QARANPI KAQ YACHACHIKUY | LLUMPAYTA MANA HUKMANYANAPAQ
Achkallañam hukmanyanku
“Huk punchawmi mikuy rantiq rispay llumpay precioyuq galletallata tarirurqani. Paqarinnintintaqa manañam imapas kasqañachu” (Paul, Zimbabue).
“Qusay saqiruwaptinmi llumpay hukmanyasqa tarikurqani. Chaymi tapukurqani wawaykuna imayna kanankumanta” (Janet, Estados Unidos).
“Alarma waqaptinmi pakakuq kallpani hinaspa bomba tuqyay tukunankamam pampaman laqakuni, tukuruptinpas hinallam katkatatani” (Alona, Israel).
Kunanqa achka sasachakuykunam kan tukupay tiempopi kawsasqanchikrayku (2 Timoteo 3:1). Achkam llakikunku qullqin mana kaptin, guerrakuna, unquykuna utaq hatun sasachakuykuna kaptinpas. Kantaqmi huk llakinchikkunapas. Wakinmi manchakunku cancer unquyniyuq kasqanta doctor niykunanmanta. Llakikunkutaqmi warmankunawan hinaspa willkankunawan hamuq watakunapi ima pasananmantapas.
Hukmanyasqa kaspaykiqa ama llakikuychu. Wakinpiqa hukmanyachwanmi manaraq examenta quspa, runakunapa qayllanpi rimaspa utaq llamkanapaq rimaq rispapas. Wakinpiñataqmi hukmanyasqa kayqa yanapawanchik mana allinkuna pasaruwananchikmanta ayqikunapaq. Ichaqa llumpay hukmanyasqa kaspaqa unquruchwanmi. Yachaysapa runakunam 68.000 runakunapi qawarqaku tumpa hukmanyasqa kayninku wañuyman apasqanta. Chayraykuchá Jesucristo tapurqa: “¿Mayqannikichiktaq afanakuspapas huk kuchusta wiñaruwaqchik?”, nispa. Llumpayta hukmanyaspaqa manam unay watataqa kawsasunchu. Chaymi Jesus kaynata nirqa: “Amayá afanakuychikchu”, nispa (Mateo 6:25, 27). Ichaqa, ¿atichwanchu llumpay hukmanyasqa kayninchikta atipayta?
Atipanapaqqa allintam tanteana, Diospa yanapakuynintam mañakuna, hapipakunanchiktaqmi tukuy niwasqanchikkunapi. Qatiqninpim qawasun Paulta, Janetta hinaspa Alonata Diospi hapipakuyninku imayna yanapasqanta. Llumpay sasachakuypi mana tarikuspapas manam nichwanchu hamuq punchawkunapi sasachakuyninchik mana kananmantaqa.