Kimsa castigokunamanta

Egipto runakunam Israel runakunata ñakarichispa llumpayta llamkachirqaku. Chaymi Jehova Diosqa Moiseswan hinaspa Aaronwan kaynata Egiptota kamachiqman utaq faraonman willachirqa: “Kachariy llaqtayta chunniqpi yupaychawananpaq”, nispa. Faraonñataqmi hatuntukuspan nirqa: “Imanawanqataq Jehova Diosqa. Israel runakunataqa manam kacharisaqchu”, nispa. Hinaspam aswanraq llamkachirqa. Chayraykum Jehova Diosqa 10 castigokunawan Egipto runakunata castigarurqa. Diosmi Moisesta nirqa: “Faraonqa manam kasuwanchu. Paqarinmi Nilo mayupi faraonman willanki llaqtayta mana kacharisqanrayku mayuta yawaryachinaymanta”, nispa. Moisesqa kasukuspanmi faraonman rirqa, chaymi Nilo mayuta Aaron tawnanwan waqtaykuptin yakuqa yawaryaruspan millapata asnarqa, challwakunapas wañururqam, tomanapaqpas manañam allinchu karqa. Chaywanpas faraonqa manam kachariyta munarqachu.

Qanchis punchawmantam kaqmanta Jehova Diosqa Moiseswan faraonman willachirqa: “Sichu mana kachariyta munaptikiqa nacionnikipim achkallaña karyakunata rikurirachisaq”, nispa. Faraon mana kasukuptinmi Aaronqa tawnanta haywariykurqa yakukunapa hawanman, hinaptinmi karyakuna lluqsiramurqa allpata tapaykunankama. Tukuy hinastinpim rikurirurqa: Wasikunapi, puñunankupi hinaspa mikuna platokunapipas. Chaymi faraonqa Moisesta nirqa: “Diosta ruegakuychik karyakunata chinkachinanpaq, hinaptinqa kacharisqaykichikñam”, nispa. Dios sosegarachiptinmi karyakunaqa lliw wañururqa, chaymi muntu-muntunta huñururqaku, allpapas asnarirqam. Chaywanpas faraonqa manam Israel runakunataqa kacharirqachu.

Chaymantam Jehova Diosqa Moisesta nirqa: “Aaronyá tawnanwan allpata waqtachun, chaynapi huqarikuq allpa chuspiyarunanpaq”, nispa. Chaymi chuspichakuna runakunata tukururqa. Hinaptinmi wakin Egipto runakuna faraonta nirqaku: “¡Diosmantam kayqa!”, nispa. Chaywanpas Israel runakunataqa faraonqa manam kacharirqachu.