Jehová Diospa suma-sumaq kayninkunamanta willakusun
1. ¿Imataq kallpanchawanchik Jehová Diospa suma-sumaq kayninkunamanta willakunapaq?
1 “Dios Taytalláy, qamqa kanki mayna hatunmi, mayna munayniyoqmi, mayna suma-sumaqmi, mayna wiñaypaqmi chaynataq mayna atiyniyoqmi. Qampamiki cielopi tukuy ima kaqpas chaynataq kay pachapi kaqpas.” (1 Cró. 29:11.) ¿Ima ruraymanmi kallpanchawanchik Jehová Dios kuyayninchik hinaspa agradecesqa kayninchikpas? ‘Diospa atiyninmanta [“suma-sumaq kayninkunamanta”, NM] willakunanchikpaq. Paymi tutayaymanta qayamuwarqanchik admirakuypaq kanchayninpi purinanchikpaq’ (1 Ped. 2:9). Manapunim sumaq Diosninchikmanta rimaytaqa saqechwanchu. Chaymi, marzo, abril hinaspa mayo killakuna allinpuni kanqa Jehová Diospa suma-sumaq kayninkunamanta willakunapaq.
2. ¿Ima sumaq arreglotam rurakurqa Jesuspa wañukusqan punchawmanta willakunapaq, hinaspa pikunataq chay arreglopi yanapakunmanku?
2 Jesuspa wañukusqan punchawmanta willakunapaq sumaq arreglo: Jehová Diospa suma-sumaq kayninkunamantam yachasunchik lunes 2 abril punchawta Jesuspa wañukusqanta yuyarispanchik. 17 marzo punchawmanta 2 abril punchawkamam enteron pachapi aypukunqa sumaq invitacionta Jesuspa wañukusqan punchawta yuyarinapaq. Llapallaykichiktam kallpanchamuykiku kay sumaq arreglopi yanapakunaykichikpaq. Kay arreglom sumaqllaña kanqa mosoq kaqkuna Bibliapa nisqanman hina kawsaptinkuqa Diosmanta sumaq noticiakunata predicaytaña qallarinankupaq. Sichu Biblia estudiachisqaykikuna otaq churi-wawaykikunapas espiritualpi ñawpariptinkuqa ancianokunawanmi rimariwaq.
3. ¿Imatam nichwan Jesuspa wañukusqanta yuyarinapaq huñunakuyman hamunankupaq?
3 Kay sumaq arreglo rurakusqanqa “¡Librakuyninchikqa hichpaykamuchkanñam!” Distrito asambleapaq arreglo rurakusqanman hinam kanqa. Achka invitacionkunatam congregacionkuna chaskinqaku, publicador kaqkunam 50 invitacionkunata chaskinqaku, precursor kaqkunañataq 150 invitacionkunata. Pisilla rimaypim ichapas kaynata nichwan: “Kay invitacionmi qampaq Jesuspa wañukusqan punchawta yuyarinapaq huñunakuyman hamunaykipaq. Invitasqam kachkanki. Kay invitacionpa qepanpim chay huñunakuymanta astawan willakuchkan”. Runamasinchikpa tapukuyninkuna kaptinqa, tiempochakuy chay tapukuyninkunata kutichinaykipaq. Ancha allinmi kanman Enseña nisqan libropa 206 paginanpi Cena del Señor nisqan yachachikuymanta qawachiyniki. Semana tukuytañataqmi chayllaraq lloqsimuq revistakunawan chay invitacionta aypusunchik. Yachay munaqkunapa sutinta qellqay hinaspa kutinaykipaq kallpanchakuy.
4. ¿Imaynatam invitacionkunata aypusunchik Jesuspa wañukusqanta yuyarinapaq huñunakuyman hamunankupaq?
4 Atikuptinqa kikin runamasinchikmanmi chay sumaq invitaciontaqa qonanchik. Mana tarisqanchikkunapa maypi yachasqankutam qellqananchik huk punchawña kutinanchikpaq. Sichu wakin congregacionkunapi achka invitacionkuna puchuptinqa, mana tarisqanchikkunapa wasinkupim saqechwan; chaytaqa rurachwanmi huk semana manaraq chay punchaw chayamuchkaptinmi, manam ñawpaqtaqa. Chaymantapas kallpanchakunanchikmi yachay munaqkuna watukusqanchikman, Biblia estudiaqkunaman, ayllunchikkunaman, llamkaqmasinchikkunaman, vecinonchikkunaman hinaspa lliw reqsisqanchikkunamanpas chay invitacionta qonanchikpaq.
5. ¿Imanasqataq kunanmantapacha precursor auxiliar hina servinapaq arreglota rurananchik?
5 Precursor auxiliar kaymanta: ¿Atiwaqchu qam Jehová Diospa suma-sumaq kayninkunamanta willakuyta precursor auxiliar hina servispayki marzo, abril hinaspa mayo killakunapi? Sapa punchaw ruraynikikunamanta ichapas tiempota horqonayki chayna servinaykipaq (Efe. 5:15-17). Astawan predicanaykipaq kallpanchakuptikiqa kusikuytam tarinki hinaspam Jehová Diospas bendecisunki (Pro. 10:22). Jesuspa wañukusqan punchaw yuyarinapaq chayaykamusqanraykum, kunanmantapacha sumaq arreglota rurananchik (Pro. 21:5).
6. ¿Imatam yachachiwanchik 90 watanpi huk paninchik precursora auxiliar hina qayna wata servisqanmanta?
6 90 watanpim huk paninchik qayna wata precursora auxiliar hina servirqa. Paymi nirqa: “Huerta ruraytam gustawan chaymi tarpuyta qallariyta munachkaptiypas, musyakurqani ancha allin kaqkunata puntapi churanaymanta. Diospa Munayninta puntapi churayta munasqayraykum, marzo killapi precursora auxiliar hina servinaypaq tantearurqani”. ¿Bendicionkunata chaskirqachu chay rurasqanmanta? Paymi nin: “Congregacionpi turi-ñañaykunawanmi astawan reqsinakurqaniku, chaymi astawan Jehová Diosman asuykachiwarqa”. ¿Paninchik hina manachu rurayninchikkunapi reparachwan aswan allin kaqta vidanchikpi puntapi churanapaq?
7. ¿Sasachu kanman precursor auxiliar hina serviyqa?
7 Precursor auxiliar hina pichqa chunka horas predicayqa manam sasachu piensasqanchikman hinaqa. Diosta mañakuspayki sapa punchaw ruraynikikunapi reparay, predicanaykipaq huk arreglota rurakuy hinaspa qellqaykuy mana qonqanaykipaq. Qanmi pimantapas yachakunki atisqaykita mana atisqaykitapas. Sichu onqochkanki otaq kallpaykipas pisiyachkan hinaptinqa ichapas iskay horata hina sapa punchaw predicawaq. Tukuy punchaw llamkaspaykiqa otaq escuelamanpas riptikiqa, ichapas tutanpi hinaspa semana tukuyta predicaspayki precursor auxiliar kawaq.
8. ¿Imataq huk wawqenchikta warmintintawan yanaparqa precursor auxiliar kanankupaq?
8 Achka wawqe-paninchikkunam aylluntinwan precursor auxiliar hina servirqaku. Pasaq watakunapim huk wawqenchik warmintinwan mana atisqankuta piensaspanku precursor auxiliar hina serviytaqa mana atirqakuchu. ¿Imatam rurarqaku? Paykunam willakunku: “Jehová Diospa yanapakuynintam mañakurqaniku ñawpaqmantaraq munasqaykuta haypanaykupaq”. Allin arreglota ruraspankum munasqankuta hayparqaku. Ninkutaqmi: “Suma-sumaqmi karqa. Kuskaykum achka bendicionkunata chaskirqaniku. ¿Imatam niymanku? Sichu ñoqayku atirurqaniku, qamkunapas kallpanchakuspaqa atirunkichikmanmi”.
9. ¿Imatam rurawaqchik aylluykichikwan estudiasqaykichikpi hamuq killakunapi kay sumaq arreglopi astawan yanapakunaykichikpaq?
9 ¿Imanasqataq aylluykichikwan estudiasqaykichikpi mana parlarinkichikchu hamuq killakunapi servicioykichikta imayna masyachinapaq? Aylluykichikpi mana llapallaykichik precursor auxiliar kayta mana atispaykichikqa, ichapas huk kaqnillaykichikpas atiwaqchikmi kayta yanapanakuspaykichikqa. Mana atikuptinqa, ichapas aylluykichikwan chay killakunapi astawan predicawaqchik kay sumaq arreglopi yanapakuspaykichik.
10. ¿Imanasqataq hukkunawan rimananchik Jesuspa wañukusqan punchaw yuyarina tiempopi precursor auxiliar hina servinanchikpaq?
10 Yanapanakusunchik: Kusikuyninchikqa hukkunatapas yanapanmanmi. Precursor auxiliar hina serviy munasqaykimanta hukkunawan rimariy. Hukkunapas kallpanchakunmankum precursor auxiliar kanankupaq. Chaymantapas precursor auxiliar hina ñawpaq serviqkunam ichapas yanapasunkiman allin arreglota rurakunaykipaq precursor auxiliar hina servinaykipaq (Pro. 15:22). Precursor auxiliar kayta atispaykiqa, ¿imanasqataq huk wawqe-paninchikkunata mana kallpanchankichu, qam hina precursor auxiliar kanankupaq?
11. ¿Imaynatam ancianokuna wawqe-paninchikkunata kallpanchanmanku hamuq killakunapi precursor auxiliar kanankupaq?
11 Achka ancianokunapas arreglotam ruranku precursor auxiliar hina servinankupaq (Heb. 13:7). Kayna rurayninkuqa congregaciontam kallpanchan. Chaymantapas rimayninkuwanmi wawqe-paninchikkunata kallpanchanku. Ichapas wakin wawqe-paninchikkuna pisi rimayllapi kuyakuywan kallpanchanata otaq consejanata munachkanku precursor auxiliar hina servinankupaq. Superintendente de servicio kaqmi ichapas arreglota ruranqa predicanapaq huñunakuykuna astawan kananpaq, llamkay hora tukuypaq otaq escuelapi estudiana hora tukuypaqpas lliw wawqe-paninchikkuna predicanankupaq, chaymantapas kallpanchakunanmi predicana law kananpaq hinaspa Bibliamanta qellqakuna kananpaqpas. Predicanapaq huñunakuykunaqa sapa semanam willakunan.
12. ¿Imatam rurawaq precursor auxiliar kayta mana atispaykiqa?
12 Precursor auxiliar kayta mana atispaykiqa, hukkunatam kallpanchawaq precursor auxiliar kanankupaq hinaspam paykunapaq oracionpi mañapuwaq (Pro. 25:11; Col. 4:12). Ichapas semanapi huk punchaw paykunawan predicanaykipaq arreglota rurawaq otaq predicaynikita masyachinaykipaqpas kallpanchakuwaq.
13. ¿Abril killapi ima haypananchikpaqmi kallpanchawachkanchik, hinaspa imatam congregacionniki ruranman chayta haypananpaq?
13 Abril killapi precursor auxiliar kananchikpaq: 2006 pasaq watapim 13.733 wawqe-paninchikkuna enero killapi precursor auxiliar hina servirqaku. Chaymi allin kanman abril killapi 10.000 precursor auxiliar kayta haypananchikpaq. Atichwanmi precursor auxiliar kaytaqa sichu sapa congregacionpi qanchis wawqe-paninchikkunamanta hukllapas kay arreglopi yanapakuptinqa. Wakin congregacionkunapiqa achka wawqe-paninchikkunam precursor auxiliar kaytaqa atinqaku. Yaqa lliw congregacionkunam kay arreglopi yanapakuytaqa atinmanku. Mayna kusikuychá congregacionnikipi kanqa hinaspapas maynatachá kallpanchawasun predicananchik lawpi runamasinchikkunata yanapanapaq.
14. ¿Imanasqam abril killa ancha allin kanqa precursor auxiliar kanapaq?
14 ¿Imanasqam abril killa ancha allin kanman precursor auxiliar hina servinapaq? Abril killa qallariyllapi Jesuspa wañukusqanta yuyarinapaq huñunakuy apakusqanraykum, kay huñunakuyman hamuqkunapata kutiyta atisunchik. Chaymantapas revistakunatam munachisun; yachay munaqkunapata kutispañataq ¿Imatam Dios munan ñoqanchikmanta? nisqan folletota munachisun Bibliamanta estudiokunata qallarinapaq. Chaymi abril killapi precursor auxiliar hina serviyqa yanapawasun Bibliamanta estudiokunata qallarinapaq. Chaymantapas, abril killa pichqa domingoyoq hinaspa iskay feriado punchawniyoq kasqanraykum, yanapawasun llamkaspapas otaq escuelaman rispapas precursor auxiliar kananchikpaq.
15. Jesuspa wañukusqanta yuyarinapaq tiempo hichpaykamusqanta yachaspaqa, ¿imanasqataq qawan-qawanlla kananchik?
15 Sapa wata Jesuspa wañukusqanta yuyarispanchikmi mana allin runakunapa puchukayninman asuykunchik. Jehová Diosmanta runamasinchikkunaman willananchikpaqqa pisi tiempollañam kachkan (1 Cor. 7:29). Kunanmantayá tukuy atisqanchikta rurasun marzo, abril hinaspa mayo killakunapi Jehová Diospa suma-sumaq kayninkunamanta willakunapaq. Chaynata ruraspam Jesuspa wañukusqanta yuyarinapaq tiempota allinta servichikusun Jehová Diosninchikta alabanapaq.
[4 kaq paginapi recuadro]
¿Kallpanchakuchwanchu abril killapi 10.000 precursor auxiliar hina servinapaq?
◼ Vidaykipi punta kaq rurasqaykikunapi reparay
◼ Haypay munasqaykichikkunamanta aylluykichikwan rimariychik
◼ Wawqe-paninchikkunawan rimariy haypay munasqaykikunamanta