanmi rimananchik (Tito 3:2). Arí, runakunata hinaspa piensasqankuta respetasqanchiktam maypipas qawachiyta munanchik.
5. ¿Diospa ima niwasqanchikta kasukunapaqmi kallpanchakunanchik?
5 Chaynaqa tukuy sonqowanyá hinalla Jehová Diospa Gobiernonmanta willakusun. Kusikuyninchiktapas astawanyá yapasun Bibliata sapakama estudiaspa chaynataq sonqomanta Jehová Diosta mañakuspa, payqa qowasunchikmi chuya espiritunta. Chaynapim Dios serviyninchiktaqa ‘atiyninwan hinaspa cheqaptapuni convencesqa’ rurasunchik (1 Tes. 1:5).