Escuelapi tupasusqaykita preparakunaykipaq

ESCUELAPI leenaykipaq, demostracionta ruranaykipaq hinaspa discursota qonaykipaq nisusqaykiqa yanapasunkim Dios serviynikipi ñawparinaykipaq, chaynata kallpanchakuptikiqa sutillam ñawparisqayki qawakunqa (1 Tim. 4:15). Escuelaqa yanapasunkim allin yachachiq kanaykipaq.

¿Manchapakunkichu iñiqmasinchikkunapa qayllanpi rimayta? Escuelapi unayña kaspapas lliwmi chayna tarikunchik. Chayna sientekusqaykitaqa atipawaqmi qatiqninpi kaqkunata ruraspayki. Kallpanchakuy wasikipi sapa kuti kallpawan leenaykipaq. Huñunakuykunapi sapa kuti rimariy, predicaqña kaspaykiqa sapa kuti lloqsiy, chaykunata ruraspaykim runakunapa qayllanpi mana manchakuspa rimayta yachanki. Chaymantapas escuelapi tupasusqaykita tiempowan preparakuspa kallpawan practicay. Ama recelaychu iñiqmasinchikkunapa qayllanpi rimaytaqa. Manaraq preparakuchkaspayki Jehova Diosta mañakuy, payqa kusikuywanmi serviqninkunamanqa chuya espiritunta qon (Luc. 11:13; Filip. 4:6, 7).

Manam chayllachu allin yachachiqña rikurirunki. Tiempopa risqanman hinam runakunapa qayllanpi allin rimayta otaq allin yachachiyta atinki (Miq. 6:8). Escuelapi chayllaraq kaspaykiqa manam chayllachu admirakuypaq discursota qonki. Allinta rimanaykipaq ima nisusqaykipi kallpanchakuy hinaspa kay libropi chayta estudiay. Atispaykiqa manaraq yachachichkaspa practicanaykipaq kaq tareata ruray. Chayta ruraspaykiqa runakunapa qayllanpi allin yachachiqmi kanki.

Leenaykipaq tupasuptiki

Iñiqmasinchikkunapa qayllanpi leenapaq preparakuyqa manam allinta leeyllachu aswanqa leesqanchikta entiendeymi. Haykapi leenaykipaq yachaspaykiqa chay leenaykipaq kaqta entiendespa chaylla practicay. Kallpanchakuy imamanta leesqaykita entiendeypi chaynataq sapa parrafo imamanta yachachisqantapas, chaynata ruraspam sentimientowan leespa imam kaqta entiendechinki. Mayqen palabratapas mana entiendespaykiqa hukkunata tapukuy yanapasunaykipaq. Allinta entiendey imamanta leesqaykita. Ichapas tayta-mamakunaqa wawa-churinkuta yanapanmanku chaykunata ruranankupaq.

¿Nisurqankichu Bibliapa mayqen textonta otaq Willakuq revistapa parrafonkunata leenaykipaq? Chaykuna grabasqa kaptinqa otaq allin leeq iñiqmasikiwan leechikuspaykiqa allinmi kanman imayna leesqanta, puntonkunapi hinaspa comankunapi sayasqanta uyariyniki chaynataq ima palabratapas kallpawan leesqanta, allillamanta otaq apurawman hinaspa sentimientowan leesqanta uyariynikiqa.

Discursoykita manaraq preparachkaspa imapi kallpanchakunaykipaq nisusqaykimanta kay libropi qaway, yachachinaykipaq kaqta achka kutikama practicaruspapas atikuptinqa chay nisusqaykita kaqllamanta leespa allinta servichikuy.

Chayna practicasqaykiqa predicacionpim yanapasunki, chaypiqa runakunapa qayllanpim achka kutita leenchik. Runakunapa vidanta Diospa Palabran cambiaq kasqanraykum allinta leenanchik (Heb. 4:12). Huñunakuypi chayllaraq otaq iskay kutikamaña leesqaykiwanqa ama piensaychu experienciayoq hinaña leesqaykitaqa. Apostol Pablopas experienciayoq ancianotam nirqa: ‘Diospa palabranta huñunakuypi leenaykipaq hinalla kallpanchakuy’, nispan (1 Tim. 4:13).

Demostracionta ruranaykipaq nisuptiki

¿Imaynatam demostracionta rurawaq?

Kaykunapi reparaspaykim: 1) imamanta yachachisqanpi; 2) maypi hinaspa piman yachachisqanpi; 3) kay libropa mayqen yachachikuyninpi nisqanman hina ruraspa.

Imamanta rimanaykipaq nisusqaykiwan tupaq yachachikuykunata maskay, ichaqa manaraq llapanta preparakuchkaspa piensay maypi hinaspa piman yachachinaykipaq, chaymi yanapasunki mana sasachakuspalla chayta ruranaykipaq. Nisusqaykita, ¿maypi hinaspa piman yachachinaykipaq hinataq preparakunki? ¿Qawachinkichu reqsisqayki otaq chayllaraq tupasqayki runaman imayna predicasqaykita? ¿Mayornikichu icha sullkaykichu predicasqayki runaqa? ¿Ima ninmantaq chay akllasqayki yachachikuymanta? ¿Yaqachu chaymanta yachanmanña? ¿Ima rurananpaqtaq yanapayta munanki? Kay tapukuykunata kutichisqaykim yanapasunki allinta preparakunaykipaq.

¿Ima qellqapitaq maskawaq rimanaykipaq nisusqaykita? Leey kay libropa 33-38 paginankunapi “Imamantapas allintaraq yachay” nisqa yachachikuyta hinaspa kapusuqniki qellqaykikunata servichikuy. Yaqa sapa kutim tarinki yachachisqaykiwan tupaq achka yachachikuykunata, chaymi yachachinaykipaq kaqkunallata leenayki. Imayna yachachinaykipaq hinaspa piwan rimanaykipaq tantearuspaykiqa yachachinaykipaq kaqkunallata akllay.

Rimanaykipaq kaqta ordenninpi manaraq churachkaspa hinaspa mayqen yachachikuykunatapas servichikunaykipaq manaraq akllachkaspa imapi kallpanchakunaykipaq nisusqaykita leey hinaspa chaypi kaq consejokunapa nisqanman hina ruray.

Allinmi sientekunki imayna preparakusqaykiman hina rimanaykipaq kaqta tiempollanpi tukuspaykiqa, tiempoyki tukuruptinqa sutillatam willasunki. Predicaspaqa manam hayka tiempo rimanapaqqa tanteanchikchu. Demostracionta ruraspaqa tiempollanpim tukunanchik, chayna kaptinpas kallpanchakuy yachachisqayki allin kananpaq.

Imayna ruranaykipaq kaqta qellqay. Qaway 82 kaq paginapi listata hinaspa akllay predicacionpi servichikunaykipaq hina chaynapi cheqaptapas yachachichkawaq hina ruranaykipaq. Escuelapi unayña kaspaykiqa demostracionta ruranaykipaq preparakusqaykikunata servichikuy predicacionpi allinta yachachinaykipaq.

Escuelata dirigeq anciano imayna ruranaykipaq nisuptikiqa kallpanchakuy chayman hina ruranaykipaq. Rimanaykipaq tupasusqaykiqa yaqa llapanpim rurakun imayna predicanapaq hina. Imayna rimanaykipaq nisusqaykiman hina rurayta mana yachaspaqa escuelapi unayña kaqkunata tapukuy, nisusqayki yanapasuptikiqa tanteawaqmi imayna ruranaykipaq. Chaynata ruraspaykim escuelapa yanapayninwan allin yachachiq kanki.

Escuelapi discurso qoqkuna

Qarikunatam ninku pisi tiempollapi discurso qonankupaq. Paykunapas servichikunmankum 82 paginapi kaq listata. Qarikunaqa huñunakuypi kaqkunata qawaspam yachachinku.

Allinmi kanman huñunakuqkunapi piensaspa preparakuynikiqa, chaypi kaqkunam atencionwan uyarinqaku Bibliamanta yachachisqaykita. Yachankuñapaschá imamanta yachachinaykipaq kaqtaqa, chaymi chaykunapi piensaspa kallpanchakunayki discurso qosqaykiwan yanapanaykipaq. Tapukuy: “¿Imaynatataq kay yachachikuyta servichikuyman ñoqapas chaynataq huñunakuypi kaqkunapas Jehova Diostawan sumaq kayninkunata chaninchanaykupaq? ¿Yachachisqaypi qawachinichu Jehova Diospa munaynin imam kasqanta? ¿Imaynatataq kay yachachikuy yanapawachwan kay mana allin mundopi allinta tanteakunapaq?”, nispa (Efes. 2:3). Kay tapukuykunata kutichinapaqqa allintaraqmi yachana. Bibliata servichikuspaykiqa ama leeyllachu leey aswanqa piensarichiy chay yachachisqaykiwan imapi tupasqanta qawachispa (Hech. 17:2, 3). Preparakuspaqa ama achka yachachikuykunataqa akllaychu aswanqa yuyanaykipaq kaqkunallata ordenninpi qellqay.

Escuelapi tupasusqaykita preparakusqaykiqa manam yanqapaqchu. Kallpawan rimaspa ensayay. Runakunapa qayllanpi allinta rimanaykipaq nisusqaykikunata estudiasqaykiqa yanapasunkim allin yachachiq kanaykipaq. Escuelapi unayña otaq chayllaraq kaspaykipas allinta preparakuy convencisqa hinaspa sentimientowan yachachinaykipaq. Ama qonqaychu, escuelapi leesqaykiqa, demostracionta rurasqaykiqa chaynataq discursota qosqaykiqa Jehova Diostam hatunchan (Sal. 150:6).