8 KAQ YACHACHIKUY
Abrahanwan Sara Jehova Diosta kasukusqankumanta
Babel llaqtapa hichpallanpim karqa Ur sutiyuq llaqta, chaypi runakunaqa taytacha-mamachatam yupaycharqaku. Abrahan sutiyuq runam ichaqa Jehova Diosllata yupaycharqa.
Abrahantam Jehova Dios nirqa: “Llaqtaykitawan aylluykita saqispa qunay allpaman riy”, nispa. Nirqataqmi: “Miraynikikunamantam hatun nacionta ruwasaq. Miraynikiwantaqmi llapallan runakunapas allinlla tarikunqaku”, nispa.
Mayman rinanta mana yachaspanpas Jehova Diosllapim Abrahanqa hapipakurqa. Payqa warmin Sarawan, taytan Tareywan chaynataq sobrinon Lotwanmi Jehova Diosta kasukurqaku, chaymi allichakurqaku Jehova Diospa qunan allpaman rinankupaq.
Chay rinanku allpapa sutinmi karqa Canaan, chay allpaman Abrahan chayaruspanqa 75 watanpiñam karqa, chaypim Jehova Diosqa payta nirqa: “Kay allpatam churikikunaman qusaq”, nispa. Abrahanwan warminmi ichaqa yuyaqña karqaku, manataqmi churi-wawankupas karqaraqchu. Hinaptinqa, ¿imaynatataq Jehova Diosqa rimasqanta ruwanman karqa?
“Diospi iñisqanraykum Abrahanpas Dios kamachiptin kasukurqa, hinaspam mayman rinanta mana yachachkaspanpas llaqtanmanta lluqsirqa herencia chaskinan allpaman” (Hebreos 11:8).