Ñam tanteakunanchikña
1. Jesuspa wañusqanmanta yuyarinapaq killaqa, ¿ima ruranapaqmi yanapawanchik?
1 Sapa watam Jesuspa wañusqanmanta yuyarinapaq killaqa Jehová Diosta alabanapaq allinpuni (Sal. 109:30). Rantinchikpi Jesucristo wañusqanmanta agradecekunanchikpaqmi marzo killaqa allin kachkan Dios serviyninchikpi astawan kallpanchakunanchikpaq. Chaymi kunanmantapacha chay killapaq tanteakunanchikña (Pro. 21:5).
2. ¿Ima nirqakutaq qayna wata abril killapi 30 horallata predicanapaq kasqanmanta yacharuspanku? ¿Ima nirqankitaq qamqa?
2 Precursor auxiliar kanapaq. Qayna watam anchata kusikurqanchik abril killapi precursor auxiliar kaqkuna 30 horallata predicanankupaq kasqanmanta yachasqanchikwan. Chayna kasqanmantam huk mozo nirqa: “Escuelapiraq kasqayraykum manaraq precursor regularchu kani. Ichaqa abril killapim precursor auxiliar kasaq, 30 horalla predicanapaq kaptinpas 50 hora predicaytam munachkani”, nispa. Tukuy punchaw llamkaq iñiqmasinchikpas nirqam: “¿Kimsa chunka horallata? Chayllataqa atisaqmi”, nispa. 30 horallata predicanapaq kasqanmanta uyariruspanmi 80 wata masninpi kaq iñiqmasinchikpas nirqa: “Kaqmantam precursora kayta munachkani. Precursora kaspayqa kusisqam karqani, chaytam Jehová Diospas yachan”, nispa. Chay killapiqa wakin iñiqmasinchikpas precursor auxiliar kayta mana atispankupas astawan predicanankupaqmi kallpanchakurqaku.
3. ¿Imanasqataq precursor auxiliar kachwan marzo, abril hinaspa mayo killapi?
3 Kay watapipas kaqmantam precursor auxiliar kayta atichwan; tanteakuchwanmi marzo killapi 30 horata otaq 50 horata predicanapaq. Chaymantapas marzo 17 punchawmantam invitacion aypuyta qallarisunchik abril 5 kaq punchawpi Jesucristopa wañusqanta yuyarinapaq. Marzo killapi precursor auxiliar kaqkunaqa atinmankum abril hinaspa mayo killapipas 50 hora predicayta.
4. ¿Imatam rurachwan Dios serviyninchikpi astawan kallpanchakunapaq? ¿Ima allinpim tukunqa chayna rurasqanchikqa?
4 Familiawan Diosta Yupaychanapaq Tutapim tanteawaqchik Jesucristopa wañusqanmanta yuyarinapaq killapi Dios serviynikichikpi astawan kallpanchakunaykichikpaq (Pro. 15:22). Jehová Diosta mañakuy kallpanchakusqaykichikta bendecinanpaq (1 Juan 3:22). Chaynata kallpanchakuspaykiqa Jehová Diostam alabanki hinaspapas astawan kusisqam tarikunki (2 Cor. 9:6).