QARANPI KAQ YACHACHIKUY: MOISESQA QATIPAKUNAPAQMI
¿Pitaq Moisesqa karqa?
Moisesmanta uyarispaqa, ¿imayna kasqanmantataq yuyarinki?
Nilo sutiyoq mayupa patanpi mamanpa saqesqan canastillapi wawachata hina.
Egiptopi tukuy imayoq uywasqa kaspanpas israelita kasqanta mana qonqasqanta.
Madian llaqtapi tawa chunka wata ovejakuna michiqta hina.
Rupachkaq chaprapa kasqanpi Jehovaa Dioswan rimaqta.
Israelitakunata kacharinanpaq Egiptopi reywan mana manchakuspa rimaqta.
Rey faraonman chunkantin onqoykunamanta nisqanta.
Egiptomanta israelitakuna lloqsiptinku imayna pusasqanta.
Diospa atiyninwan puka lamar qocha rakisqanta.
Diospa kamachisqanman hina chunkantin kamachikuykunata israelitakunaman qosqanta.
DIOSMAN sonqo Moisesmantaqa kanraqmi huk willakuykunapas. Paytaqa cristianokunapas, judiokunapas chaynataq musulmankunapas anchatam respetanku.
Diosmanta willakuq Moisesqa admirakuypaq kaqkunatam ruwarqa (Deuteronomio 34:10-12). Tukuyta ruwananpaq Dios valekuptinpas paywan Eliasqa ‘ñoqanchik hinallam karqaku’. Huk kutipim Jesuspa rikchaynin kanchariyman tikrakuptin Moisestawan Eliasta Jesuspa discipulonkuna rikurqaku (Santiago 5:17; Mateo 17:1-9). Moisespas tukuy sasachakuypim karqa ñoqanchik hina ichaqa ima sasachakuytapas atiparqam.
¿Yachayta munawaqchu imayna atipasqanmanta? Qawasunyá imayna kayninmanta kimsa yachachikuykunata chaynataq imayna qatipakunamantapas.
a Bibliam nin Diospa sutinqa Jehova kasqanta.