¿Imaynatam hukkunata consejanki?

¿Pipas mañakusurqankichu consejanaykipaq? Ichapas tapusurqanki: “¿Imatam ruranay?”, “¿Riymanchu kay fiestaman?”, “¿Estudiaymanchu kayta?”, “¿Lloqsiymanchu paywan?”, nispa.

Yaqapaschá wakinkuqa imatapas tanteanankupaq consejanaykita mañakusurqanki. ¿Imatam servichikunki consejanaykipaq? ¿Imatam ruranki hukkunata consejaspayki? Imamantaña consejanayki kaptinpas Proverbios 15:28 nin: “Contestananpaqmi sumaqta piensan allin kawsaq runaqa”, nispa. Qatiqninpim Bibliapa nisqanman hina imayna consejanamanta 5 yanapakuykunata qawasun.

1 Imayna tarikusqanmanta allinta yachay.

‘Manaraq allinta uyarichkaspan rimaq runaqa mana tanteoyoq kasqantawan [. . .] penqaypi kasqantam qawachikun’ (PRO. 18:13).

Sumaqta consejanapaqqa allintam yachana imayna tarikusqantawan ima piensasqantapas. Rikchanachisun: sichu pipas telefonowan qayamususpayki nisunkiman wasikiman imayna chayamunanpaq, ¿imatataq puntata yachanayki allinta yanapanaykipaq? Maypi kasqanta mana yachaspaykiqa, ¿niwaqchu mayninta hamunanpaq? Manachá ¿aw? Allinta consejanapaqqa, puntatam yachana imayna tarikusqanmantawan ima piensasqanta. Chaykunamanta mana allinta yachaspaqa, yaqapaschá consejaspanchik astawan pantarachisun (Luc. 6:39).

Tapuy hayka yanapakuyta maskasqanmanta. Chaypaqqa tapuwaqmi kaykunamanta: “¿Bibliapa ima nisqankunam kaypi yanapasunkiman? ¿Imapim tukunman kayna otaq wakna tanteasqaykiqa? ¿Ima yanapakuykunatataq maskarqankiña? ¿Imatam ancianokuna, tayta-mamaykikuna hinaspa Bibliamanta yachachisuqniki nisurqanki?”, nispa.

Kay tapukuykunata kutichisqanmi yanapasunki hayka yanapakuykuna maskasqanmanta yachanaykipaq hinaspa ima consejokuna chaskisqanmantapas. Musyakunkitaqmi ichapas uyariy munasqallanta maskaspanku consejanaykipaq hamususqaykita (2 Tim. 4:3).

2 Ama chayllaqa kutichiychu.

“Qamkunaqa chaylla uyariqyá kaychik, rimaychikpas allinta tanteaspayá” (SANT. 1:19).

Manamá allinchu kanman allinninta munaspapas nisqanmanta chaylla kutichiyqa, aswanraqmi mana allinta yachachkaspaqa. Proverbios 29:20 kaynata nin: “Sonso runam aswan allinqa mana piensarispa chaylla rimaruqmantaqa”, nispa.

Diospa piensasqanman hina kananpaqqa tiempochakunaykim chaykunamanta allinta yachanaykipaq. Tapukuy: “¿Runakunapa piensasqanman hinachu consejani?”, nispa (1 Cor. 2:12, 13). Jesus ñakarispan wañunanmanta Pedro yachaspanmi kaynata nirqa: “Diospas amayá munachunchu chaykuna pasasunaykitaqa”, nispa. ¿Imatam Pedropa chayna nisqanmanta yachachwan? Allin sonqoyoq runapas mana allinta cuidakuspanqa manam Diospa piensasqanman hinachu ninman aswanqa runakunapa piensasqallantam (Mat. 16:21-23). ¡Mayna allinmi manaraq rimachkaspa piensayqa! Ama qonqasunchu, ñoqanchikpa piensayninchikmantaqa Jehová Diospa piensayninmi aswan allinqa (Job 38:1-4; Pro. 11:2).

3 Diospa Palabranpi hapipakuy.

“Manam kikillaymantachu rurani, Taytaypa yachachiwasqallantam ñoqaqa willaykichik” (JUAN 8:28).

¿Yaqachu consejanaykipaq nisuqnikita ninki: “Qam kaspayqa . . .”?, nispa. Chaylla allichanapaq sasachakuy kaptinpas, allinmi kanman Jesuspa humilde kasqanta qatipakuyqa. Payqa pimantapas ancha yachayniyoqmi karqa, chaywanpas nirqam: “Manam kikillaymantachu rimani, kachamuwaqniy Taytaymi kamachiwarqa imam rimarinaytaqa chaynataq imam yachachinaytaqa”, nispa (Juan 12:49, 50). Jesuspa yachachisqanwan consejasqanqa Taytanpa munasqanman hinam karqa.

Lucas 22:49 nisqanpim willakun presochasqa kananpaq kachkaptin, qatiqninkuna tapurqaku sichu peleanankumanta. Huk kaqninmi espadanta servichikurqa. Mateo 26:52-54 nisqanpas qawachinmi chayna sasachakuypi tarikuspanpas, Jesusqa tiempochakurqam Diospa munaynin ima kasqanta qatiqninkunaman yachachinanpaq. Jesusqa yacharqam Genesis 9:6 nisqanmanta hinaspa Salmo 22 capitulomantawan Isaias 53 capitulopa willakusqanmantapas. Chaymi allin consejokunata qorqa, hinaspam achka runakuna salvakurqa, Jehová Diospas kusikurqam.

4 Bibliamanta qellqanchikkunata servichikuy.

“Qamkunaqa allin yuyayniyoq confianza sirviente hinayá kaychik, paytam wasinpi patronnin churarqa sirvientemasinkunata imam horapi mikuchinanpaq” (MAT. 24:45).

Jesusmi allin yuyayniyoq confianza sirvienteta churarqa imam horallanpi Diosmanta yachachiwananchikpaq. Pitapas consejanayki kaptinqa, ¿tiempochakunkichu qellqanchikkunata qawanaykipaq?

Índice de las publicaciones Watch Tower hinaspa Watchtower Librarya nisqa qellqakunapim achka yachachikuykuna kachkan. Chaykunata mana qawayqa manachá allinchu kanman. Chaypim waranqantin yachachikuykuna kachkan pitapas allinta yanapanapaq. ¿Yanapankichu Bibliamanta qellqanchikkunata maskanankupaq hinaspa chayman hina piensanankupaqpas? Imaynam huk mapapas yanapakun may risqanchikman chayanapaq, chaynallataqmi qellqanchikkunapas yanapakun allinta tanteaspa wiñay kawsayman chayananchikpaq.

Achka ancianokunam iñiqmasinkuta yanaparqaku Índice qellqata otaq Watchtower Library nisqa discota imayna servichikunankupaq, chaynapi Bibliapa nisqanman hina imatapas tanteanankupaq. Chayta ruraspankuqa manam tapukuyninkupa kutichiyllantachu maskayta yachanqaku, yachanqakutaqmi kikinkumanta yachachikuykunata maskayta hinaspa Jehová Diospa qowasqanchik yanapakuykunapi confiaytapas. Hinaptinmi ‘entiendeqña kaspanku allin kaqtapas hinaspa mana allin kaqtapas reqsinqaku’ (Heb. 5:14).

5 Ama hukkunapa rantinpiqa tanteaychu.

“Sapakamam Diosman cuentata qosunchik” (GAL. 6:5).

Sapa runakunam tanteakunan mayqan consejasqanta kasukunanpaq. Jehová Diosqa sapakamatam saqewanchik kamachikuyninkunata kasukunapaq otaq manapas (Deu. 30:19, 20). Wakinpiqa Bibliapa yachachikuyninkunaqa achkallañam imapas munasqanchikta tanteanapaq, ichaqa kikinchikmi akllakunanchik. Imamanta hinaspa pi tapuwasqanchikmanta yachaspaqa, tapukuchwanmi: “¿Ñoqachu kay tapuwasqanmanta kutichinay?”, nispa. Wakintaqa congregacionpi ancianokuna kutichinapaqmi saqenanchik, warmakuna tapuwaptinchikñataqmi tayta-mamankuna kutichinankupaq saqenanchik.

[Willakuy]

[8 kaq paginapi foto hinaspa recuadro]

Familiawan Diosta Yupaychanapaq Tutapi estudianapaq

Allinmi kanman chayllaraq tapuwasqanchikmanta qellqanchikkunapi maskaspa estudiayqa. ¿Atiwaqchu tapukuyninkuta kutichinankupaq Bibliamanta qellqanchikkunata maskaspa qoyta, chaynapi kikinku tarinankupaq? Sichu huk kaqnin iñiqmasinchik tapusunkiman piwanpas casarakunanpaq reqsinakunanmanta. Hinaptinqa ichapas puntata maskawaq Índice nisqa qellqapi otaq Watchtower Library nisqa discopipas, chaypim castellanopi churawaq “Concertar citas” otaq “Matrimonio” nispa, hinaspam akllawaq lloqsimuq yachachikuykunata. Qallariyninpiqa lloqsimunqataqmi “Véase también” nisqa, chaypiqa kachkanmi chayman hina yachachikuykuna.

[9 kaq paginapi recuadro]

Jehová Diospa llaqtanpi yanapakuykuna chaskisqanchikmi yanapawanchik allin consejota qonapaq hinaspa chaskinapaqpas. Eclesiastes 12:11 niwanchik: “Yachayniyoq runakunapa nisqankunaqa tuksina puakuna hinam, paykunapa hukllaman huñuruspa nisqankuqa allin takasqa estacakuna hinam. Chaykunaqa chullalla michiqpa qosqanmi”, nispa. Animalkuna derecho purinanpaqqa ‘tuksinapaq puakunawanmi’ yanapana karqa, chaynataqmi yachaywan hinaspa kuyakuywan consejokunaqa pitapas yanapan allinta rurananpaq. ‘Allin takasqa estacakunapas’ yanapanmi imapas allin takyasqa kananpaq. Chaynallataqmi allin consejokunapas allinta takyananchikpaq yanapawanchikman. Yachayniyoqkunaqa anchatam kusikunku ‘michiqninku’ Jehová Diospa yachaywan qosqan ‘huñuruspa nisqankunapi’.

Consejota qospaqa Diospa nisqankunaman hinayá rurasun. Ancha kusikuypaqmi allinta uyarispa atisqanchikman hina consejota qoyqa. Chay rurasqanchik Bibliapa nisqanman hina kaspanqa uyariwaqninchiktam wiñaypaq yanapanqa.