Wañusqakunata Jesus kawsarichimusqanmanta

QAWASQAYKI sipaschaqa 12 watachayoqmi. Makichanmantam Jesusqa aysarichkan, hinaspa warmachapa tayta-mamanpas chaypim kachkanku. ¿Yachankichu imanasqataq kusisqallaña kachkanku? Qawasunchikyá.

Chay sipaschapa taytanqa Jairo sutiyoq kamachikuqmi karqa. Huk punchaw warmi churinqa onqorurqa hinaspanmi camapi samaykachirqaku. Ichaqa manam allinyakurqachu, aswanqa llumpaytaraqmi onqorurqa. Chaymi Jairoqa warmintinwan llumpayllataña hukmanyarurqaku, sapallan warmi churichan wañuy patapi kachkaptin. Jairoqa Jesuspa milagrokuna rurasqanmantam yacharurqa hinaspa Jesusta maskaq rirqa.

Hinaspam Jesusta Jairoqa tariramurqa, chaypim Jesuspa muyuriqninpi achkallaña runakuna huñunasqa kachkarqaku. Hinaptinmi Jairoqa runakuna chawpinta rispan Jesuspa ñawpaqninpi qonqorakuykurqa hinaspam ruegakurqa kaynata: ‘Warmi churiymi wañuy patapiña kachkan, wasiyman rispaykiyá sanoyaykachiy’ nispa. Chaymi Jesusqa rinanta nirqa.

Richkaptinkum achkallaña runakunaqa Jesusta anchuykunankupaq tanqanakuspanku richkanku. Hinaptinmi Jesusqa sayaykuspan tapurqa: ‘¿Pitaq llapchaykaramuwan?’ nispa. Jesusqa musyarunmi huk kaqnin llapchaykuspan atiyninwan sanoyarusqanta. Ichaqa ¿pitaq llapchaykun? Chunka iskayniyoq wataña onqoq warmim. ¡Jesuspa qepanta rispanmi pachanpa patanta llapchaykuspallan sanoyarurqa!

Chaymi Jesus mana sasachakuspan onqoqkunata sanoyachisqanta qawaspan Jairoqa kallpanchakurqa. Hinaptinmi huk runa hamuruspan Jairota nirqa: ‘Churikiqa wañukunñam. Amañayá Jesustaqa pusaychu’ nispa. Chayta uyariruspanmi Jesusñataq Jairota nirqa: ‘Ama llakikuychu, churikiqa sanoyanqam’ nispa.

Jairopa wasinman chayaruspankuñataqmi, runakunaqa qapa-qaparispa waqachkarqaku. Hinaptinmi Jesus nirqa: ‘Ama waqaychikchu. Warmaqa manam wañusqachu kachkan aswanqa puñuchkanmi’ nispa. Ichaqa paykunam wañusqaña kasqanta yachaspanku Jesusta asipayarqaku.

Hinaptinmi Jesusñataq warmapa kasqan cuartoman warmapa tayta-mamallantawan kimsa apostolninkunallata yaykuchirqa. Chaymi warmata makinmanta aysarispan nirqa: ‘Warma, hatariy’ nispa. Hinaptinmi payqa kawsarirurqa dibujopi qawasqaykiman hina. Hinaspa ¡hatarispanmi purirqa! Chaymi warmachapa tayta-mamanqa llumpayta kusikuchkanku.

Jesusmi ichaqa manam payllatachu wañukusqanmanta kawsarirachirqa. Ñawpaqtaqa Nain sutiyoq llaqtapi viudapa qari wawantam kawsarichirqa. Chaymantapas, Jesusqa Martapatawan Mariapa turin Lazarota kawsarirachirqa. Chaymi Diospa churasqan rey hina kamachimuptinqa, wañusqa runakunamanta achkallatañam kawsarichimunqa. ¿Manachu chayqa kusirikunanchikpaq kanman?