Allinta chaskiykusun
1. ¿Haykapim Diostaqa allinta hatunchachwan hinaspa imanasqa?
1 Jesuspa wañukusqanta yuyarinapaq punchawqa ancha allinmi Diosta hatunchanapaq. Kay watapiqa chunka millon masnin runakuna hamunankutam suyachkanchik, hamuqkunaqa uyarinqakum Diospa chaynataq Jesuspa imayna kuyawasqanchikmanta (Juan 3:16; 15:13). Chaymantapas ima bendicionkuna haypay atinankupaq kasqanmantam yachanqaku (Is. 65:21-23). Manam discurso qoqllachu Diostaqa hatunchanqa, llapanchikmi chay ruwaytaqa atichwan hamuqkunata kusikuywan chaskispanchikqa (Rom. 15:7).
2. ¿Imakunatam ruwana hamuqkuna allin chaskisqa sientekunankupaq?
2 Huñunakuy qallaykunanta tiyaspa suyanamantaqa, ladonchikpi kaqkunatam rimaykuspa pim kasqanchikta willanchikman. Ichapas chay huñunakuy imayna kananta mana yachaspanku manchapakustin kachkanku. Chayna kaptinqa sumaqta rimaykusqanchikmi hawkayaykachinman. Ichapas invitacionta chaskisqankurayku hamurqaku. Chayta yachanapaqqa, tapunanchikmi huñunakuyman chayraq hamusqanmanta otaq mayqen iñiqmasinchiktapas reqsisqanmanta. Kuska tiyanapaq niykuspam Biblianchiktawan takina libronchiktapas kuska leenapaq nichwan. Salonpi ruwakuptinqa allintam reqsiykachina enteron salonta. Discurso tukuruptinñataqmi tapuykuna imamanta yachay munasqanmantapas. Qatiqninpi huñunakuy kasqanrayku chaylla lloqsina kaptinqa nichwanmi: “Huñunakuy imayna rikchakapususqaykimantam tapuyta munani. ¿Haykapitaq parlarichwan?”, nispa. Hinaspam allinta tanteana paykunawan huk punchaw parlanapaq. Iñiyninpi chiriyaq iñiqmasinchikkunatañataqmi ancianokuna kallpanchaykuspa yanapaykunqaku.
3. ¿Imanasqam kallpanchakunanchik hamuqkunata allinta chaskiykunapaq?
3 Diospa ancha favorecesqan kaspanchik kusisqa, hawkalla hinaspa huk sonqolla kawsakusqanchiktaqa achkam chayraq qawanqaku (Sal. 29:11; Is. 11:6-9; 65:13, 14). ¿Imatam ñoqanchikmanta ninqaku Salonninchikman hamuqkunaqa? Chayqa kanqa imayna chaskinanchikpaq kallpanchakusqanchikmantam.