Diospa llaqtanpi escuelakunaqa Jehová Dios kuyawasqanchiktam qawachin

JEHOVÁ DIOSQA ancha allin ‘yachachiwaqninchikmi’ (Is. 30:20). Anchata kuyawasqanchikraykum yachachiwanchik. Kuyaspantaqmi churin Jesusmanpas ‘qawachirqa tukuy ima rurasqankunata’ (Juan 5:20). Kuyawaspanchiktaqmi qowarqanchik ‘rimanapaq palabrakunata’, paypa Testigon kasqanchikraykum kallpanchakunanchik hatunchananchikpaq hinaspa runamasinchikta yanapanapaqpas (Is. 50:4).

Hina chaynata kuyawaspanchiktaqmi Yachachikuymanta Encargakuq Diospa Llaqtanpi Punta Apaqkuna servichikunku chunka escuelakunata, chaynapi riyta atiqkuna hinaspa riy munaqkuna allin yachachisqa kanankupaq. Sutillamá qawanchik kay escuelakunawan Jehová Dios kuyawasqanchikta.

Diospa llaqtanpi kunan apakuq escuelakunamanta hinaspa chay escuelaman riq wakin iñiqmasinchikkunapa pisillapi ima nisqankuta leenaykipaqmi kallpanchaykiku. Hinaspa tapukuy: “¿Imakunapim yanapawanman kay escuelaqa?”, nispa.

ESCUELAKUNA IMAKUNAPI YANAPAWASQANCHIKMANTA

Ancha kuyakuyninpi Diospa yachachiwasqanchikqa sasachakuykunata atipanapaqwan Diosmanta kusisqa willakunapaqmi yanapawanchik (2 Cor. 13:11). Punta cristianokuna hinam, kunanpas yachachikuyta chaskinchik ‘tukuy ima kamachiwasqanchikta’ hukkunaman willakunapaq (Mat. 28:20).

Manapaschá llapallan escuelakunaman riytaqa atisunchu, ichaqa manam iskayrayachwanchu huk kaqllanpas yanapawananchikmantaqa. Chaymantapas Bibliamanta yachachiwasqanchiktaqa kasukuchwanmi. Hinaspapas, escuelaman riq iñiqmasinchikkunawan predicaspaqa aswan allin predicaytam atisun.

Chaynaqa tapukuy: “¿Atiymanchu mayqan escuelapi kaytapas?”, nispa.

Diosta serviqkunaqa anchatam chaninchanchik kay escuelakunapi kaytaqa hinaspa chaypi yachachisqa kaytapas. Munanikum lliw yachasqaykikuna astawan Diosman asuykachisunaykita hinaspa Dios serviynikipi ruraynikikunata chaynataq Diosmanta willakuypi cumplinaykipaq yanapasunaykitapas.

DIOSPA LLAQTANPI ESCUELAKUNAMANTA PISILLAPI WILLAKUYKUNA

Diosmanta Yachachinapaq Escuela

Imapaqtaq: Iñiqmasinchikkunatam yanapan aswan allinta Diosmanta willakunankupaq hinaspa yachachinankupaq.

Hayka tiempotaq: Sapa kutim apakun.

Maypitaq: Huñunakunanchik Salonkunapim.

Pikunapaqtaq: Huñunakuna Salonman sapa kuti riqkunapaqwan Diospa yachachisqanman hina kawsakuqkunapaqmi.

Imatam rurananku chaypi kanankupaq: Diosmanta Yachachinapaq Escuelapi encargakuq ancianowanmi rimananku.

Sharon iñiqmasinchikpa onqoyninmi sasachan cuerpon kuyurinanta, paymi nin: “Diosmanta Yachachinapaq Escuelam yanaparuwan yachachikuykunata tarinaypaq hinaspa allinta yachachinaypaq chaynataq mana kikillaypi piensaspa hukkunapa iñiyninkupi piensanaypaqpas”, nispa.

Allin experienciayoq Arnie iñiqmasinchikqa congregacionkunata watukuqmi, paymi nin: “Taksachaymantam rimaypi sasachakuq kani hinaspapas penqakuqmi kani runakunapa uyanta qawanaypaq. Jehová Diosmi kay escuelantakama yanaparuwan mana manchakuspa hinaspa confianzawan rimanaypaq, yacharunitaqmi yachachisqallaypi astawan reparanaypaqpas. Anchatam agradecekuni huñunakuypi hinaspa predicaypipas Jehová Diosta alabanaypaq yachaykachiwasqankumanta”, nispa.

Betelpi Chayraq Serviqkunapaq Escuela

Imapaqtaq: Betelman chayraq yaykuqkunatam yanapan allinta servinankupaq.

Hayka tiempotaq: Chunka soqtayoq semanam, sapa semanam tawa chunka pichqayoq minutopi apakun.

Maypitaq: Betel wasipim.

Pikunapaqtaq: Betelpi llamkaqkunapaq hinaspa huk wata otaq masnin invitasqa kaqkunapaqmi.

Imatam rurananku chaypi kanankupaq: Betelpi chayraq llamkaqkunaqa invitasqam kanku.

1980 watakunapi chay escuelaman riq Demetrius iñiqmasinchikmi willakun: “Chay escuelam yanapawarqa aswan allinta Bibliata estudianaypaq hinaspa Betelpi unay wata servinaypaqpas. Yachachiqniykuna hinaspa yachachikuykuna chaskisqaymi yanapawarqa Jehová Dios kuyawasqanmanta astawan seguro kanaypaq chaynataq Betel wasipi kusisqa servinayta munasqantapas”, nispa.

Kaitlyn iñiqmasinchikpas willakunmi: “Anchatam yanapawarqa astawan Diosman sonqo kanaypaq. Kay escuelaqa yanapawarqataqmi astawan Jehová Diosta reqsinaypaq chaynataq wasintawan llaqtanta chaninchanaypaqpas”, nispa.

Ancianokunapaqwan Siervo Ministerialkunapaq Escuela

Imapaqtaq: Congregacionkunata watukuq ancianokunatawan congregacionpi ancianokunatam yachachin, yachachintaqmi siervo ministerialkunatapas congregacionpiwan Diospa llaqtanpi ima rurayninkutapas aswan allinta ruranankupaq (Hech. 20:28). Congregacionpi imapas sasachakuykunatawan imapipas chaylla yanapanapaq kaqkunatam qawanku. Kay escuelaqa Diospa Llaqtanpi Punta Apaqkunapa tanteasqanku watakunapim rurakun.

Hayka tiempotaq: Pasaq watakunapiqa iskay otaq iskay punchaw partenmi congregacionkunata watukuqkunapaqqa karqa, ancianokunapaqñataq huk punchaw parten, siervo ministerialkunapaqñataqmi huk punchaw.

Maypitaq: Huñunakunapaq Salonpim otaq Asambleapaq localpim.

Pikunapaqtaq: Congregacionkunata watukuq ancianokunapaq, congregacionpi ancianokunapaq chaynataq siervo ministerialkunapaqmi.

Imatam rurananku chaypi kanankupaq: Ancianokunawan siervo ministerialkunaqa huk invitaciontam chaskinku congregacionkunata watukuq ancianomanta. Congregacionkunata watukuq ancianokunatañataqmi Betel wasimanta invitanku.

“Kay escuelapi achka yachachikuykunata pisi tiempollapi yachasqankum, ancianokunata anchata yanapan Bibliapa nisqanman hina kusikuywan hinaspa valorchakuspa Diosta servinankupaq. Unayña otaq pisi tiempollaraq kaptinkupas ‘huk sonqolla hinaspa huk pensamientoyoqlla’ kanankupaqmi yanapan.” (Uraypi, Quinn.)

“Kay yachachikuymi yanapawanchik Dios serviyninchikta aswan chaninchanapaqwan mana allinkunamanta cuidakunapaq. Yachachiwanchiktaqmi iñiqmasinchikkunamanta nanachikunapaqpas. Ancha kuyapayakuqmi Jehová Diosqa.” (Michael.)

Precursorkunata Yanapaq Escuela

Imapaqtaq: Precursorkunatam yanapan Diosmanta willakuyninkuta allinta cumplinankupaq (2 Tim. 4:5).

Hayka tiempotaq: Iskay semanam.

Maypitaq: Betel wasimantam tanteanku, yaqa llapanpim huñunakuna salonpi rurakun.

Pikunapaqtaq: Huk wata otaq masña precursor regularkunapaqmi.a

Imatam rurananku chaypi kanankupaq: Diospa nisqankunata kasukuq precursorkunataqa congregacionkunata watukuq ancianom chay escuelaman rinankupaq invitan.

“Kay escuelaman risqaywanmi yacharuni predicasqaypiwan kawsayniypi imapas sasachakuykuna atipayta. Bibliamanta yachachiyniy, estudiayniy hinaspa imayna servichikuyniymi aswan allinña. Allin preparasqataqmi tarikuni runamasiykunata, ancianokunata hinaspa Diospa llaqtan wiñananpaq yanapakunaypaqpas.” (Alleq lawpi, Lily.)

Iskay kutipi chay escuelaman riq Brenda iñiqmasinchikmi nin: “Kay escuelam anchata yanaparuwan Dios serviyniyta astawan chaninchanaypaq hinaspa concienciayta kallpanchanaypaqwan runamasiykunata yanapaypi kallpanchakunaypaqpas.¡Mayna kuyapayakuqmá Jehová Diosninchikqa!”, nispa.

a Yachachikuy qallarinanpaq mana ancha precursorkuna kaptinqa, kaqmantam invitanmanku 5 wataña mana chay escuelaman riq wakin precursorkunata.

Congregacionpi Ancianokunapaq Escuela

Imapaqtaq: Ancianokunatam yanapan congregacionpi rurayninkuta allinta cumplinankupaq hinaspa Diosta serviyninkupi allin takyasqa kanankupaq.

Hayka tiempotaq: Pichqa punchawmi.

Maypitaq: Betel wasimantam tanteanku, yaqa sapa kutim rurakun huñunakunanchik salonpi otaq Asambleapaq localpi.

Pikunapaqtaq: Ancianokunapaqmi.

Imatam rurananku chaypi kanankupaq: Betel wasimantam paykunataqa invitan.

Estados Unidos nacionmanta, 92 kaq escuelaman riqkunam nirqaku:

“Kay escuelaman risqaymi anchata yanapawarqa imayna kasqayta qawakunaypaq hinaspa Jehová Diospa ovejankunata imayna qawanaypaqpas”.

“Kunanqa atisaqñam Bibliapi sumaq yachachikuykunata servichikuspay hukkuna kallpanchayta”.

“Yachasqaykunaqa wañunaykamam yanapawanqa”.

Congregacionkunata Watukuq Ancianokunapaqwan Señorankupaq Escuela

Imapaqtaq: Congregacionkunata watukuq ancianokunata hinaspa paykunata watukuq ancianokunatam yanapan, paykunaqa anchatam kallpanchakunku congregacionpi kaqkunaman allinta yachachinankupaq (1 Tim. 5:17; 1 Ped. 5:2, 3).

Hayka tiempotaq: Iskay killam.

Maypitaq: Betel wasimantam tanteanku.

Pikunapaqtaq: Congregacionkunata watukuq ancianokunapaqwan paykunata watukuqninkunapaqmi.

Imatam rurananku chaypi kanankupaq: Betel wasimantam paykunataqa invitanku señorankutawan.

1999 watapi punta kaq escuelaman riq Joel iñiqmasinchikmi nin: “Kunanqa astawanmi chaninchaniku Diospa llaqtanpi punta apaq Jesus kasqanmanta. Yachanikutaqmi iñiqmasinchikkunata kallpanchay hinaspa huñulla kanankupaq kallpanchaypas ancha allin kasqanmanta. Kaytam ichaqa mana qonqanikuchu: Congregacionkunata watukuspa wakinpi consejanayku, correginayku kaptinpas, rurayniykuqa iñiqmasinchikkunata yanapaymi”, nispa.

Solterokunapaq Bibliamanta Escuela

Imapaqtaq: Soltero kaq ancianokunatawan siervo ministerialkunatam yanapan congregacionpi imapas ruraykunata chaskinankupaq. Achka chayman riqkunataqa nacionninkupi mana ancha predicaqkunapa kasqan lawmanmi kamachinku. Huklaw nacionpi serviyta munaptinqa huklawmanmi kamachinku. Wakinninkuqa precursor especial hinam kayta atinmanku pisi tiempolla, chaynapi mana ancha predicaqkunapa kasqanpi hinaspa karu llaqtachakunapipas Diosmanta willakuy apakunanpaq.

Hayka tiempotaq: Iskay killam.

Maypitaq: Betel wasimantam tanteanku, yaqa sapa kutim apakun huñunakunanchik salonpi otaq Asambleapaq localpi.

Pikunapaqtaq: 23-62 watayoqkama solterokunapaqmi. Chaypaqqa sanom kananku, hinaspapas mana ancha predicaqkunapa kasqanpi serviytam munananku (Mar. 10:29, 30). Chaymantapas, puntataqa iskay wata hinam precursor regular kananku hinaspapas iskay watataqmi mana saqespa anciano otaq siervo ministerial kananku.

Imatam rurananku chaypi kanankupaq: Iskay punchawpaq asambleakunapim chay escuelaman riy munaqkunapaq huk huñunakuy apakun.

Rick iñiqmasinchikmi Estados Unidos nacionpi 23 kaq escuelaman risqanmanta nin: “Kay escuelapi anchata kallpanchakusqayraykum Jehová Diospa espiritun cambiaruwarqa. Ima ruraytapas Jehová Dios kamachisuspaykiqa yanapasunkim cumplinaykipaq. Jehová Diospa munayninta ruranaykipaq kallpanchakuptikiqa, payqa yanapasunkim”, nispa.

Alemania nacionpi Diosta serviq Andreas iñiqmasinchikmi nin: “Entienderunim Diospa llaqtanqa kunan tiempopi huk milagro hina kasqanta. Yachasqaykunam yanaparuwan tukuy imapas rurayniykunata ruranaypaq. Chaymantapas, Bibliapa sumaq willakuyninkunam kayta yacharachiwan: cheqap kusikuyqa Jehová Diostawan iñiqmasinchikkunata serviypim”, nispa.

Casarasqa warmi-qaripaq Bibliamanta Escuela

Imapaqtaq: Casarasqa warmi-qarikuna allin yachachisqa kaspanku Jehová Diospa llaqtanpi astawan yanapakunankupaqmi. Yaqa llapallan chayman riqkunatam nacionninkupi mana ancha predicaqkunapa kasqan llaqtakunaman kamachinku, wakintañataqmi huklaw nacionkunaman kamachinmanku riyta munaptinkuqa. Hukkunañataqmi atinmanku precursor especial hina serviyta pisi tiempolla, chaynapi mana ancha predicaqkunapa kasqanpi hinaspa karu llaqtachakunapipas Diosmanta willakuy apakunanpaq.

Hayka tiempotaq: Iskay killam.

Maypitaq: Estados Unidospim, 2012 watapa septiembre killanmantañataqmi huklaw nacionkunapi, yaqa sapa kutim rurakun huñunakuna salonpi otaq Asambleapaq localpi.

Pikunapaqtaq: 25-50 watayoqkama kaqkunapaqmi, sanom kananku, mana ancha predicaqkunapa kasqanpi serviy atiqtaqmi kananku. Isaiaspa imayna kasqantam qatipakunanku, paymi nirqa: “Kayqaya ñoqa kaypi kachkani [. . .] ñoqatayá kachaway”, nispa (Is. 6:8). Mana saqespam iskay wata precursor kananku hinaspa iskay watataq casarasqa kananku. Qosa kaqpas iskay watam mana saqespa anciano otaq siervo ministerial kanan.

Imatam rurananku chaypi kanankupaq: Kimsa punchawpaq asambleakunapim chay escuelaman riy munaqkunapaq huk huñunakuy apakun. Sichu nacionnikipi kaq asambleakunapi mana chay huñunakuy apakunchu, hinaptinqa Betel wasimanmi qellqawaqchik chay escuelaman riyta munaspaykichikqa.

“¡Pusaq semanakunapim casarasqakunapa vidankuta cambian Jehová Diosta astawan tukuy sonqonkuwan servinankupaq! Segurom kachkaniku imapas rurayllamanña mana qokuruspayku tiempoykuta allintaña servichikunaykupaq.” (Uraypi Eric hinaspa Corina, paykunam 2011 watapi punta kaq escuelaman rirqaku.)

Bibliamanta Galaad Escuela

Imapaqtaq: Chayman riqkunatam yanapan achka runakunapa kasqan lawpi misionero, congregacionkunata watukuq otaq Betelpi llamkaq kanankupaq. Yanapantaqmi Betel wasipi llamkaywan Diosmanta willakuy aswan ñawparinanpaqpas.

Hayka tiempotaq: Pichqa killam.

Maypitaq: Centro Educativo de la Watchtower nisqapim. Chayqa tarikun Patterson, Nueva York llaqtapim.

Pikunapaqtaq: Tukuy tiemponkuwan Diosta serviq casarasqakunapaqmi otaq mana chay escuelaman riq misionerokunapaq, precursor especialkunapaq, congregacionkunata watukuqkunapaq chaynataq Betelpi llamkaqkunapaqmi. Kaykunapi kimsa wata masnin kuskanku serviqkunam kananku. Allintataqmi yachananku ingles rimayta, qellqayta hinaspa leeytapas.

Imatam rurananku chaypi kanankupaq: Betel Wasimanta Encargakuqkunam casarasqakunata invitanku qellqanankupaq.

Estados Unidosmanta Lade hinaspa Monique casarasqakunam África nacionpiña servichkanku, paykunam ninku: “Galaad Escuelam yanaparuwanku maylaw nacionmanpas rinaykupaq, listolla kaspayku kuyasqayku iñiqmasiykuwan llamkanaykupaqpas”, nispa.

Moniqueqa nintaqmi: “Diospa Palabranmanta tukuy ima yachasqayta kasukusqaymi mayman kamachiwaptinkupas kusisqata tarichiwanqa. Kusisqa kasqayqa qawachintaqmi Jehová Diospa kuyawasqanta”, nispa.

Betel Wasimanta Encargakuqkunapaqwan Señorankupaq Escuela

Imapaqtaq: Chay escuelapa yanapakuyninwanmi Betel Wasimanta Encargakuqkunaqa: Betel wasipi llamkaykunata, congregacionpi iñiqmasinchikkunata, congregacionkunata watukuqta chaynataq paykunapa watukuqninta yanapanku. Tanteankutaqmi qellqakuna tikrasqa kananpaq, lloqsinanpaq hinaspa apachisqa kananpaqpas.

Hayka tiempotaq: Iskay killam.

Maypitaq: Centro Educativo de la Watchtower nisqapim. Tarikunmi Patterson, Nueva York llaqtapi.

Pikunapaqtaq: Betel Wasimanta Encargakuq otaq huklaw nacionpi predicacionmanta encargakuq otaq chayna servinanpaq invitasqam qosaqa kanan.

Imatam rurananku chaypi kanankupaq: Diospa Llaqtanpi Punta Apaqkunam paykunataqa invitan señorankutawan.

25 kaq escuelaman riq Lowell hinaspa Cara casarasqakunam Nigeria nacionpi servichkanku. Lowellmi nin: “Kay escuelaman risqaymi yuyarichiwan ima ruraypi kaptiypas otaq ima llamkayman kamachiwaptinkupas Diosman sonqo kay ancha allin kasqanta. Yuyarichiwantaqmi Jehová Dios serviqninkunaman kuyakuynin qawachisqanta qatipakuy ancha allin kasqantapas”, nispa.

Carapas nintaqmi: “Kayna niwasqankupim anchata yuyaymanarqani: imamantapas chaylla yachachiyta mana atispaqa, ñawpaqmantaraqmi preparakunayki hukkunaman yachachinaykipaqqa”, nispa.