Allinta ‘uyariy’

UYARIYQA ancha allinmi sumaqta yachananchikpaq, wakinpiqa wañuymantapas librawachwanmi. Egipto nacionmanta Jehova Dios llaqtanta manaraq librachkaspanmi Moisesta kamachirqa Israel casta ancianokunaman willananpaq, Diospa angelnin piwi wawakunata mana wañuchinanpaq imakuna ruranankumanta (Ex. 12:21-23). Chaynallataqmi ancianokunapas sapa familiaman willarqaku. Chay willakuy qellqasqa mana kasqanraykum runakunaqa allinta uyarinanku karqa. ¿Kasukurqakuchu? Bibliam nin: “Moisesmanwan Aaronman Tayta Diospa kamachisqanpi hinamá Israelpa llapallan mirayninkunaqa rurarqaku”, nispa (Ex. 12:28, 50, 51). Chayraykum Israelpa mirayninkunaqa admirakuypaq librasqa karqaku.

Kunanpas aswan admirakuypaq librawananchikpaqmi Diosqa preparawachkanchik, chaymi huñunakuykunapi yachachiwasqanchikkunata allintapuni uyarinanchik. ¿Yanapasuchkankichu huñunakuypi yachachikuykuna? Chaypaqqa atencionwanmi uyarinayki.

¿Yuyachkankichu huñunakuypi yachachikuykunata? ¿Sapa semanachu yuyaymananki yachasqaykikunawan imaynata yanapachikunaykipaq otaq runamasikiman imaynata yachachinaykipaqpas?

Sonqoykita preparay

Huñunakuykunapi yachachikuykunawan allinta yanapachikunapaqqa sonqonchiktam preparananchik. Sonqonchikta preparanapaq ancha allin kasqantam qawachin Juda nacionpa reynin Josafatpa tiemponpi pasasqanmanta willakuy. Josafatmi Dioslla yupaychasqa kananta munaspan ‘chinkarachirqa Juda law moqokunapi capillakunata chaynataq Asera sutiyoq mamachakunatapas’, chaymantapas kamachirqam jefekunata, Leviy castakunata hinaspa sacerdotekunata Diospa Kamachikuyninkunamanta Juda nacionpi llapallan runakunaman yachachinankupaq. ‘Chaywanpas moqokunapi capillakunaqa manam chinkarqachu’ (2 Cron. 17:6-9; 20:33). Taytachakunata chay sitiokunapi unayña yupaychaspankum Jehova Diostaqa yanqalla yupaycharqaku, chaymi taytachakuna yupaychaytaqa mana saqerqakuchu.

¿Imanasqataq chayna karqa? Bibliapa nisqanman hinam paykunaqa ‘abuelonkupa Diosninpiqa manaraq tukuy sonqonkuwanchu iñirqaku’, huk rimaypiqa manam sonqonkuta prepararqakuchu. Judiokunaqa yachachisqankutam uyarirqaku, ichaqa manam kasukurqakuchu. Jerusalenpi temploman rispa Diospaq ofrenda apay sasa kasqantapaschá piensarqaku. Imayna kaptinpas iñiyninkum mana kallpancharqachu.

Satanaspa munaychakusqankuna hina mana rikurirunapaqqa sonqonchiktam preparananchik Jehova Diospa yachachikuyninta entiendenapaq. ¿Imaynata? Chaypaqqa Diostam mañakuna yachachikuyninkunata tukuy sonqonchikwan chaskinanchikpaq (Sal. 27:4; 95:2). Chaynata ruraspaqa iñiqmasinchikkunapa yachachiwasqanchiktam chaninchasun, pantaq kaptinkupas Diosmi paykunata valekun llaqtanpi kaqkunata yachachinanpaq. Chaymantapas Jehova Diostam agradecekusun mosoq yachachikuykuna yachachiwasqanchikmanta hinaspa yachasqanchikkunata astawan chaninchanapaq yanapawasqanchikmantapas. Paypa lliw kamachikuyninta kasukuyta munaspanchikmi kaynata mañakunchik: ‘Dios Taytalláy, munasqaykiman hina kawsaytayá yachachillaway. Qamtaña respetanaypaqyá iskayrayaq sonqoyta hukllawaykuy’, nispa (Sal. 86:11).

Atencionwan uyariy

Tukuy imakunam atencionwan uyarinanchikta sasachawachwan. Kanmanmi llakisqa kasqanchik, imanchikpas nanawasqanchik otaq huñunakuykunapi ima bullapas. Tayta-mamakunapas warmachankuwanmi sasachakunku. ¿Imataq yanapawachwan huñunakuypi yachachikuykunata atencionwan uyarinapaq?

Yachachimuqta qaway yachachisqanta allinta entiendenaykipaq. Leenapaq nisqan textokunatapas maskaspayki leey yachasqaykiña kaptinpas. Qepapi ima bullaña kaptinpas kallpanchakuy ama muyurinaykipaq. Qawaykachakuspaykiqa manam allintachu entiendenki yachachimusqantaqa.

Atencionwan uyarichkaptiki ima ‘pensamientopas intusuptikiqa’ Jehova Diosta mañakuy hawkayayta qosunaykipaq (Sal. 94:19; Filip. 4:6, 7). Yanapasunaykipaqqa hayka kutikamapas mañakuwaqmi (Mat. 7:7, 8). Huñunakuyninchikqa Jehova Diospa qowasqanchik regalom, payqa munanpunim chay huñunakuykunawan yanapachikunanchikta (1 Juan 5:14, 15).

Yachachisqankuta uyarispa

Yachachikuykuna uyarisqaykimantaqa yuyankipaschá yuyanapaq kaqkunata. Ichaqa manam munasqanchik kaqkunallata umanchikpi takyananpaqchu uyarinanchikqa. Yachachikuyta uyariyqa viajachkaq hinam; viajaspaqa sumaq sitiokunatam qawanchik, chayna kaptinpas mayman hinaspa imaman risqanchikmi aswan allinqa. Chaynam yachachiqpas uyariqninkunata pusachkaq hina yanapan mayman rinankupaq otaq yachachisqanta kasukunankupaq.

Israelitakunaman Josueypa nisqanmantayá yachasunchik (Jos. 24:1-15). Josueyqa munarqam Jehova Diosllata israelitakuna yupaychanankuta hinaspa hichpankupi kaq nacionkunapa taytacha-mamachankuta qepanchanankuta. ¿Imanasqa? Chay tiempopi pantasqa religionkuna achkallaña kasqanraykum hinaspa Jehova Diospa favorninta mana yanqacharunankuraykum. Israelitakunam Josueypa nisqanmanta nirqaku: ‘[Jehova] Diosta saqeruspa taytacha-mamachakuna adoraytaqa amayá yanqallapas piensasaqkuchu ñoqaykuqa adorasaqku [Jehova] Diosllatam’, nispa. Paykunaqa nisqankuman hinam rurarqaku (Jos. 24:16, 18, 31).

Yachachikuyta uyarispaykiqa kallpanchakuy imapaq kasqanmanta cuentata qokunaykipaq. Chaypaqqa reparay rimasqankuna imamanta yachachisqanwan imayna tupasqanta hinaspa tapukuy uyarisqaykikuna imapi yanapasunaykimanta.

Tapukuykunawan kutichiykuna kaptin

Willakuq Revistamanta Estudiopi, Biblia Estudianapaq Huñunakuypi hinaspa Diosta Servinapaq Huñunakuypim wakin yachachikuyninkunapi kutichinapaq tapukuykunata rurakun.

Chay huñunakuykunaqa piwanpas parlachkawaq hinam rurakun, chaymi atencionwan uyarispaykiqa allinta yanapachikunki. Allinta uyariy imakunamanta yachachisqanta hinaspa imayna yachachisqantapas. Tapusqanta umallaykipi kutichiy hinaspa wakinpa imayna kutichisqantawan imapi yanapasqanmanta rimasqankuta allinta uyariy, ichapas yachasqaykimanta aswan allintaraq entiendechisunki. Chaynapim entiendesqaykikunamanta rimarispayki hukkunatapas kallpanchanki (Rom. 1:12).

Preparakusqaykim yanapasunki huñunakuypi rimarinaykipaq chaynataq hukkunapa rimarisqanta entiendenaykipaqpas. Chay semanapaq kaq yachachikuykunata estudiayta mana atispaykiqa huñunakuypi imakunamanta yachanapaq kasqanta huk ratochallapas qawariy, chaymi yanapasunki allinta entiendenaykipaq.

Asambleakunapi

Asambleakunapim astawan sasachakuchwan atencionwan uyarinapaqqa manam huñunakusqanchik Salonllapichu. ¿Imakunataq yanapawachwan allinta uyarinapaq?

Tutam allinta puñuna. Asamblea manaraq qallarichkaptin umaykipi takyachiy chay punchawpaq yachachikuy imamanta kasqanta hinaspa yachachikuykuna imakunamanta kananta leeruspa chaypi yuyaymanay. Bibliata allinta servichikuy. Asambleaman riqkunam willakunku servichikunankupaq kaqkunata asllapi qellqasqanku atencionwan uyarinankupaq yanapasqanmanta. Vidaykipi otaq Diosmanta willakuynikipi servichikunaykipaq kaqkunata qellqay. Chaynallataq asambleaman rispayki hinaspa kutimuspaykipas chaypi yachamusqaykikunamanta rimariy. Kaykunata ruraspaykiqa yachasqaykikunatam mana qonqankichu.

Warmakunata yachachiy allinta uyarinankupaq

Cristianokunaqa wawa-churinkutam warmachallaraq kaptinkupas ‘yachayniyoq’ kanankupaq yanapanku, chaypaqmi Salonman hinaspa asambleakunaman pusanku (2 Tim. 3:15). Atencionwan uyarinankupaqmi sapakama sasachakunku, chaymi allinta tanteaspa yachachina uyarinankupaq. Qawasunyá imakuna yanapasunaykimanta.

Warmachaykikunata yachachiy wasikipi huk ratollapas hawkalla tiyaspanku qellqanchikkunata leenankupaq otaq dibujonkunata qawanankupaqpas. Huñunakuykunapiqa ama qoychu pukllanakunata. Israelitakunapa tiemponpi hinam warmachakunaqa huñunakuyman rinku uyarinankupaq hinaspa yachanankupaq (Deut. 31:12). Wakin tayta-mamaqa tanteankum estudiasqanchik qellqakunata warmachankuman qonankupaq. Wiñasqankuman hina warmaykikunata yachachiy kikinku preparakuspa huñunakuypi rimarinankupaq.

Jehova Diosta kasukunapaqqa allintam uyarinanchik, chaytam Bibliaqa sutillata qawachin israelitakunaman kayna nisqanpi: ‘Kawsayta otaq wañuyta otaq bendecisqa kayta otaq ñakasqa kayta akllakuspaqa, [. . .] kawsakuytayá akllakuychik. Yupaychasqanchik Tayta Diosta kuyaspayá kasukuychik [otaq uyariychik] hinaspayá paymantaqa amapuni kacharikuychikchu’, nispa (Deut. 30:19, 20). Kay tiempopipas Jehova Diospa yachachiwasqanchikta uyarispam kasukunanchik, chayta ruraspallam favornintawan wiñay kawsaytaqa chaskisunchik. Chaypaqqa Jesuspa nisqanman hinam allinta otaq ‘sumaqta uyarinanchik’ (Luc. 8:18).