Allinta rurasunchik, kapuqninchikwanpas yanapanakusunchik
1 Dorcas karqa “achka allinkunata ruraq hinaspam wakchakunata yanapaq” (Hech. 9:36, 39). Qoykukuq kasqanraykum Jehová Dios hinaspa reqsiqmasinkunapas kuyarqaku. Hebreos 13:16 nisqanman hina: “Allin ruraytawan kapuqnikichikwan yanapanakuytaqa amayá qonqaychikchu, chay rurasqaykichikwanmi kañasqa ofrendawan hina Diosta agradankichik”. ¿Imaynatam kunan allinkaqta rurachwan hinaspa kapuqninchikkunawan runamasinchikkunata yanapachwan?
2 Kaytaqa rurachwanmi qoykukuq kaspa ‘tukuy kapuqninchikkunamanta’ (Pro. 3:9). Qollqe qosqanchikmi yanapan enterollan kay pachapi Reinopaq Salonkuna rurakunanpaq, Asambleapaq Salonkuna, sucursalkunapas rurakunanpaq. Qoykusqanchikwanmi millonninpi runakuna Diospa yachachisqanwan yanapachikuchkanku, wawqe-panikunawanpas espiritualpi kallpanchanakunku.
3 Llakipayasunchik. Ima ñakariykuna kaptinpas, Jehová Diospa llaqtanqa listom kachkan, iñiqmasinkunapaq mana iñiqkunapaqpas ‘lliwta yanapananpaq’ (Gál. 6:10). Francia nacionpi química nisqan fábrica toqyarusqa, chay fabricapa ladonpi warmi-qari tiyaqmi kayta willakun: “Cristiano wawqe-paninchikkunam utqayllata yanapawaqniyku hamurqaku. Edificiopi yachasqayku wasitam pichaysiwarqaku chaymanta hukkunapa yachasqankutapas. Vecinokunam admirakurqaku chaynaniraq hamusqankuwan”. Huk paninchikpas nillantaq: “Ancianokunam hamurqaku kallpanchawaqniyku, qollqemantapas, mikunamantapas, imamantapas kaytam astawanqa munarqaniku”.
4 Imakunawanña runamasinchikta yanapaspanchikpas, aswan allinqa Bibliamanta yachachiymi, Jehová Diospa prometesqan “wiñay kawsay confianzawanña suyanankupaq” (Tito 1:1, 2). Bibliapa willasqanmi sonqonta hawkayachinmi kay pachapi tukuy rikchaq ñakariykunamanta, huchapi kawsasqanmantapas llakikuqkunata (Mat. 5:4). Chayrayku hinalla rurasunchik allinta, ima kapuqninchikwanpas hukkunata yanapasunchik atisqanchikman hina (Pro. 3:27).