¿Imatam hukkuna yachanmanku qawawaspanchik?
1. Jesusta qawaspanku, ¿imatam qatiqninkuna yacharqaku?
1 Jesusmi kaynata nirqa: “Llasawaqniy yugoyta apaspayá ñoqamanta yachaychik”, nispa (Mateo 11:29). Arí, Jesusqa manam rimasqallanwanchu yachachirqa, yachachirqataqmi rurasqanwanpas. Piensariy payta qawaspanku qatiqninkuna yachasqankupi. Jesusqa sumaq sonqo, llakipayakuq hinaspa kuyapayakuqmi karqa (Mat. 8:1-3; Mar. 6:30-34). Chaymantapas sonqomanta humillakuqmi karqa (Juan 13:2-5). Predicanankupaq kuska rispankupas, qatiqninkunaqa qawarqakum mana pisipasqa hina predicasqanta chaynataq allintapuni yachachisqantapas (Luc. 8:1; 21:37, 38). Predicaptinchik, ¿imatam ninmanku hukkuna ñoqanchikmanta?
2. ¿Imaynatam runamasinchikta yanapanman imayna pachakuyninchik hinaspa imayna kasqanchik?
2 Predicasqanchik runakuna. Imayna pachakuyninchikpas, sumaq kayninchikpas chaynataq hukkunapi sonqomantapuni interesakusqanchikpas allintapunim hukkunata yanapanman (2 Cor. 6:3; Fili. 1:27). Musyakunkutaqmi Bibliata sapa kuti servichikusqanchikta, hinaspa munankutaqmi rimaptinku respetowan uyarinanchikta. Ama haykapipas qonqaychu, chaykuna rurayninchikqa allinpunim kanqa predicasqanchikta runakuna uyarinankupaq.
3. ¿Imaynatam iñiqmasinchikkunata yanapachwan?
3 Iñiqmasinchikkuna. Piensariytaq iñiqmasinchikkunata imayna yanapananmantapas. Ganaswan predicayninchikqa hukkunatapas kallpanchanqam. Imaynam fierro limawan fierrota afilanku, chaynam sumaqta preparakuspa predicayninchikqa hukkunatapas kallpanchanqa allinta predicanankupaq (Pro. 27:17). Sichu yachay munaqkunapa sutintawan maypi yachasqankuta allinta qellqaspa utqaylla kutinanchikpaq kallpanchakuptinchikqa, hukkunapas munanqakum chayna rurayta. Predicayninchikpi anchata kallpanchakuspaqa, iñiqmasinchikkunatapas kallpanchanchikmi (2 Tim. 4:5).
4. ¿Imanasqataq wakin kutikunapiqa qawakunanchik hukkunaman ima ejemplo qosqanchikta?
4 Allinmi kanman wakin kutipiqa imapas rurasqayki hinaspa rimasqaykipas hukkunata imayna yanapasqanta qawakuynikiqa. Allin ejemplonchikqa Jehová Diostam kusichinqa, hinaspapas apostol Pablo hinam sientekusun, paymi nirqa: “Ñoqapa ejemploytayá qatiychik, ñoqapas Cristopa ejemplontam qatini”, nispa (1 Cor. 11:1).