Sapakama kallpanchanakusunchik
1 Tukuy atisqantam apóstol Pablo rurarqa iñiqmasinkunata kallpanchananrayku (Hech. 14:19-22). Chaynallataqmi, wawqepaninchikkuna sasachakuypi tarikuptinku, ñoqanchikpas llakipayaspa yanapayta munanchik. Wakinkunata kuyapayananchikpaqmi Bibliaqa llapanchikta niwanchik, manam ancianokunallatachu (Rom. 15:1, 2). Iskay rurayman churanapaqmi qawasun qatiqnin consejota: “Hinayá kallpanchanakuychik hinaspa yanapanakuychik” (1 Tes. 5:11).
2 Wakinkunapa necesitasqankunapim reparananchik: Dorcas warmimantam Bibliaqa nin “achka allinkunata ruraq hinaspam wakchakunata yanapaq” (Hech. 9:36, 39). Sasachakuqkunata qawarispanmi kallpanchakurqa atisqanman hina yanapanampaq. ¡Chay rurasqanqa ima allinmi llapallanchikpaq! Ichapas yachanchik yuyaq wawqenchik huñunakuyman rinanpaq sasachakusqanta. Otaq huk precursor mana tarinchu piwan tarden lawpi predicaq lloqsinanpaq chawpi semanapi. Pipa necesitasqanta musyaspa allin ruraykunawan yanapaykuspaqa, cheqaptam kallpanchasunchikqa.
3 Espiritual ruraykunamanta rimarisun: Hukkunatapas rimasqanchikwanmi kallpanchasunchik (Efe. 4:29). Allin yachayniyoq ancianom nirqa: “Kallpanchayta munaspaqa, espiritual ruraykunamanta rimay. Kallpanchaq rimaytam qallariwaq mana sasa tapuyllawan. Ejemplopaq: ¿Imaynatam cheqapta reqsirqanki?”. Congregacionpi mozokunata, sipaskunata, hukmanyasqakunatawan otaq manchakuqkunata cheqap kuyasqanchikta rikuchisun (Pro. 12:25). Kay pachapa yanqaya kusikuy rimayninkunawanqa amayá qepaman churasunchu iñiq masinchikkunawan espiritual rimayninchikta
4 Kunan ichaqa, ¿imatataq nichwan wakinkunata kallpanchanapaq? ¿Chayllaraq Biblia leesqanchik hinaspa estudiasqanchikpipas tarirqanchikchu allin yachaytapas Jehová Diosta kuyayninchik yapakunanpaq? ¿Kusichiwarqanchikchu conferenciapi otaq Atalaya Estudiopi ima uyarisqanchikkuna? ¿Ima experienciapas sonqonchikmanchu chayarqa iñiyninchik kallpanchakunanpaq? Espiritual ruraykunata alhajata hina rikuspa yuyayninchikpipas waqaychaspaqa, wakinkunata kallpanchanapaqmi allin rimayninchik mana tukuqlla kanqa (Pro. 2:1; Luc. 6:45).
5 Chaynaqa, allin yanapakuytayá qosunchik rimayninchikta allinta servichikuspa. Chaynapi sapakama kallpanchanakusunchik (Pro. 12:18).