Churi-wawayuq kasqankumanta

Abrahanwan Saraqa unay watañam casarasqa karqaku. Paykunaqa Ur llaqtankupi tukuy imankuta saqispankum carpakunapiña yacharqaku. Chaywanpas Jehova Diospi hapipakusqanraykum Saraqa kusisqa tarikurqa.

Wawayuq kayta munasqanraykum Saraqa Abrahanta nirqa: “Serviqniy Agar qampata wiksayakuruptinqa wawanmi ñuqapa waway hina kanqa”, nispa. Chaynapim Agarqa Ismael sutiyuq wawata wachakururqa.

Chaymanta unay wata qipatam kimsa runakuna Abrahanta watukurqaku. Abrahanñataqmi sachapa llantuyninpi samaykachispan mikuykachirqa. Paykunaqa Diospa angelninkunam karqaku. Paykunam Abrahanta nirqaku: “Watamanqa warmiki Saram wawayuqña kanqa”, nispa. Chayta uyariruspanmi Saraqa sunqullanpi asikuspan nirqa: “¿Imaynataq kayna yuyaqqa wiksayakuyman?”, nispa. Chay wataqa 99 watanpiñam Abrahanqa karqa, Sarañataqmi 89 watanpiña.

Diospa angelninpa nisqanman hinam Saraqa wachakururqa. Chay wawatam Abrahanqa Isaacwan suticharqa, Isaac sutiqa “asikuy” ninanmi.

Pichqa watachanpi Isaac kachkaptinmi paymanta Ismael asikurqa, chayta musyaruspanmi Saraqa Abrahanta nirqa: “Qarquy Agartawan wawan Ismaelta”, nispa. Abrahanqa manam munarqachu. Jehova Diosmi ichaqa Isaac hawkalla kananta munaspan Abrahanta nirqa: “Sarapa nisqanta kasukuy. Ismaeltaqa ñuqam qawasaq, miraynikiqa Isaacllamantam hamunqa”, nispa.