Imapi yanapasqanta qawachinapaq

UYARIWAQNINCHIK chullalla otaq achka kaptinpas yachachisqanchik paykunata imayna yanapasqanpim piensana, manam kikillanchikpaq allin kasqanpichu. Yachachisqanchikqa ancha valorniyoqmi, ichaqa imapi yanapasqanta mana entiendechiptinchikqa manam atencionwanchu uyariwasun.

Huñunakuypipas chaynam kanman. Huñunakuypi kaqkunaqa atencionwanmi uyariwasun mana yachasqanku experienciamanta otaq rikchanachiymanta willaptinchikqa. Ichaqa manapaschá atencionwanchu uyariwasun yachasqankumantaña rimaptinchikqa otaq yachasqankumanta imam kaqta mana yachachiptinchikqa. Willasqanchik imaynata hinaspa imapi yanapasqantam qawachina.

Bibliam kallpanchawanchik imatapas yachaywan ruranapaq (Prov. 3:21). Bautizaq Juanmi Diospa kamachisqanman hina runakunata kasukunankupaq kallpancharqa (Luc. 1:17). Yachayniyoq kanapaqqa Diostam respetana (Sal. 111:10). Yachayniyoq kayqa runakunatam yanapan imayna kawsanankupaq chaynataq hamuq tiempopipas wiñay kawsayta haypanankupaq (1 Tim. 4:8; 6:19).

Allinninkupaq kasqanta qawachiy. Discursoykiwan yanapayta munaspaqa manam yachachinaykipaq kaqkunallapichu piensanayki, aswanqa uyarisuqnikikunapim. Qawariy sapakamata otaq sapa familiata. Ichapas kanman warmakuna, mozo-sipaskuna, yuyayniyoqkuna chaynataq yuyaqkunapas. Kanmanpaschá huñunakuyman chayllaraq hamuqkuna otaq Diosta unay wataña serviqkunapas. Yaqapaschá wakinqa Dios serviyninkupi allin takyasqaña kanku, wakinñataq kay pachapi mana allin kaqkunawan sasachakunkuraq. Chaymi tapukuwaq: “¿Imaynatam kay yachachikuywan uyariwaqniykunata yanapayman? ¿Imaynatam entiendechiyman ima niy munasqayta?”, nispa. Chaypaqqa huñunakuypi kaqkunapi piensay, hinaspa tanteay pikunata astawan yanapanaykipaq kasqanpi.

Yachasqankumantaña discursota qonayki kaptinqa, ¿imaynatam yanapawaq astawan entiendenankupaq? Chay yachasqankumanta mana iskayrayanankupaq astawan kallpanchaspam. ¿Imaynata? Bibliapa nisqanman hina astawan entiendechispa. Chaymantapas chay yachasqankuta astawan chaninchanankupaqmi yanapawaq Bibliapa wakin yachachikuyninkuna Diospa sumaq kayninkunawan imayna tupasqanmanta qawachispa. Willawaqtaqmi hukkunata chay yachasqanku imayna yanapasqanmanta chaynataq hamuq tiempota imayna qawasqankumantapas.

Yachachisqayki imapi yanapasqanmanta rimayta tukunallaykipaqña qawachiynikiqa manam allinchu kanman. Qallariymantapacham uyarisuqnikikunaqa piensananku: “Kayqa ñoqapaq hinam”, nispa. Discurso qosqaykipi chaynataq tukunallaykipaqña kasqanpipas hinalla qawachiy yachachisqaykikuna imanasqa allinninkupaq kasqanta.

Uyarisuqnikikunata yachachisqayki imayna yanapasqanta qawachispaykiqa Bibliapa nisqanman hina ruray. ¿Imaynatam chayta rurawaq? Paykunapi reparaspam tukuy sonqoykiwan yanapanayki (1 Ped. 3:8; 1 Juan 4:8). Tesalonica congregacionpi sasa allichanapaq sasachakuykuna kaptinpas iñiqmasinkuna Dios serviyninkupi kallpanchakusqankutam apostol Pabloqa repararqa. Chaymantapas confiarqam chay sasachakuykunata allichay munasqankupipas (1 Tes. 4:1-12). Chayna rurasqanqa qatipakunapaqmi.

¿Kallpanchaytachu munanki astawan predicanankupaq hinaspa yachachinankupaq? Tukuy sonqonkuwan chayta ruranankupaq kallpanchay. Ichaqa reparanaykim atisqankuman hina sapakama tukuy sonqonkuwan kallpanchakusqankupi, chaytam Bibliaqa sutillata willawanchik (Mat. 13:23). Yachachispaqa manam iñiqmasinchikkunata hukmanyachinapaqchu yachachina. Hebreos 10:24 nisqanpim kallpanchawanchik ‘kuyanakunapaq hinaspa allin ruraq’ kanapaq. Kuyakuq kanankupaq yanapaptinchikqa tukuy sonqonkuwanmi allin kaqkunata ruranqaku. Jehova Diosqa manam munanchu tanteasqanchikman hina pitapas obligananchiktaqa aswanqa munanmi ‘iñispa kasukunankupaq’ kallpanchananchikta (Rom. 16:26). Chaymi yachachispaqa iñiyninkupi kallpanchasqa kanankupaq yanapana.

Allinninkupaq kasqanta entiendechiy. Predicaspanchikqa Diosmanta allin noticiakuna imanasqa allinninkupaq kasqantam entiendechinanchik. Chaypaqqa predicasqanchik lawpi runakuna imayna tarikusqankupim reparana. ¿Imaynatam reparachwan? Chaypaqqa servichikuchwanmi uyarisqanchik noticiakunata. Chaymantapas uyariwaqninchikkunatam rimanankupaq kallpanchana hinaspam ima nisqankutapas allinta uyarinanchik. Ichapas sasachakuypi tarikunku: onqosqankuwan, llamkay mana kaptin, arriendomanta paganapaq qollqe mana kaptin, familiapi pipas wañukuptin, warmanku mana kasukuptin, autoridadkuna mana allinta ruraptinku chaynataq qosanmanta otaq señoranmanta rakikusqankuwanpas. ¿Yanapanmanchu Bibliapa yachachisqankuna? Arí, yanapanmanmi.

Yaqapaschá piwanpas manaraq rimachkaspayki imamanta rimanaykipaq tantearunkiña. Uyarisuqniki imamanta yachay munasqanpi reparaspaqa chayman hina yachachinaykipaq kallpanchakuy, mana atikuptinqa yapapi kutispa chaymanta willanaykipaq niy. Bibliapa yachachisqankunawan yanapayta munaspanchikpas manam chapukunachu ima asuntonkupipas (2 Tes. 3:11). Allintam uyariwasun paykunata yanapaqnin yachachikuykunamanta willaptinchikqa.

Yachachisqanchik imapi yanapasqanmanta mana musyaspanqa manam uyariwasunchu. Uyariwaptinchikpas imapi yanapasqanta mana entiendechiptinchikqa willasqanchikmi yanqapaq kanqa. Willasqanchik imapi yanapasqanta qawachiptinchikmi ichaqa vidan cambiananpaq yanapanqa.

Estudiota qospapas sapa kutim qawachina yachachisqanchikqa imanasqa allinninpaq kasqanta (Prov. 4:7). Qawachinataqmi Bibliapi consejokuna, yachachikuykuna hinaspa ejemplokuna Jehova Diospa munasqanman hina kawsanapaq imayna yanapasqantapas. Imayna yanapasqanta estudiantekunaman entiendechiptinchikqa vidankuta cambianankupaqmi yanapanqa (Is. 48:17, 18). Diosta kuyanankupaq hinaspa agradanankupaq yanapaptinchikqa kallpanchasqam tarikunqaku Bibliapa yachachisqanman hina kawsanankupaq.