Hatun huñunakuypi Jehová Diosta hatunchasunchik
1, 2. ¿Ima ruranapaq distrito asamblea allin kanman, imaynatam kayta rurachwanqa?
1 Watantinpi distrito asambleapi Jehová Diosta hatunchanchik. Sonqonchikqa rey Davidpa hinam, paymi takirqa: “Qamllatamá gracias nisaq hatun huñunakuypipas. Qamllatamá alabasaq achka runa kasqanpipas” (Sal. 35:18). “Diosta kasukuy” asuykamuq distrito asambleapa nisqapim, ¿imakunatam rurananchik huk llaqta hinalla, Jehová Diosta hukkunapas yupaychanankupaq?
2 Kaytaqa ruranchik sumaq kawsayninchikwanmi. Asamblea rurana localta nanachikuqmi kayta nisqa: “Huk religionkunapas localta munaptinkuqa ninikum, Jehová Diospa testigonkunapa asamblea ruranankupaq allichasqankuta qawamuychik, allintapunim paykunaqa ruranku” nispa. Pachakusqanchikwan, yanapanakusqanchikwan, sumaq kawsasqanchikwanpas, sapakamam Diosta yupaychasunchik, hinaspa qawawaqninchikkunapas Payta hatunchanqaku (1 Ped. 2:12).
3, 4. ¿Imaynatam yanapawasunchik asambleapi hinaspa asamblea tukuykuqta Diosta serviq hina mana hatuntukuspa cristiano hina pachakusqanchik?
3 Imaynatam pachakuna. Jehová Diosta yupaychanapaq hinam pachakusunchik, allichakusunchikpas (1 Tim. 2:9). Benefíciese libropim 132 paginanpi kaynata nin: “Mana hatuntukuq runaqa manam yanqataqa hukkunata hukmanyachinku, nitaq hukkunapa qawarinallanpaqchu pachakunpas”. Kunanqa achka nacionkunapim runakuna penqakunapaq hina pachakunku. Jehová Diosmi ichaqa Paypaq hina pachakusqanchikta sumaqta qawan (Hech. 15:14). Pukllanapaq otaq chaynaman rikchakuq localpi asamblea rurakuptinpas, kimsantin punchawmi ñoqanchikqa ‘hatun huñunakuykunapi’ kasunchik. Chayrayku Jehová Diospa ñawpaqninpi huñunakuspaqa, ancha hatunchasqa Diospaq hina pachakunanchikmi (1 Cró. 29:11).
4 Sapa punchaw asamblea tukuykuptin qepatapas qawarikunanchikmi imayna pachakusqanchikta. Restauranteman mikuq rispapas, wasipiña kaspapas, “Diospa agradonpaq” runakuna hinam pachakunanchik (1 Tim. 2:10). Allin pachasqa kanapaqqa, manam kay pachapi runakuna hinachu pachakunachik (1 Juan 2:16, 17). Publicacionninchikkunapim rikchanachikuykunatam qawanchik maypi tarikuspapas sumaq pachawan pachasqa wawqe-paninchikkunata. Asamblea rurakusqan llaqtapi qasqonchikpi tarjetata apaspanchikmi yuyarisunchik cristiano kasqanchikta imataña ruraspapas (2 Cor. 6:3, 4).
5, 6. ¿Imaynatam qawachichwan Jehová Diospa espiritual mikuyta qowasqanchik respetasqanchikta?
5 Jehová Diospa qowasqanchik espiritual mikuykunata respetasunchik. Tukuy munaychakuq Diosmi qowanchik achka mikuykunata (Isa. 25:6; 1 Cor. 10:21). Jehová Diospa espiritual mikuykunata qowasqanchikta chaninchaspaqa, allichakusunchikmi kimsantin punchaw asambleapi kananchikpaq. ¿Ñachu mañarunchikña maypi samapakunanchikpaq, imapi illanatapas, llamkayninchikmantapas permisota mañarunchikñachu? ¿Tanteakunchikñachu hayka tiempopi allichakusunchik, illasunchik asambleaman temprano chayaspa tiyanata maskanapaq, qallariymaytapacha wawqe-panikunawan huñulla Jehová Diosta takiwan, oracionwan yupaychananchikpaq? (Sal. 147:1.)
6 Jehová Diospa espiritual mikuykuna qowasqanchikta respetaspaqa atencionwan asambleapi uyarisunchik, chaypaqqa manam mikuchkanachu, hukkunawan rimachkanachu, nitaq yanqata puriykachachkanachu. Allin yuyayniyoq confianza sirvientewanmi, espiritual mikunata Jehová Dios qowanchik kay necesitasqanchik punchawkunapi (Mat. 24:45). Manam mayqenninchikpas kay mikuna qowasqanchiktaqa usuchichwanchu. Tayta-mamakunapas wawankuwan kuska tiyaspankum yanapananku asambleata allinta uyarinankupaq (Deu. 31:12).
7. ¿Imatam rurananchik chawpi punchawpi mikunapaq?, ¿imanasqataq?
7 Chawpi punchawpaq mikunanchiktam apakunanchik hawamanta mana rantinapaq. Ancha kusikunapaqmi qayna watapi asambleaman riqkuna tukuy kaykunata kasukusqanku. ¡Ima allinchá kanman kay watapipas chayna kasukuyqa! (Heb. 13:17.) Kaymi yanapawanchik wawqe-paninchikkunawan sumaqta parlarikunapaq, huñulla kaspa hawkallapi Jehová Diosta hatunchananchikpaqpas (Sal. 133:1).
8, 9. ¿Imaynatam distrito asambleaman rispa Jehová Diosta yupaychachwan?
8 Maylawpipas predicasunchik. Asambleaman rispapas, kutispanchikpas Jehová Diosmantaqa willachwanmi (Heb. 13:15). Willanchikmanmi restaurantepi mikuchkaspapas, otaq hotelpi llamkaqkunamanpas. Yuyayninchikpas, sonqonchikpas, asambleapi sumaq yachachikuykunawan huntasqa kaptinmi, chaykunamanta rimasunchik maylawpipas tupasqanchik runakunawan (1 Ped. 3:15).
9 Munanchikmi ‘lliw huñunakuqkunapa chawpinpi Jehová Diosta bendiciyta’ (Sal. 26:12). ¡Huñulla kaspa llapanchik “Diosta kasukuy” nisqa, Distrito Asambleapi Jehová Diosta yupaychasunchik!
[5 kap paginapi recuadro]
Distrito asambleapaq yuyarikuykuna
◼ Programapaq horario. Programaqa qallarinqa kimsantin punchaw 9.30 tempranomanta. Punkukunam kichakunqa 8.00 tempranomanta. Manaraq huñunakuy qallarichkaptinmi presidenteqa plataformapi tiyanqa, uyarikunqataq Reinomanta takikunata. Chayta uyarispam llapanchik tiyakunanchikña programa qallarinanpaq. Iskaynin punchawmi huñunakuy tukunqa 5.05 tardeta, kimsa kaq punchawtaq 4.10 tardeta.
◼ Carrokuna waqaychana. Carrokuna sayananpaq mana hatun kasqanrayku, huk carrollapi achka richunku, huklla otaq iskaylla sapakama carronkupi rinankutaqa.
◼ Tiyanakuna waqaychay. Ñoqanchikwan carropi riqkunallapaqmi tiyanataqa waqaychachwan, otaq kaq wasillapi yachaqkunapaq.
◼ Donacionkuna. Distrito asambleapiqa achkam gastokunaqa, chaymi agradecekusqanchikta qawachichwanqa atisqanchikman hina donacionninchikta qospa, Salón del Reinopi otaq asambleapipas.
◼ Karuta uyariqkunapaq. Wakin asambleakunapiqa programa uyarikunqa (FM) radiopi. Asambleakunapi chayna kaptinqa, asamblea qallarichkaptinmi willakunqa. Karuta uyariqkuna apakunmanku audifonoyoq huchuy radiochata asambleata uyarinankupaq.
◼ Chawpi punchawpi mikuna. Chawpi punchawpaq mikunanchiktam apakunanchik hawapi mana rantinanchikpaq. Apanchikmanmi mikunanchikta tiyasqanchikpa ukunpi cabeqllata. Manam hatunchu kanman mikuna waqaychanaqa, nitaqmi apanachu vidriomanta imatapas nitaq sinkakunapaq tragotapas.
◼ Grabadorakuna. Grabadorata apaspaqa manam hukkunata distraenachu, nitaq localpa corrientenman, sonidopaq corrientenmanpas hapichinachu.
◼ Foto horqoy. Discursokuna kachkaptin fotota horqoyta munaspaqa ama llip-llipyachiychu.
◼ Celular telefonokuna. Hukkunata mana pantachinapaq hinam programananku.
◼ Accidentekuna, qonqayllamanta onqoruptinkupas. Qonqayllamanta pipas onqoptinqa acomodadormanmi willana, payñam Primeros Auxilios Departamento nisqaman willanqa, paykunañataqmi yanapanqaku imayna tarikusqanman hina.
◼ Samapakunapaq. Samachiyta munaspaqa congregacionpi secretariomanmi rimanayki, samapakunapaq formulariotataq huntasunchikpas. Huk llaqtapi asambleaman rinaykipaq samapakunaykipaq necesitaptikiqa secretarioman willay, huntachisqa solicitudtataq payman qoy, payñataqmi apachinqa. Ama asamblea chayamunantaraqchu suyay solicitudnikita huntachinaykipaq, samapakunapaq departamentotam sasachachichwan (1 Cor. 14:40). Pipas wawankunawan samapakuspaqa respetanankum samapakusqan wasita, manam imantapas llapchanankuchu, maskanankuchu nitaq malogranankuchu. Samapakuyqa asamblea punchawkunallapaqmi. Manam allinchu kanman mayta rinapaqpas, ima ruranapaqpas wasipi achka punchawta samapakuyqa.