Rimasqanchikman hinalla rimanapaq

IMAYNA rimasqaykiman hinalla rimaptikiqa uyarisuqnikikunapas mana iskayrayaspam uyarisunki. ¿Allinpaqchu hapiwaq pipas hawa sonqolla rimapayasuptiki? Sumaqllataña rimapayasuptikipas manachá allinpaqchu hapiwaq. Chaynallataqmi rimasqaykiwanpas kanman pitapas qatipakuchkaq hina rimaptikiqa.

Ichaqa rimasqaykiman hinalla rimaspapas manam llutantachu rimanayki; kallpanchakunaykim, allinta, imam kaqta, clarota chaynataq respetowan rimanaykipaq. Qawachinaykitaqmi respetoyoq kasqaykita imayna rimasqaykiwan chaynataq imayna kasqaykiwanpas. Manataqmi hatuntukunaykichu imayna rimasqaykiwanqa.

Predicaspa. ¿Manchapakunkichu predicanaykipaq pimanpas asuykuspa otaq wasi punkuman chayaruspa? Yaqa llapanchikmi chayna sientekunchik. Chayna sientekusqanchikqa sutillam kanman imayna rimasqanchikpi otaq makinchikpas moqonchikpas katkatatasqanpi.

Manchapakusqanchikqa kaykunamantam kanman. Ichapas piensachwan predicasqanchikta uyariwaqninchikkuna allinpaq otaq mana allinpaq hapisqankuta. Chaykunapi reparayqa manam imananchu, llumpayta chaykunapi piensaymi ichaqa mana allinchu kanman. ¿Imatataq rurawaq predicanaykipaq manchapakuspaqa? Manaraq lloqsichkaspa allinta preparakuy hinaspa Jehova Diostapas mañakuy (Hech. 4:29). Yuyaymanay Paraisopi manaña onqospa wiñaypaq kawsananchikta kuyapayakuq Dios munasqanpi. Yuyaymanaytaq Diosmanta yachay munaq runakunata yanapanaykipaq kasqanpipas.

Yuyanaykitaqmi runakunaqa Diosmanta uyarinankupaq otaq mana uyarinankupaq kikinku tanteakuq kasqankuta. Jesuspa predicasqantapas manam lliw runakunachu uyarirqaku. Predicanapaq kamachisqa kasqanchikraykum hinalla predicananchik (Mat. 24:14). Wasiyoq mana uyarisuptikipas watukusqaykiwanqa Diosmantam willakuchkankiña. Chay rurasqaykiqa manam yanqapaqchu kanqa, Jehova Diospa Munayninta rurasqaykiqa paypa agradonpaqmi. Predicasqaykita pipas uyariptinqa, ¿imaynatataq rimawaq? Runamasikipa yachay munasqanpi reparaspaqa mana manchapakuspam allinta rimanki.

Predicaspaykiqa imayna rimasqaykiman hinalla rimay hinaptinmi uyarisuqnikikunaqa allinta uyarisunki. Ichapas astawan uyariyta munanqaku Bibliapa nisqanman hina willasqaykita. Qamlla rimanaykimantaqa uyarisuqnikipas rimarinanpaqyá kallpanchay. Amistadnin hina rimapayay hinaspa paypi reparasqaykita qawachiy chaynataq rimarisqanmantapas agradecekuy. Respetowan imayna rimasqankuman hinataqmi rimanayki. Ichaqa kusisqa rimanaykipaqmi kallpanchakunayki.

Discursota qospa. Uyarisuqnikikuna aslla kaptinqa piwanpas rimachkaq hinalla rimay, achka kaptinqa kallpawan rimay. Discursota umallaykimanta qonayki kaptinqa otaq rimanaykipaq qellqasqaykikuna achka kaptinqa chayman hina rimanaykipaq piensasqaykiwanpaschá sasachakunki. Imayna rimanaykipaq qellqasqayki allinpaq kaptinpas, chaykunapi llumpayta reparaspaqa manañam sonqoykimantachu rimawaq. Imayna rimaykunawan rimanaykipaq piensanaykimantaqa imamanta yachachisqaykipim reparanayki.

Chaynallataqmi kanman imamantapas willakunankupaq huñunakuypi pitapas tapuptinkuqa. Contestanaykipaq kaqtaqa allinta tanteay, ichaqa ama qellqaychu. Imayna rimasqaykiman hinalla sonqoykimanta contestay.

Allin discursaq otaq allin rimaq kaptikipas imayna rimasqaykiman hinalla mana rimaptikiqa hukmanmi rimasqayki uyarikunman. Imam kaqta clarota rimaptikipas sonqoykimanta mana kaptinqa hukmanmi uyarikunqa. Imapas maypi kasqanmanta otaq imayna kasqanmanta makikiwan yanapachikuspa tukuy sonqomanta rimasqayki allin kaptinpas chaykunata allinta mana ruraptikiqa yachachisqaykim yanqapaq kanman. Kallpawan rimanayki kaptinqa kallpawan rimay ichaqa ama qaparichkaq hinachu. Wakinpiqa allinmi kanman tukuy sonqoykimanta ganaswan rimayniki ichaqa ama alabakuchkaq hinachu. Kallpanchakuy ganaswan allinta hinaspa sonqoykimanta rimanaykipaq, ichaqa ama hukkuna alabasunaykipaq hinachu nitaq uyarisuqnikikunata hukmanyachinaykipaq hinachu.

Wakin iñiqmasinchikqa sumaq rimaytam yachanku, wakinñataqmi imaynanpatapas rimanku hukkunapa rimasqanman hina. Chayna kaptinpas cristianoqa sapa punchawmi allinta rimana. Chaynata ruraspaykiqa discursota qospapas imayna rimasqaykiman hinam allinta rimanki.

Huñunakuypi leenapaq. Huñunakuypi allinta leenapaqqa kallpanchakunam. Leenaykipaq kaqpi reparay mayqenkuna aswan allinnin kaq yachachikuykuna kasqanpi hinaspa yachachikuykuna imayna tupasqanpipas. Chaykunapi reparaspa allinta leey. Mana yachasqayki palabrakunatañataq diccionariopi maskay otaq yachaqkunata tapukuy. Hinaspa achka kutikama kallpawan sumaqta leey uyarisuqnikikuna entiendenankupaq hina. Chaynata ruray mana pantaspa leenaykikama. Allinta entiendey imamanta leenaykipaq kaqta hinaspa piwanpas rimachkaq hina ganaswan leey. Chaynata ruraspam imayna rimasqaykiman hina leesqaykita qawachinki.

Huñunakuypi leesqanchikkunaqa yaqa llapanmi Bibliamanta horqosqa kachkan. Diosmanta Yachachinapaq Escuelapi tupawasqanchikman hina Bibliata leespapas leenchiktaqmi predicacionpi chaynataq discursota qospapas. Qarikunatam ninku Willakuq revistata leenankupaq otaq Biblia Estudianapaq Huñunakuypi leenankupaq, chaynallataqmi allin yachachiq kaqkunata ninku kimsa punchawpaq asambleapi discursota leespalla qonankupaq. Bibliapi textokunata otaq qellqanchikkunapi qellqasqaña kaptinqa ganaswan leey. Pipapas ima nisqanmanta leesqaykipi willakuptinqa tupasqanman hina paypas rimachkanman hina leey. Ichaqa ama pitapas qatipakuchkaq hinachu. Ganaswan leey ichaqa imayna rimasqaykiman hinalla.

Leesqanchikqa rimasqanchikman hinam uyarikunan, manam pitapas yachapayachkaq hinachu..