Mana hampiy atina unquywan unquptinchik

71 watanpi kaq Leonciam willakun: “Doctorkunam wasaypi hinaspa chunchulniypipas cancer unquyta tariruwarqaku, chaywanmi qalay hukmanyasqa tarikurqani. Wasiyman chayaruspaymi ichaqa nirqani: ‘Imanasaqñamá, kayna hukmanyasqalla kaspayqa astawanchiki unqurusaq, imallatapas ruwasaqyá kusirikunaypaq’”, nispa.

49 watanpi kaq Elisapas willakunmi: “Uyaymi nisyu-nisyuta nanawan, nervios unquy hapiruwasqanrayku. Wakinpiqa mana aguantay atinatam nanawan. Chaymi wakin punchawqa wañukuytaña munani kanpas”, nispa.

MANAÑA hampiy atina unquyta doctorkuna tarirusuptikiqa utaq aylluykipi tariruptinkuqa mayna llakisqachá tarikuwaq. Llakikuwaqchá imayna hampichikunaykimanta, doctorkunaman kutipayanaykimanta, chaynataq qullqimantapas. Tukuy chaykunamanta llakikuspaykiqa astawanmi unquruwaq.

¿Imatam ruwawaq chaynapi tarikuspaykiqa? Achka runakunam chayna llakipi tarikuspankuqa Diosta sapa kuti mañakurqaku chaynataq bibliatapas ñawincharqaku, chaykunam yanaparqa mana llumpay hukmanyasqa kanankupaq. Ayllunkuwan amistadninkunapas yanaparqakutaqmi.

¿IMATAM WAKIN RUNAQA RUWARQA?

58 watanpi kaq Robertom nin: “Unquspaykiqa astawanmi Diospi hapipakunayki, payqa yanapaykusunkim. Mañakuspa willakuy imayna tarikusqaykita. Atiyninta mañakuy kallpanchasunaykipaq, chaynapi aylluykirayku unquynikiwanqa mana paqway hukmanyasqa kanaykipaq”, nispa.

Robertoqa ninraqmi: “Sunquykitam kusiriykachin aylluykipa watukamusqankuqa. Sapa punchawmi mayqan ayllullaypas qayaykamuwan imayna kasqaymanta tapuykuwananpaq, amistadniykunapas qayaykamuwanmi. Chay ruwasqankum kusirichiwan”, nispa.

¿Unquq amistadnikita watukuqchu riyta munachkanki? Chayna kaptinqa, Leonciapa kayna nisqanmi yanapasunkiman, paymi nin: “Wakin unquqqa manam tukuy tiempo unquyllanmantachu rimayta munan, chaymi huk ruwaykunamanta rimawaqchik”, nispa.

Mana hampiy atina unquywan unquspanchikpas, manam hukmanyasqachu tarikusun Diospa hinaspa ayllunchikpa yanapakuyninwanqa chaynataq bibliata ñawinchaspaqa.

Bibliapa nisqankunam yanapasunki

Diospi hapipakuy

Salmo 34:4, 6 nin: ‘Diosta maskaptiymi uyariykullawarqa, tukuy manchakuyniymantam libraykullawarqa. [Ñakarispay] qayakullaptiymi uyariykamullawarqa’, nispa.

Leonciam nin: “Diostaqa mañakuni manam hampiykuwananpaqchu, aswanqa kallpata quwananpaqmi, chaynapi unquyniywan mana hukmanyanaypaq”, nispa.

Bibliata ñawinchay

Isaias 33:24 nin: ‘Manañam mayqannikichikpas ninkichikñachu: “Unquchkanim” nispaqa’.

Hamuq punchawpi imakunata Dios ruwananpi yuyaymanay. Chayqa kallpanchasunkim imawanpas mana hukmanyarunaykipaq.

Aylluykipa hinaspa amistadnikipa yanapasusqaykita chaskikuy

Proverbios 17:17 nin: ‘[Allin] amigoqa tukuy tiempom kuyakun, sasachakuy tiempopipas chiqap wawqi hinam’, nispa.

Elisam nin: “Ama sapallaykiqa kaychu. Amistadnikikuna yanapasunaykipaq nisuptikiqa amayá wischupakuychu. Wakinpiqa ninkipaschá Dios mana uyarisusqaykita, chaywanpas ama sapallaykiqa kaychu”, nispa.