Rupachkaq chapramanta

MOISESMI Horeb sutiyoq orqoman pastota ovejankunapaq maskastin rirqa. Chaypim rupachkaq chaprata rikururqa, ¡chapram ichaqa mana kañakusqachu!

‘¿Imanasqataq mana kañakunchu?’ nispam Moisesqa nirqa. ‘Wakta kunallan qawaramusaq’ nispa asuykuchkaptinmi chapramanta rimaqta uyarirqa kayna niqta: ‘Ama asuykamuwaychu. Usutaykita horqokuy, sarusqayki allpaqa ñoqapaq sapaqchasqam’ nispa. Angelmi Diospa rantinpi rimachkarqa, chaymi Moisesqa uyanta tapakuykurqa.

Hinaptinmi Dios nirqa: ‘Qawachkanim Egipto nacionpi runaykunapa ñakarisqanta. Paykunataqa librasaqmi hinaspa kachasqayki Egiptomanta horqomunaykipaq’ nispa. Jehová Diosqa llaqtanta pusanan karqa Canaan lawpi sumaq allpaman.

Chaymi Moisesqa nirqa: ‘¿Pitaq ñoqaqa kani? ¿Imaynatamá chaytaqa rurayman? Riptiyqa niwanqakuchá: “¿Pitaq kachamusunki?” Hinaptinqa, ¿imanisaqtaq paykunataqa?’

‘Kaynatam ninki’ nispam Diosqa nirqa. ‘“Abueloykichik Abrahampa, Isaacpa hinaspa Jacobpa JEHOVÁ Diosninmi kachamuwan qamkunaman.”’ Chaymantapas Jehová Diosqa kaytam nirqa: ‘Kaymá wiñaypaq sutiyqa.’

Moisesñataqmi nirqa: ‘¿Qam kachawasqaykimanta mana creewaptinkuqa?’

Diosñataq nirqa: ‘¿Imataq chay makikipi kachkan?’

Hinaptinmi Moisés nirqa: ‘Tawnam’ nispa.

‘Pampaman wischuy’ nispam Diosqa nirqa. Chaynata Moises ruraruptinmi tawnanqa culebraman tikrakururqa. Hinaptinmi, Jehová Diosqa huk milagrotawan Moisesman qawachirqa. Hinaspa nirqa: ‘Makikita hinay oqllaynikiman.’ Moises hinaykuspa horqoykamuptinmi, ¡makinqa riti hina yuraqllaña kachkasqa! Lepra onqoywan hina kachkasqa. Hinaptinmi Jehová Diosqa Moisesman atiyta qorqa kimsa kaq milagrota rurananpaq. Chaymantañataqmi nirqa: ‘Kay milagrokunawanmi Israel runakunaqa creesunki ñoqa kachamusqayta’ nispa.

Chaymantam, Moisesqa wasinman kutispa suegron Jetrota nirqa: ‘Kunanmi kutisaq Egipto nacionpi kaq castaykunaman imayna kasqankuta yachamunaypaq’ nispa. Hinaptinmi Jetroñataq nirqa Moisesta, allinmi rinanpaq, chaymi Moisesqa illayta qallarirqa Egiptoman kutinanpaq.