Kimsa punchaw asambleakunaqa, Diosta kusikuywan yupaychanapaqmi
1. Diosta yupaychanankupaq Israel llaqtapa fiestakuna rurasqanku, ¿imapitaq rikchakun kimsa punchaw asambleanchikwan?
1 Josey, Maria hinaspa churi-wawankuna chaynataq tukuy sonqonkumanta Diosta serviqkunam Jerusalenpi hatun fiestakunaman watapi riqku Diosta yupaychanankupaq. Chay punchawkunapiqa imapas rurayninkumanta mana piensaspankum, Dios yupaychayninkuta puntapi churarqaku. Chaypim astawan tiempochakurqaku Jehová Diospa kuyakuyninmanta yuyaymananankupaqwan rimanankupaq chaynataq Kamachikuyninkunamanta yachanankupaqpas. Chaynallataqmi kimsa punchaw asambleanchikpas yanapawasun kusikuywan Jehová Diosta yupaychanapaq.
2. ¿Imakunatam rurachkanaña hichpaykamuq kimsa punchaw asambleapaq?
2 Ñawpaqmantam tiempochakuna. Jesuspa familianqa Nazaretmanta Jerusalenman rinankupaqwan kutimunankupaqqa, yaqa semanam purinanku karqa. Manamá yachanchikchu Jesuspa wawqe-paninkuna hayka kasqankutaqa, ichaqa maynatachá Joseywan Mariaqa kallpanchakurqaku ñawpaqmantaraq tiempochakunankupaq. ¿Qampas tiempochakuchkankiñachu huk punchawllapas mana faltakuspa chay hichpamuq kimsa punchaw asambleapi kanaykipaq? Yaqapaschá chay punchawkunapi samanaykipaq patronnikiwan rimanayki kanqa otaq warmaykikunapa profesorninwanpas. Iñiqmasinchikkunapa wasinpi samapakuyta munaspaykiqa, ¿ñachu samapakunamanta papelta huntarunkiña? Otaq hotelpi samapakuyta munaspaykiqa, ¿ñachu rakirunkiña? ¿Atiwaqchu congregacionpi llumpay onqoqta asambleaman rinanpaq yanapayta? (1 Juan 3:17, 18.)
3. Diosta yupaychanankupaq judiokunapa fiestanku, ¿imapaqmi allinpuni karqa?
3 Iñiqmasinchikkunamanta. Diosta yupaychanankupaq judiokunapa fiestakuna rurasqankuqa allinpunim karqa iñiqmasinkunawan kallpanchanakunankupaq. Jesuswan familianpas anchatachá munarqaku amistadninkunawan tupaykuyta. Jerusalenpi otaq ñan risqankupipas Diosta yupaychaq mana judio kaqkunawanpas amistadtam rurayta atirqaku.
4. ¿Imaynatam qawachichwan iñiqmasinchikkunata ancha chaninchasqanchikta?
4 Asambleapi yachachikuykunata papelpi qellqasqata qowananchikmantaqa, allin yuyayniyoq confianza sirvienteqa kallpanchakunmi huñunakuspa discursokunata uyarinanchikpaq. ¿Imanasqa? Iñiqmasinchikkunawan kallpanchanakunapaq (Heb. 10:24, 25). Chaynaqa kallpanchakuyá sapa punchaw temprano chayanaykipaq, chaynapi asamblea qallarinanpaq taki manaraq qallarichkaptin iñiqmasinchikkunawan kallpanchanakunaykipaq. Chawpi punchawta mikuy rantiq lloqsinaykimantaqa, kallpanchaykikum qoqawnikita apakunaykipaq chaynapi wakin huñunakuqkunawan rimarinaykipaq. Arí, Jehová Diostam agradecekunanchik lliw iñiqmasinchikkunamantaqa (Miq. 2:12).
5. ¿Imaynatam asambleawan allinta yanapachikuchwan?
5 Allinmi yachananchikpaq. Jesusqa taksallaraq kasqanmantapacham, chay fiestakunata allinta servichikurqa hanaq pachapi Taytanmanta astawan yachananpaq (Luc. 2:41-49). ¿Imaynatam ñoqanchikpas familianchikwan kuska hichpamuq asambleawan allinta yanapachikuchwan? Discursokuna qokuchkaptinqa hawkalla tiyaspa uyariy. Celularniki kaptinqa kallpanchakuyá uyariqkunata mana sasachananpaq. Yachachiqta qawaspa uyarisqaykikunata pisillapi qellqay. Familiaqa huñullam tiyananku chaynapi warmankuna uyarisqanta tayta-mamakuna qawanankupaq. Tutañataqmi tiempota rakiwaqchik yanapasusqaykichik yachachikuykunamanta rimanaykichikpaq.
6. ¿Imatam yuyarinanchik pachakuyninchikmantawan allichakuyninchikmanta?
6 Pachakuymantawan allichakuymanta. Huklaw nacionmanta negociowan puriq runakunaqa, Jesuspa familiantawan Diosta yupaychanankupaq riq otaq kutimuq judiokunataqa sutillam reqsiruqku. ¿Imanasqa? Pachankupa patanpi kipuyoq qaytuchakuna sirasqa kasqanrayku hinaspa sapa kipupa hawanpi morado watuchakuna churasqa kasqanrayku (Num. 15:37-41). Kunan tiempopi cristianokuna sapaq pachakunawan mana churakuptinchikpas, runakunaqa reqsiwanchikmi limpio hinaspa humildadwan allin pachakuyninchikwan. Kallpanchakunanchikmi rispanchikpas, kutimuspanchikpas otaq chay asambleapi kaspapas pachakuyninchik allin kananpaq. Asamblea tukuruptin wasimanta lloqsinapaqpas hinallam allin pachasqa kananchik hinaspa tarjetatapas qasqonchikmanmi churakunanchik. Chaynata ruraspam sutillata reqsichikusun Jehová Diospa Testigon kasqanchikta hinaspapas rikuwaqninchikkunam ñoqanchikmanta allinta rimanqaku.
7. ¿Imanasqataq tanteakuchwan asambleapi imapipas yanapakunapaq?
7 Yanapakuqkunatam necesitakun. Asamblea allinta apakunanpaqqa achka yanapakuqkunatam necesitakun. ¿Qampas yanapakuwaqchu? (Sal. 110:3.) Asambleapi imapipas yanapakuspaqa Diostam yupaychachkanchik, runakunapas allintam rimanmanku. Asambleapa apakusqan localta sumaqta limpiaruptinkum admirasqallaña encargakuq runa nirqa: “Agradecekunim kay sumaq llamkasqaykichikmanta, kaytaqa manam haykapipas rikurqanichu. Runakunam niwarqa Jehová Diospa testigonkunaqa wakin runakuna hinaqa mana kasqankuta, reqsichikunkum servichikusqanku localta aswan limpiotaraq saqesqankuwan. Kay localtam llapallaykichik yanapakuspa llaqtapaq astawanraq sumaqyarachinkichik, chaytam rurarqankichik mana haykapipas reqsisqay sumaq sonqoyoq runakunawan”, nispa.
8. ¿Imatam rurayta atisun asambleapa apakusqan llaqtapi kaspaqa?
8 Allinmi predicananchikpaq. Asamblea apakusqan llaqtapiqa runakunam qawanqaku qasqonpi tarjetayoq allin pachasqa runakunata. Chaymi runakunaqa yachayta munanmanku, hinaptinmi asambleamanta rimayta atichwan. Tawa watachayoq warmacham restauranteman rispan chaskisqan qellqata aparqa hinaspam mikuy serviqman qawaykachirqa, hinaptinmi tayta-mamanqa mikuy serviqta asambleaman invitarqaku.
9. Jesuspa familian hina, ¿imaynatam ñoqanchikpas asambleanchikkuna chaninchasqanchikta qawachichwan?
9 Diosta yupaychanankupaq fiestakunataqa ancha kusikuywanmi Diosman sonqo judiokunaqa suyarqaku (Deu. 16:15). Jesuspa familianqa anchatam kusikurqaku chay fiestakunaman rinankupaq tukuy rurasqankuwanqa, hinaspa yachachikuyninkunata chaskisqankuwanpas. Ñoqanchikpas anchatam chaninchanchik kimsa punchaw asambleanchikta, kuyakuq Jehová Diospa regalon kasqanrayku (Sant. 1:17). ¡Kunanmantapachayá tiempochakuy chay asambleapi kusikuywan Jehová Diosta yupaychanaykipaq!
[6 hinaspa 7 kaq paginakunapi recuadro]
Kimsa punchaw asambleapaq yuyarichiykuna
◼ Imayna kananmanta. Kay watapi runa simipi asambleaqa iskay punchawmi kanqa. Punkukunañataqmi kichakunqa 8.00 madrugawta. Uyarinallapaq taki qallaykuptinqa llapallanchikmi tiyananchikña respetowan asamblea qallaykunanpaq.
◼ Carrokuna sayananmanta. Asamblea apakunanpaq localta alquilaptinchik carrokunapa sayanan sitiotawan qowaptinchikqa, manam pagasunchu carrokuna sayasqanmantaqa. Mana puriqkunapaq sapaqchasqa lawpiqa, paykunata apamuq carrokunallam sayananku. Chay carrokunapa sayanan sitiokuna mana hatun kasqanraykum, kallpanchakusun asambleaman huk carrollapi achka rinanchikpaq.
◼ Tiyananchikkunamanta. Maypi tiyananchiktaqa rakichwanmi carropi riqmasillanchikkunapaq, otaq wasipi yachaqmasillanchikkunapaq hinaspa Bibliamanta yachachisqanchikkunapaq (1 Cor. 13:5). Piensananchikmi yuyaqña hinaspa onqoq iñiqmasinchikkunapi chaynataq wamaqllaraq hamuqkunapipas.
◼ Qoqawninchikmanta. Allinmi kanman qoqawninchikta apakuyninchikqa, chaynapi chawpi punchawta mikuy rantiq mana lloqsinanchikpaq. Tiyananchikpa ukunpi kamaqllatam qoqawnikitaqa apawaq. Manam apanachu hatun qepikunataqa nitaq pakina kaqkunatapas.
◼ Qollqewan yanapakuymanta. Asambleamanta agradecekuyninchiktam qawachichwan Salonpi otaq hina asambleapi cajakunaman sonqomanta qollqenchikta churaspa, chaynapi enteron pachapi predicacionta yanapanapaq.
◼ Imapas kaptin. Asambleapi qonqayllamanta imapas pasakuptin otaq pipas onqoruptinqa chaypi kaq chaskiqmanmi (acomodador) willanayki, payñataq Primeros Auxilios nisqaman willanqa paykunaña atiendenankupaq.
◼ Zapatomanta. Sapa watam asambleapi urmanku zapatonku mana allin kasqanrayku. Chaymi zapatonchiktaqa allinta akllananchik gradasnintakama purispapas mana urmananchikpaq.
◼ Mana allin uyariqkunapaq. Wakin asambleakunapim discursokuna uyarikunqa radiopi localpa muyuriqninpi (FM). Chayna kaptinqa asamblea qallariytam willakamunqa radiopi imayna tarinamanta. Kayta allinta servichikunapaqqa audifonoyoq taksa radiotam apana rinrillanchikpi uyarinapaq.
◼ Discurso grabanamanta. Grabadorata apaspaqa manam asamblea localpi corrientemanqa hapichinachu. Manataqmi hukkunapa uyarisqankutapas pantachinachu.
◼ Wawakunata tanqanapaq kaqkunamanta. Wawakunata tanqanapaq kaqkunataqa manam asambleamanqa apanachu. Wawakunapa tiyanan sillachata apana kaptinqa, apanmankum tayta-mamankupa chawpinpi otaq waqtanpi kamaqllata.
◼ Sírvase visitar nisqa papelmanta. Allinmi kanman hukta otaq iskayta Sírvase visitar (S-43) nisqa papelta apayninchikqa, chaynapi asambleapa apakusqan lawpi predicaspanchik yachay munaqkunapa sutintawan maypi yachasqanta qellqananchikpaq. Kay papeltam congregacionpi secretarioman qochwan (qawariy noviembre 2009 Diospaq Llamkayninchik qellqapa 4 paginanta).
◼ Samapakuymanta. Wasinchikpi samachiyta munaspaqa congregacionpi secretariowanmi rimachwan hinaspam samachinapaq papelta qellqananchik. Sichum huk llaqtapi asambleaman rinayki kaptinqa hinaspa samapakuyta necesitaspaykiqa congregacionpi secretario iñiqmasinchikwanmi rimanayki hinaspam samapakuymanta papelta huntaspa qonayki, payñataqmi asamblea apakusqan llaqtapi encargakuqkunaman apachinqa. Manam asamblea chayamunantaraqchu suyanayki samapakuyta mañakunaykipaqqa, samapakuymanta encargakuq iñiqmasinchiktam sasachawaq (1 Cor. 14:40). Churi-wawankunawan samapakuspankuqa samachiqpa wasintam respetananku hinaspam mana imantapas hapipunankuchu nitaq mana yaykuna kaqmanpas yaykunankuchu. Yuyariy, samapakuna wasiqa asamblea punchawkunallapaqmi. Manachá allinchu kanman riy munasqanchik sitiokunaman rinapaq nitaq ima asuntonchik ruranapaqpas hinalla samapakuyqa.
◼ Yanapakunamanta. Asambleapiqa aswan kusisqam tarikusun allin apakunanpaq imapipas yanapakuspa (Hech. 20:35). Lliw yanapakuy munaqkunaqa rinanmi Servicio Voluntario nisqaman. Manaraq 16 watanpi kaq warmakunapas yanapakunmankum, ichaqa tayta-mamanwanmi otaq payta cuidaq iñiqmasinchikwanmi rinanku.