¿Imamantapas llumpayta llakikuspachu hukmanyasqallaña kachkanki?

IMAMANTAPAS llumpayta llakikuspaqa mana kallpayuq hinam tarikunchik (Prov. 12:25). Wakinpiqa ichapas chayna tarikuchkanki, ichapas imatapas manaña atiq hina kachkani. Chaynaqa manam qamllachu tarikunki. Llapallanchikmi llakikunchik piyninchikpas unqurusqanrayku, piyninchikpas wañukusqanrayku, imapas karusqanrayku. Chaykunawanmi nanay-nanay hina tarikunchik, pisipasqa hina tarikunchik, llakisqa tarikunchik. ¿Imataq yanapawachwan mana chayna tarikunapaq?a

Chaypaqqa Davidmanta yachaymi yanapawachwan. Payqa achka sasachakuykunapim tarikurqa, wakinpiqa wañuypa patanpim tarikurqa (1 Sam. 17:34, 35; 18:10, 11). ¿Imaynatam Davidqa sasachakuykunata atiparqa? ¿Imaynatam Davidta qatipakuchwan?

¿IMAYNATAM DAVIDQA SASACHAKUYKUNATA ATIPARQA?

Kamachiq Saulmanta ayqichkaspanmi achka sasachakuypiraq tarikurqa. Huk kutipim runankunawan lluqsisqankumanta kutiykunankupaq chiqniqnin runakuna tukuy imankuta apakusqaku, wasinkuta kañarusqaku, ayllunkutapas apakusqaku. ¿Imaynam chaywanqa Davidqa tarikurqa? ‘Davidqa runankunapiwan qaparispan waqarqaku manaña kallpayuq kanankukama’, runankunapas ‘rumiwan chuqaparunankupaqmi rimanakurqaku’ (1 Sam. 30:1-6). Davidmanqa sasachakuykunam muntukururqa, ayllunkunam wañuy patanpi tarikuchkarqa, kamachiq Saulwan runankunapas wañurachiytam munachkarqaku. ¡Mayna hukmanyasqachá Davidqa tarikurqa!

Chayna sasachakuypi kaspanpas, Davidqa ‘hapipakurqa yupaychasqan tayta Diosmanmi’. Payqa sapa kuti ruwasqanman hinam Jehova Diosta mañakurqa yanapaykunanpaq, yuyaymanarqam payrayku Jehova Dios imakunata ruwasqanpi (1 Sam. 17:37; Sal. 18:2, 6). Davidqa Jehova Diostam yanapananpaq mañakurqa. Jehova Dios ima ruwananta niykuptinmi Davidqa chaylla ruwayta qallaykurqa. Chaymi Jehova Diosqa Davidtawan runankunata yanapaykurqa, paykunaqa kaqmantamá ayllunkutawan tukuy imankuta kutiykachikurqaku (1 Sam. 30:7-9, 18, 19). Davidqa Jehova Dios yanapananpaqqa paytam mañakurqa, ñawpaqta yanapasqanpim yuyaymanarqa, Jehova Diospa nisqanman hinam ruwarqa. ¿Imaynatam ñuqanchikpas Davidta qatipakuchwan? Chaymantayá yachaykusun.

¿IMAYNATAM DAVIDTA QATIPAKUCHWAN?

1. Diosta mañakuspam. Imamantapas llumpayta llakikuspaqa Jehova Diostam mañakunanchik yanapawananchikpaq. Payman willakuspanchikqa hawkam tarikusun, paytaqa mañakuchwanmi unaypas utaq pisillapipas, utaq sunqunchik ukullapipas. Sapa kutilla Diosta mañakuspanchikqa David hinam Diospi hapipakuchkanchik. Paymi nirqa: ‘Dios taytalláy, qamqa ñuqapaqmi qaqa hina kapuwanki. Qamqa pakakuna wasi hinam kapuwanki. Qamqa ñuqallaytamiki libraykullawanki. Diosnilláy, amparakuykunay hatun rumim kapuwanki’, nispa (Sal. 18:2). Chaynaqa, ¿Diosta mañakuyqa yanapawachwanchu? Awriki. Iñiqmasinchik Kaliapas ninmi: “Diosta mañakuruspayqa hawkam tarikuni. Payta mañakuyqa yanapawanmi Jehova Dios hina piensanaypaq, paypi hapipakunaypaq”, nispa. Chaynaqa Diosta mañakuspaqa hawkayaytam tarisunchik.

2. Diospa yanapawasqanchikpi yuyaymanaspam. Jehova Diosqa ñawpaqtaqa imapipas yanapasurqankichá. Runankunatawan ñuqanchikta yanapawasqanchikpi yuyaymanaspanchikqa paypim astawan hapipakusun hinaspapas hawkallam tarikusun (Sal. 18:17-19). Punta apaq iñiqmasinchik Joshuapas ninmi: “Jehova Diosqa mañakusqayman hinam yanapawarqa, payqa imapi yanapawananpaq mañakusqayman hinam yanapawarqa”, nispa. Chaynaqa Jehova Diospa yanapawasqanchikkunapi yuyaymanaspaqa, kallpatam hapisunchik hinalla ñawpaqman rinapaq.

3. Diospa niwasqanchikman hina ruwaspam. Manaraq imatapas tantiachkaspam bibliapi ima niwasqanchikta maskananchik (Sal. 19:7, 11). Bibliapi nisqanqa achkaqtam yanaparqa imatapas allinta tantianankupaq. Punta apaq iñiqmasinchik Jarrodpas ninmi: “Bibliapi Diospa ima nisqanta maskaspayqa astawanmi yachani Jehova Dios ima ruwanayta munasqanta. Hinaspaymi sunqumanta paypa munasqanman hina ruwani”, nispa. Jehova Diospa nisqanta bibliapi maskaspanchikqa hinaspa chayman hina ruwaspanchikqa, ima sasachakuywanpas manam chayllaqa hukmanyasunchu.

JEHOVA DIOSMI YANAPAWASUN

Davidqa sasachakuykunawan mana hukmanyarunanpaqmi Jehova Diosta mañakurqa, anchatam agradecekurqa Dios yanapaykusqanmanta, chaymi nirqa: ‘Qanwanqa pirqawan corralasqa llaqtakunatam tuñichisaq’, nispa. Nirqaraqmi: “Tayta Diosmi kallpanchaqniyqa”, nispa (Sal. 18:29, 32). Sasachakuyninchikkunaqa pirqakuna hinam kanman, ichaqa Jehova Dios yanapawaptinchikqa chaykunataqa atipasunmi. Mañakuptinchikqa, yanapawasqanchikkunapi yuyaymanaptinchikqa, niwasqanchikman hina ruwaptinchikqa, Diosninchikqa kallpatam quwasun. Yanapawasuntaqmi allinta tantianapaqpas. Chaypaq kallpanchakuspaqa manañamá imawanpas llumpaytaqa hukmanyasunñachu.