Escuela de Entrenamiento Ministerial: llank’anapaq kicharikuq hatun punku
1 Profeta Jeremiaswanmi Jehová Diosqa willachiran: “Huk michiqkunatan paykuna qhawaqta churasaq, ovejakunataq mana manchakuspa llakhilla tiyanqaku, manataq chinkanqakupaschu”, nispa (Jer. 23:4). Kunanmi congregacionpi pachak waranqanpi ancianokuna michishanku llapa nacionkunamanta hamuq runakunata. Chaymantapas, askha waynakunan chhulla hinaraq kikillankumanta kusisqa ofrecekunku Jehovata servinankupaq (Sal. 110:3). ¡Sumaq bendicionmi kanku kay humilde wayqekunaqa Diospa llaqtanpi congregacionkunapaq! Huñukushanraqtaq Diosta serviy munaq runakunata chayqa, necesitakunmi experienciayoq qharikuna wayqe panakunata yanapanankupaq.
2 Escuela de Entrenamiento Ministerialmi allinta yanapan soltero ancianokunata siervo ministerialkunatapas astawan llank’anankupaq. 1987 watapi escuelaq qallarisqanmantapachan 999 kutitaña chay clasekuna ruwakun 140 nacionkunamanta 22.000 estudiantekunata preparanapaq. Kay wayqekunapaqmi, escuelaqa “llank’anapaq kicharikuq hatun punku” hina (1 Cor. 16:9, NM).
3 Imapaqmi kay escuela. Kay escuelaqa organizacionpa maypipas necesitasqanpi llank’anankupaq yachayniyoq qharikunata allinta preparanapaqmi. Escuelaqa yanapanmi allinta predicanankupaq, ovejakunata michinankupaq, congregacionpi yachachinankupaqpas. Escuela tukuqtinmi wakin estudiantekunaqa, servinku precursor especial hina otaq viajaq superintendente hinapas kikin nacionninkupi otaq huk nacionpipas. Wakintaq congregacionninkupi llank’anankupaq kutinku otaq sucursalpa dirigisqan nacionpipas aswan necesidadpa kasqanman rinku.
4 Escuelaq durasqan pusaq semanapin, estudiantekunaqa allinta Bibliata estudianku. Yachankun ovejakuna imayna michinata, cristiano kawsaypi problemakuna imayna allichanata, Bibliaq yachachisqan imaymana yachaykunatapas. Yachallankutaqmi Diospa imayna dirigisqanmanta Bibliaq yachachisqanta, juiciokuna imayna ruwaymanta, imayna organizanamantapas. Chaymantapas, yachachinkun discursota imayna qonankupaq, sapankankutan yanapanku espiritualpi usqhaylla wiñanankupaq.
5 Requisitokuna. Escuelaman rinapaqqa, chaypaq requisitokunatan hunt’ananku. Iskay watañan kananku ancianopas otaq siervo ministerialpas. Solteron kananku, 23 watayoqmanta 50 watayoqkama. Allintan leenanku qelqananku rimanankupas, escuela ruwananku simita, imaymana mikhuq qhali runan kananku. Ñawpaqtaqa rinqaku precursor regular kaqkunan.
6 Escuelaman riqkunaqa decidisqan kananku mayman rinankupaqpas. Kaypaqqa profeta Isaías hinan kananku, paymi Diospa kamachisqanta ruwananpaq kusisqa ofrecekuran: “¡Kaypin kashani! Ñoqata kachaway” nispa (Isa. 6:8). Payqa tukuy tiempo kawsasqanpin rikuchiran humilde kasqanta. Wayqe panankuta munakuspa serviy munasqankun, Escuela de Entrenamiento Ministerialman rinankupaqqa kallpachanan, manan hatunchakuy nitaq ima privilegio chaskiy munasqankuchu. Escuelamanta lloqsispan estudiantekunaqa chaypi yachasqankuwan wayqe panakunata yanapananku (Luc. 12:48).
7 Beneficiokuna. Pusaq semana estudiasqankupin kay hermanokunaqa ‘allin yachachikuywan allinta kallpachakunku’ (1 Tim. 4:6). Chhaynatan kay hermanokunata allinta preparanku asignasqanku congregacionkunapi otaq circuitokunapipas wayqe panakunata yanapanankupaq. Escuelamanta lloqsispa kay hermanokunaq risqan congregacionkunapin askhata yapanku servicionkupi, precursorkunapas yapanmi —astawanqa wayna sipaskuna— Diospa llaqtanpi mosoq discipulokunatapas sapankankutan astawan yanapanku.
8 Sichus soltero anciano otaq siervo ministerialpas kanki, 23 watayoqmanta 50 watayoqkama chayqa, ¿munankichu Escuela de Entrenamiento Ministerialman riyta? Sichus decidikunki Jehová Diosta hamuq tiempopiraq servinaykipaq chayqa, ¿kallpachakuwaqchu kay mundopi kaqkunapi pisita preocupakuspa, ‘llank’anapaq kicharikuq hatun punkuman’ haykunaykipaq? Askhatan kusichisunki. Escuela de Entrenamiento Ministerialqa, askhatan yanapan chaypi estudiaqkunatapas mundontinpi Diospa llaqtanpi congregacionkunatapas.
[3 kaq paginapi recuadro]
Imaynatan estudiasqanku paykunata yanaparan.
“Kaypi estudiasqaymi yanapawan servicioypi allinyanaypaq, Bibliaq nisqanman hina ovejakunata yachaywan michinaypaqpas.”
“Escuelaqa yanapawanmi confianzawan congregacionpi imapas ruwanaypaq.”
“Vidaytan imaymanapi cambian, Diospa gobiernontapas, organizacionnintapas imayna rikusqaytapas cambiachinmi.”
“Escuelapi yachasqaymi yanapawan necesidadpa kasqanpi servinaypaq ofrecekuypa importante kasqanta reparanaypaq.”