¿Wañuruspaqa kawsarimuchwanraqchu?

WAÑURUPTINCHIKQA, ¿munanmanchu Diosqa kaqmanta kawsarinanchikta?... Jobqa manam chaymantaqa iskayrayarqachu. Chaymi wañuy patanpi hinaña kaspan Diosta nirqa: ‘Qayakamuptikim ñuqañataq contestamusqayki’, nispa. Jobqa nirqataqmi Diosqa kawsarichiyta anchata munasqantapas (Job 14:14, 15).

Jesuspas taytan hinam ancha kuyakuqllaña. Chaymi huk kutipipas leprawan unquq runa “¡señorlláy, munaspaykiqa sanoyaykachillawayá!” nispa niptin, “munanim” nispa hampiykurqa (Marcos 1:40-42).

Jesusqa taytanta qawaspanmi warmachakuna kuyayta yacharqa. Jehova Diosqa ñawpa watakunapim serviqnin Eliaswan viuda warmipa wawanta kawsarirachirqa. Eliseopas Diospa atiyninwanmi huk warmipa wawanta kawsarirachirqa (1 Reyes 17:17-24; 2 Reyes 4:32-37).

¿Manachu ancha kusikuypaq Diospa kuyawasqanchikmanta yachayqa?... Wañuruptinchikpas payqa yuyawanchikmi. Chaymi Jesuspas nirqa Diospa kuyasqan runa wañuruspanqa kawsachkanmanpas hinalla Diospaqqa kasqanta (Lucas 20:38). Bibliapas ninmi: ‘Manam wañuypas, vidapas, kunan tiempopi kaqkunapas nitaq hamuq tiempopi kaqkunapas rakiwachwanchu Diospa kuyakuyninmantaqa’, nispa (Romanos 8:38, 39).

Kay pachapi Jesus kaspanqa warmachakunamanpas yachachirqam Jehova Diospa kuyasqan kasqankuta. Ichaqa, ¿yacharqankichu Jehova Diospa atiyninwan warmachakunatapas Jesus kawsarichiy atisqanta?... Yachaykusunyá Jairo sutiyuq runapa warmachanta Jesus kawsarichisqanmanta.

Jairoqa warminwan hinaspa chunka iskayniyuq watanpi kaq warmi warmachanwanmi Galilea lamar quchapa hichpanpi yacharqa. Chay warmachanmi llumpayta unquspan wañuy patanpiña kachkarqa. Chaymi Jairoqa mana ima ruwaytapas atirqachu. Chaynapi kachkaspanmi yuyarirurqa Jesusqa unquqkunatapas hampisqanta. Hinaspam chaylla maskaq rispan tarirurqa Galilea lamar quchapa patanpi runakunaman yachachichkaqta.

Chaymi runakunapa chawpinta yaykuruspa qunqurakuykuspan Jesusta nirqa: ‘Warmi churillaymi pasaypaqta unquchkan. Ama hina kaspaykiyá hampiykapullaway’, nispa. Hinaptinmi Jesusqa Jairowan kuska chaylla rirqa. Chaypi kaq runakunapas paykunatam qatikurqaku. Chayna richkaspankum ñanllapiraq tuparurqaku Jairo maskaq runakunawan. Chaymi runakunaqa Jairota nirqaku: “¡Warmi churikiqa wañukunñam! ¿Imapaqñataq yachachikuqpa umantaqa nanachinki?”, nispa.

Chaytaqa Jesuspas uyarirqam. Chaymi Jairomanta llakirikuspan nirqa: “Ama llakikuychu, iñiylla-iñiyqa, hinaptinqa payqa kawsanqam”, nispa. Chaynapim wasiman chayanankukama hinalla rirqaku. Chayaruptinkuñataqmi llapa runakuna warmacha wañukusqanmanta waqachkasqaku. Hinaptinmi Jesus nirqa: “Amaña waqaychikchu, payqa manam wañusqachu kachkan aswanqa puñuchkanmi”, nispa.

Chaynata niruptinmi runakunaqa Jesusmanta asikuyta qallaykurqaku. ¿Imanasqataq Jesusqa nirqa “puñuchkanmi” nispaqa?... Wañukuyqa miski puñuy hinalla kasqanraykum. ¿Imatataq chay nisqanwan runakunaman yachachiyta munarqa?... Diospa atiyninwanqa puñuymantapas rikchachichkaq hinalla runakuna kawsarichiy atisqantam.

Jesusqa llapa runakunatam wasimanta hawa lawman lluqsirachirqa. Hinaspanmi warmapa tayta-mamanwan, Pedrowan, Santiagowan hinaspa Juanllawan wasi ukupiqa karqa. Hinaspanmi warmachaman asuykuspan makinmanta hapispa nirqa: “Sipascha, ¡hatariy!”, nispa. Hinaptinmi warmachaqa kamaslla hatariruspan puriyta qallaykurqa. Chaymi tayta-mamanpas anchata kusikullarqaku (Marcos 5:21-24, 35-43; Lucas 8:40-42, 49-56).

Hinaptinqa, sichum chay warmachata Jesus kawsarirachispanqa, ¿kawsarichiyta atinmanchu wakin runakunatapas?... ¿Iskayrayachwanchu hamuq punchawkunapi chay ruwananmanta?... Manam. Chayraykum kikin Jesus nirqa: ‘Tiempom chayamuchkanña sepulturapi llapallan kaqkuna qayasqayta uyarispa kawsarimunankupaq’, nispa (Juan 5:28, 29).

¿Jesusqa munachkanmanchu wañuqkuna kawsarichiyta?... Arí. Chaymanta yachanapaq rimarisun Nain llaqtapi Jesuspa ima ruwasqanmanta. Yachasuntaqmi runakunapa piyninpas wañukuptin Jesuspa ancha llakikusqantapas.

Achkallaña runakunam Nain llaqtamanta richkarqaku qari warmapa ayanta pampaq. Chay warmapa mamanqa viudaña kaspanmi sapachallan qari wawan wañukusqanmanta amiy-amiyta waqallachkarqa. Chaymi riysiqnin runakunapas sunqun tiyaykachiyta munaspankupas mana atirqakuchu.

Chay punchawqa Jesuspas qatiqninkunawanmi Nain llaqtaman richkarqaku. Chaymi llaqtaman yaykuykuypi chay runakunawan tuparurqaku. Hinaptinmi Jesusqa chay waqallaq warmita rikuruspan yaqa waqanayanankama paypas llakirikururqa.

Chaymi yanapaykuyta munaspan ancha kuyakuywan nirqa: ‘Amaña waqallaychu’, nispan. Hinaspam wañukuqman asuykurqa, hinaptinmi llapa runakuna Jesusta qawarayarqaku ima ruwananta yachayta munaspanku. Jesusñataqmi wañukuqta nirqa: “Mozo, ñuqam niki: ¡Hatariy!”, nispa. Chaymi mozoñataq chaylla hatariruspan rimayta qallaykurqa (Lucas 7:11-17).

¡Maynatachá wañukuqpa mamanqa kusikullarqa! ¿Ima niwaqtaq pipas kuyasqayki kawsariramuptin?... Arí, kusikunkim. Hinaptinqa, Jesuspa chay warma kawsarichisqanqa, ¿manachu qawachin runakuna kuyasqanta hinaspa yanapay munasqanta?... ¡Mayna kusikuypaqchá kanqa hamuq punchawkunapi kawsarimuqkunawan tupaykuypas! (2 Pedro 3:13; Apocalipsis 21:3, 4).

Wakin kawsarimuqkunaqa kanqaku riqsisqanchik runakunawan warmachakunam. Chaymi paykuna kawsarimuptinkuqa chaylla riqsiykuspa tupaykusunchik, Jairopas chaynam warmachanwan tupaykurqa. Ñawpa watakunapiraq wañukuq runakunatapas Diosqa kawsarichinqam.

¡Mayna kusikuypaqmi Jehova Diospa hinaspa churin Jesuspa kuyawasqanchikmanta yachayqa! ¿Aw?... Paykunaqa munankum wiña-wiñaypaq kawsakunanchikta.