Jesuspa achka milagrokuna ruwasqanmanta

Jesusqa Diospa gobiernonmanta willakunanpaqmi kay pachamanqa hamurqa. Chaymantapas Diosmi atiyta qurqa milagrokunata ruwananpaq. Chaymi Jesusqa mana uyariqkunata, ñawsakunata hinaspa suchukunatapas allinyachirqa, demoniokunatapas runakunamantam qarqurqa. Wakin unquqkunaqa Jesuspa pachanta llachpaykuspallam sanoyarurqaku, chayraykum runakunaqa maymanña riptinpas qatiqku. Jesusqa llapankutamá chaskiq sapallanña kayta munaspanpas. Tukuy chaykuna ruwasqanwanmi Jesusqa qawachirqa kay pachata kamachimuspan imakuna ruwananmanta.

Huk kutipim Jesuspa kasqan wasiman suchu runata aparurqaku. Ichaqa achkallaña runakuna kasqanraykum Jesusman asuykachiyta mana atirqakuchu, chaymi wasipa qatanta uchkuruspanku Jesuspa kasqanman suchuta chakanapi uraykachirqaku. Jesusñataqmi chay suchu runata allinyarachirqa, hinaptinmi runakunaqa qawarayarqaku.

Huk kutipipas huk llaqtachaman yaykuchkaptinmi leprawan unquq chunka runakuna karullamanta qaparispa Jesusta nirqaku: “¡Jesus hampiykullawayku!”, nispa. Chay tiempopiqa leprawan unquqkunaqa manam sano runakunamanqa asuykunankuchu karqa. Chaymantapas Diospa kamachikuyninpim nirqa leprawan unquqkunaqa sanoyaruspankuqa Diospa wasinman rinankumanta. Chaymi Jesus nirqa Diospa wasinman rinankupaq, hinaptinmi manaraq chayachkaspanku sanoyarurqaku. Chay chunka sanoyaqkunamantaqa hukllam Jesustaqa agradecekuq kutirqa, hinaspam Jehova Diosta hatuncharqa.

Huk warmipas 12 watañam llumpayta unqurqa, chaymi sanoyaruyta munaspan llapa runakunapa chawpinta asuykuspan Jesuspa pachanpa patanta llachpaykurqa, hinaspam chaylla sanoyarurqa. Jesusñataqmi nirqa: “¿Pitaq llachpaykamuwan?”, nispa. Hinaptinmi warmiqa manchakustin Jesusman asuykuspan willakurqa. Jesusñataqmi nirqa: “Mamáy, amaña llakikuychu. Hawkañayá pasakuy”, nispa.

Jairo sutiyuq runapas Jesustam nirqa: “Warmi churillaymi llumpayta unquchkan, wasiymanyá hakuchik”, nispa. Ichaqa richkaptinkum sipaschaqa wañukurqaña, chaymi chayaruptinku ayllunkunawan achka runakuna waqachkasqaku. Paykunatam Jesus nirqa: “Ama waqaychikchu, sipaschaqa puñuyllam-puñuchkan”, nispa. Hinaspam Jesusqa sipaschapa makinta hapiykuspan nirqa: “Sipascha, ¡hatariy!”, nispa. Sipaschaqa chayllam hatarirurqa. Chaymi Jesusñataq nirqa sipascha mikunanpaq imallatapas quykunankupaq. ¡Maynatachá tayta-mamanqa kusikurqaku!