Diospa amigon Abrahanmanta

SINCHI Para pasasqan qepatam Ur llaqtaman wakin runakunaqa rirqaku kawsakunankupaq. Ur llaqtaqa ancha reqsisqa llaqtam karqa sumaqmi wasikunapas karqa. Chaypi runakunam ichaqa pantasqa dioskunata yupaycharqaku. Babelpipas chaynatam rurarqaku. Ur hinaspa Babel llaqtapi runakunaqa manam Noey nitaq churin Sem hinachu Jehová Diosta servirqaku.

Sinchi paramanta 350 wata pasaruptinmi, Diosta serviq Noey wañukurqa. Iskay wata qepallantam dibujopi qawasqayki runaqa nacerqa. Payqa Diospa kuyasqan runam karqa. Sutinñataqmi Abraham karqa. Ur llaqtapim ayllunwan kawsakurqa.

Abrahamtam Jehová Dios nirqa: ‘Llaqtaykimanta hinaspa aylluykimanta lloqsiy qawachinay allpaman’ nispa. ¿Diospa kamachisqanta kasukuspachu saqenman karqa Ur llaqtanpi ima kapuqnintapas? Kasukurqam. Diosta kasukusqanmantam Abrahamta reqsirqaku Diospa amigonta hina.

Abrahamqa wakin ayllumasillanwanmi Ur llaqtamanta pasakurqa. Pusarqam taytan Tareyta hinaspa sobrinon Lottapas. Pusarqataqmi warmin Saratapas. Tiempopa risqanman hina Haran sutiyoq llaqtaman chayarurqaku hinaptinmi chaypi Tareyqa wañukurqa. Ur llaqtamantaqa karupiña karqaku.

Chaymantam Abrahamqa aylluntin Haran llaqtamanta pasakuspankum Canaan llaqtaman chayarqaku. Hinaptinmi Jehová Dios nirqa: ‘Miraynikimanmi kay allpata qosaq’ nispa. Abrahamqa Canaan llaqtapi qepakuspanmi yachakurqa karpakunapi.

Abrahamta Dios yanapaptinmi ovejankunapas achkallataña mirarurqa chaynataq wakin animalninkunapas, serviqninkunapas pacha-pachakqninpim karqa. Abrahamqa Sarawanmi mana churiyoq karqaku.

Abraham 99 watanpiña kachkaptinmi, Jehová Dios nirqa: ‘Kaymi qanwan contratoy, qampa miraynikikunam kanqa achka nacionkuna’ nispa. Ichaqa ¿imaynatataq chayqa cumplikunman karqa, Abrahamwan Saraqa yuyaqña kaspa manaña churiyoq kayta atiptinkuqa?