Parlachkaq hina rimanapaq

PIPAS amistadninwan parlaspanqa kusisqam sientikun. Wakinqa kusisqallañam rimanku wakinñataqmi mana. Imayna kaptinpas sapa punchaw rimasqanchikman hina rimayqa ancha allinmi.

Mana reqsisqanchik runawan rimaspaqa respetowanmi rimana. Wakin llaqtakunapiqa mana reqsisqankuwan parlaspaqa ancha respetowanmi rimanku. Reqsinakusqankuman hinam ichaqa amistadninkuwan hinaña rimanmanku.

Huñunakuypi yachachispapas respetowanmi rimana. Respetowan mana rimasqaqa yachachisqanchikmi yanqachakurunman. Wakin idiomakunapiqa respetowan rimanapaq kaq palabrakunawanmi rimanku yuyayniyoqwan, profesorwan, autoridadwan otaq tayta-mamankuwan rimaspankupas (reparay Hechos 7:2; 13:16 nisqankunapi). Chaynallataqmi huk palabrakunawan rimanku qosankuwan otaq señorankuwan chaynataq amistadninkunawanpas. Congregacionpi respetowan rimaspapas manam autoridadwan parlachkaq hinachu rimananchik.

Wakinpiqa rimasqanchikmi uyarikunman pitapas kamachichkachwan hina. Chayqa kanman yachachinanpaq kaqta discurso qoq imayna qellqasqa kasqanman hina rimaptinmi. Qellqasqanchikman hina rimayqa manam parlachkaq hina rimaychu. Discurso qoqkunaqa qellqanchikkunamantam yachachinankupaq kaqta preparakunku, wakinpiqa yachachinankupaq kaqtam qellqasqataña chaskinku hinaspam chayman hina preparakunku. Imayna qellqasqa kasqanman hina rimaspaqa manam piwanpas parlachkaq hinachu rimanchik. Yachachispaqa entiendesqaykiman hina rimay ichaqa ama sasa rimanapaq kaq palabrakunawanchu.

Sasachanmantaqmi mana samaykuspa derechollata rimasqanchikpas. Piwanpas parlaspaqa imamantapas rimasqanchikman hinam upallaykuspa otaq samaykuspa rimanchik.

Achka runakunapa qayllanpi rimaspaqa parlachkaq hina rimaspapas uyarisuqnikikuna atencionwan uyarinankupaqmi kallpawan hinaspa kusisqa rimanayki.

Predicaspapas sapa punchaw imayna rimasqaykiman hina rimanaykipaq kallpanchakuy. Chaypaqqa manam ancha educacionniyoqraqchu kanayki. Piwanpas parlachkaq hina rimaspa yachachinaykipaqqa qatiqnin yachachikuykunapi reparay.

1. Ama rimaychu Diosta mana serviq runakunapa rimasqanman hinaqa. Colosenses 3:8 nisqanpim consejawanchik mana allin rimayta otaq qacha rimayta mana rimananchikpaq. Sapa punchaw imayna rimasqaykiman hina rimaspapas respetowanmi rimanayki.

2. Yachachispaykiqa ama sapa kutichu rimay hina kaq palabrakunallawan. Kallpanchakuy huk palabrakunawanpas yachachisqaykita entiendechinaykipaq.

3. Manaraq rimachkaspa imamanta yachachinaykipaq kaqpi reparay, chaynata ruraspaqa manam yapa-yapamantachu hina kaq palabrakunallawan rimanki.

4. Aswan allinnin kaq yachachikuymanta entiendechinaykipaqqa ama llumpayta rimaychu, aswanqa pisi rimayllawan yuyanankupaq kaqta entiendechiy.

5. Respetowan rimay.