¿Iñisqankuman hina kananpaqchu bibliata testigokuna tikrarunku?

Manam chaytaqa ruwanikuchu. Iñisqayku utaq creesqayku bibliapa yachachisqanman hina mana kasqanta musyakuruspaykuqa aswanmi kallpanchakuniku bibliapa imayna yachachisqanman hinaña ruwanaykupaq.

Iñisqaykuqa Diospa palabranpa nisqanman hina kachkan. 1950 watamantapacham Traducción del Nuevo Mundo de las Santas Escrituras niq bibliata hurquyta qallaykuspaykupas, ñawpaqmantaraqmi bibliataqa allinta estudiarqaniku. Chaypaqqa yanapachikurqanikum huk runakunapa tikrasqan bibliakunawan. Traducción del Nuevo Mundo niq bibliayku manaraq kachkaptin, imakunapi iñisqaykumantayá qatiqninpi qawariy. Allinmi kanman chay yachachikuykunata kikikipa bibliaykipi qawaynikiqa.

1. Chullalla Dios kasqanpim iñiniku. 1882 watapim julio killapaq ruwasqanku Willakuq qillqa nirqa: ‘Kay qillqata leeqkunaqa ninkum Jehova Diospi, Jesucristopi chaynataq chuya espiritupi iñispaykupas, manam iñinikuchu paykuna huk cuerpollapi kasqankutaqa. Wakinmi yachachinku Diosta tayta, dios churi, hinaspa dios espiritu huk cuerpollapi kasqankuta chay yachachikuyqa llullam maman bibliapa yachachisqanwanqa tupanchu’, nispa (1882 watakunapiqa Zion’s Watch Tower nispam Willakuq qillqata suticharqaku).

   Bibliapa yachachisqan: ‘¡Yupaychasqanchik tayta Diosqa chullallam!’, nispa (Deuteronomio 6:4, Chuya Qellqa 1987). ‘Ñuqanchikpaqqa chullallam Diosninchikqa, payqariki Dios taytam. Paymi ruwarqa tukuy imata, ñuqanchikpas paypaqmi kanchik. Chullallam señorqa, payqariki Jesucristom’, nispa (1 Corintios 8:6, Chuya Qellqa 1987). Jesuspas nirqam: ‘Taytayqariki ñuqamantaqa aswan atiyniyuqmi’, nispa (Juan 14:28, Chuya Qellqa 1987).

2. Manam iñinikuchu infiernopi mana allin runakuna ñakarichisqa kanankupiqa. 1882 watapim Willakuq qillqapi hurqumurqaku Romanos 6:23 nisqanmanta, kayna yachachikuyta “Huchallikuypa pagonqa wañuymi” niqta. Hina chay yachachikuyllapim nirqa: “¡Kay yachachikuyqa chaylla entiendenapaqmi!” nispa. Achka runakuna biblia Diospa palabran kasqanta creespankupas, manam yachachisqankunapiqa creenkuchu aswanmi ninku huchapa pagonqa infiernopi wiñaypaq ñakariy kasqanmanta.

   Bibliapa yachachisqan: ‘Pipas huchallikuqqa wañunqam’, nispa (Ezequiel 18:4, 20, Chuya Qellqa 1987). Diosta mana kasukuqkunaqa, manam rawrachkaq ninapichu wiñaypaq ñakarichisqa kanqaku aswanqa bibliapa nisqanman hinam chinkachisqa utaq wañuchisqa kanqaku (2 Tesalonicenses 1:9).

3. Diospa reinonqa Diospa kamachikuynin kasqanpim iñiniku, kayqa manam runakunapa sunqun ukupichu tarikun. 1881 watapim diciembre killapaq Willakuq qillqa Dios kamachimunanmanta yachachispan nirqa: “Diospa kamachikuynin kay allpa pachata kamachiptinmi llapallan kay pachapi gobiernokuna puchukachisqa kanqa”, nispa.

   Bibliapa yachachisqan: ‘Chay hamuq reykuna gobiernachkaptinmi hanaq pacha Dios hatarichinqa mana tuñichiy atina gobiernota, chay gobiernoqa huk runamanqa manam qusqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq’, nispa (Daniel 2:44, Chuya Qellqa 1987).

¿Traducción del Nuevo Mundo niq bibliallapichu Jehova Diospa testigonkunaqa creenku?

Manam. Iñisqaykumanta runakunaman yachachinaykupaqqa mayqin bibliatapas servichikunikum. Piwanpas bibliata estudiaspaykuqa Traducción del Nuevo Mundo niq bibliatam mana qullqillapaq quniku. Ichaqa, pipas kikinpa biblianwan estudiayta munaptinqa biblianwanmi estudianiku.