Qipallaña kaq castigomanta

Moisesmi Egiptota kamachiqta utaq faraonta nirqa: “Manañam yapatawanqa qayllaykiman hamusaqñachu”, nispa. Nirqataqmi: “Chawpi tutatam Egipto nacionpi lliw piwikuna wañunqa, faraonpa piwi churinmanta qallaykuspa sirvientepa piwinkama”, nispa.

Chaymantam Israel runakunata Jehova Dios nirqa: “Kunan tutam huk watayuq malta carnerota utaq malta chivatota nakankichik, hinaspam yawarninwan punkupa sayaqnin qirunta llusinkichik. Mikunkichiktaqmi kankasqa aychatawan mana qunchuyuq tantatapas. Kunan tutam hurqusqaykichik, chaymi illanapaq hina pachasqallaña listo kanaykichik, usutaykichikpas sumaq watasqam kanan”, nispa. ¡Anchatachá Israel runakunaqa kusikurqaku!

Chawpi tutatam Diospa angelnin lliw piwi kaqkunata apupatapas wakchapatapas wañurachirqa, haykam punkunkuta yawarwan mana llusiqkunapata. Israel runakunapa piwi churinkutam ichaqa mana wañuchirqachu.

Faraonpa piwi churinpas wañuruptinmi llakisqallaña Moisestawan Aaronta nirqa: “¡Kaymanta pasawaychik, hinaspayá Diosnikichikta yupaychamuychik! ¡Qatiychik animalnikichiktapas!”, nispa.

Chay tutam Israel runakunaqa lluqsirqaku puqusqa killapi, aylluntin hinaspa kastantin. Qarikunam yaqa 600.000 karqaku, warmikunawan wawakunaqa manam yupasqachu karqaku. Mana Israel kasta runakunapas Jehova Diosta yupaychanankupaqmi qatikurqaku. ¡Chayraqmi Israel runakunaqa kacharisqa karqaku!

Jehova Dios librasqanta yuyarinankupaqmi sapa wata chay mikuyta ruwananku karqa. Chaytam sutichaqku Pascua nispa.