Chunka castigomanta

DIBUJOKUNATA qaway. Sapakamam qawachichkan Jehová Diosqa Egiptota imawan castigasqanmanta. Punta kaqpiqa, Aaronmi tawnanwan Nilo sutiyoq mayuta waqtachkan. Hinaptinmi yakuqa yawarman tikrakururqa, chaymi mayupi challwakunapas wañururqa, hinaspanmi mayuqa millakuypaq asnarikurqa.

Chaymanta, Nilo mayumanta Jehová Diosqa rikurichimurqa kayrakunata. Chaymi kayrakunaqa huntarurqa hornonkunaman, artesankunaman, camankunaman chaymanta llapa imankunamanpas. Kayrakuna wañuruptinmi Egipto runakuna monto-montonta huñururqaku hinaptin enteron Egipto nacionqa millakuypaq asnarikurqa.

Chaymantam, Aaronqa pampapi polvota tawnanwan waqtarurqa hinaptinmi chuspichakunaman tikrakurqa. Kayqa kimsa kaq castigom karqa.

Wakin castigokunaqa Egipto runakunallatam ñakarichirqa, Israel runakunatam ichaqa mana ñakarichirqachu. Tawa kaq castigom karqa tankayllukuna, chay tankayllukunam Egipto runakunapa wasinpi huntarurqa. Pichqa kaq castigoñataqmi animalkunapaq peste onqoy karqa. Hinaptinmi Egipto nacionpi runakunapa vacankuna, ovejankuna hinaspa cabrankuna wañururqa.

Chaymantam Moiseswan Aaronqa uchpata aptirispanku cielo lawman maqchirirqaku, hinaptinmi chupukuna rikurirurqa runakunapipas chaynataq animalkunapipas. Kayqa soqta kaq castigom karqa.

Chaymantam Moisesqa makinta haywarirqa cielo lawman, hinaptinmi Jehová Diosqa rayokunata tunrururachispa runtu parata chayachimurqa. Chayna sinchi runtu paraqa manam karqachu Egipto nacionpiqa qallarisqanmantapunipas.

Pusaq kaq castigoqa nana-nanaq aqarway urukunam karqa. Manam chayna niraq aqarwaykunaqa ñawpapiqa nitaq chaypa qepantapas karqachu. Runtu paramanta puchuqkunatam lliwta mikukururqaku.

Isqon kaq castigoñataqmi tutayay karqa. Kimsa punchawmi yanay-yanay tutayayqa Egipto nacionpi karqa, Israel runakuna yachasqallanpim ichaqa achkiy karqa.

Chaymantañataqmi, Diosqa llaqtanta nirqa malta chivatopa otaq malta carneropa yawarninwan punkupa marconpi llusinankupaq. Hinaptinmi Egipto nacionninta Diospa angelninqa pasarqa. Chay angelqa yawarta qawaykuspanmi, mana pitapas chay wasipiqa wañuchirqachu. Mana yawar kasqanta qawaykuspam ichaqa, wañuchirqa runakunapa piwi churinta hinaspa animalkunapa piwinkunatapas. Kayqa chunka kaq castigom karqa.

Kay castigopa qepanta, Faraonqa Israel runakunata kacharirqa, Israel runakunaqa allichakurusqakuña pasakunankupaq, hinaptinmi chay tutallapi Egipto nacionmanta pasakurqaku.