Enemigonkunata Gedeon atipasqanmanta

Kaqmantam Israel runakunaqa taytacha-mamachakunata yupaycharqaku, chaymi qanchis watata Madian runakunaqa Israel runakunapa animalninkuta suwaspanku kawsayninkutapas tukuqku. Hinaptinmi Israel runakunaqa machaykunapi chaynataq urqukunapi pakakuqku. Jehova Diosñataqmi qayakusqankuta uyariykuspan Gedeon sutiyuq musuta angelninwan nirqa: “Qamtam akllayki Israel runaykunata libranaykipaq”, nispa. Gedeonñataqmi nirqa: “¿Imaynamá ñuqaqa librayta atiyman mana munayniyuq kachkaspayqa?”, nispa.

Chaymantam ichaqa Gedeonqa akllasqa kasqanmanta yachananpaq pampaman millwata churaykuspan Jehova Diosta nirqa: “Sichum paqarin sulla millwata nuyuruptin, allpañataq chakilla kaptinqa yachasaqmi akllawasqaykita”, nispa. Paqarinnintintam millwaqa nuyurusqa, allpañataqmi mana. Chaymi Gedeonqa kaqmanta Diosta nirqa paqarinnintin allpaña nuyusqa kananpaq, millwañataq chakilla kananpaq. Chay kutipipas chayna kaptinmi Gedeonqa manaña iskayrayarqachu akllasqa kasqanmanta, chaymi runankunata huñurqa Madian runakunawan peleanankupaq.

Jehova Diosmi Gedeonta nirqa: “Israel runakunataqa yanapasaqmi, soldadoykikunam ichaqa achkallaña kachkan. Yanqañataq ninmanku achka kasqankurayku kikillanku librakurusqankumanta. Chayraykuyá manchakuqkunaqa wasinkuman kutichun”, nispa. Chaymi 22.000 qarikuna kutikurqaku, hinaspa 10.000 qarikunallaña qiparurqaku. Diosqa nirqaraqmi: “Achkaraqmi kachkanku. Yakupa kasqanmanyá pusay, chaypim enemigonkunamanta qawan-qawanlla yaku tomaqkunata akllanki”, nispa. Chaymi 300 qarikunalla qawan-qawanlla yakuta tomarqaku. Jehova Diosmi nirqa paykunalla 135.000 Madian runakunata wañuchinankupaq.

Chay tutam Gedeonta Dios nirqa Madian runakunawan peleananpaq. Chaymi Gedeonqa sapa soldadonkunaman qurqa waqrata utaq cornetata hinaspa achkiyuq puyñuta, hinaspam nirqa: “Ñuqapa ruwasqayta hinam qamkunapas ruwankichik”, nispa. Hinaspam Gedeonqa cornetata tocaspan apasqan puyñuta pakirurqa, chaymantapas achkita huqarispam kayman-wakman kuyuchispan kallpawan nirqa: “¡Kay guerraqa Jehova Diospa hinaspa Gedeonpam!”, nispa. Chaynallatam 300 qarikunapas ruwarqaku, chaymi Madian runakunaqa mancharisqallaña ayqikuspanku kikinkupurallaña wañuchinakurqaku. Kaqmantam Jehova Diosqa Israel runakunata libraykurqa.