¿Atichwanchu runakunapa tiempon kasqanman hina predicayta?
1. ¿Imanasqataq arreglokunata rurananchik tutaykuqtapas predicanapaq?
1 Cheqap cristianokunaqa Jesuspa kamachikusqantam sonqomanta kasukuyta munanchik ‘challwachkaq hina runakunataña huñunanchikpaq’ (Mat. 4:19). Challwirukuna hinam, ñoqanchikpas runakunata challwachkaq hina “hapisun” predicanapaq allin arreglota ruraspa wasinkupi tarinanchikrayku. Huk lawkunapiqa manam sasachu runakunata tutaykuqta tariyqa, chaymi ichapas tiempoyoq kasqankurayku chaskiykuwachwan. ¿Imanasqataq arreglokunata mana ruranchikchu tutaykuqtapas predicanapaq? (1 Cor. 9:23.)
2. ¿Imaynatawanmi runamasinchikkunaman apachwan Diosmanta allin noticiakunata?
2 Tutaykuqta predicayninchik: Allin arreglokunata tutaykuqta predicanapaq ruraspanchikqa, achka runakunamanmi predicayta atichwan (Pro. 21:5). Mozo-sipaskunam predicanmanku clasenkuta tukuspanku, llamkaqkunañataqmi llamkayninkuta tukuspanku. Wakin estudio de libro nisqanpi huñunakuqkunam predicanmanku huk hora manaraq huñunakuchkaptinku.
3. ¿Imaymana predicanapaqtaq tutaykuqta lloqsichwan?
3 Wasin wasin tutaykuqta predicaspaqa atichwanmi parlayta mana wasinkupi punchaw tarisqanchikkunawan. Achka predicananchik lawpim, tutaykuqta callekunapi predicayta atichwan otaq imayniraqta predicaspapas. Chaymantapas, achka wawqe-paninchikkunam chisinkuyta allintapuni qawanku revisitakunata ruranankupaq hinaspa Bibliamanta estudiokunatapas qallarinankupaq.
4. ¿Imanasqataq allin tanteaq hinaspa respetaq runa kananchik tutaykuqllata predicaptinchik?
4 Allin tanteaq runa kasun: Tutaykuqta predicayta munaspaqa, allin yuyayniyoqmi kananchik. Allinmi kanman tutaykuqllata predicayqa, runamasinchikpa puñunankupaqña allichakusqankuta mana sasachanapaq (Fili. 4:5). Punkuta takaspaqa, qawawananchikpaq hinam sayananchik hinaspam pi kasqanchikta ninanchik. Chaymantañataq willasunchik imaraykum watukuchkanchik. Mana tiempoyoq kasqankuta musyaspanchikqa, ichapas mikusqankurayku, nichwanmi huk kutipiña kutimunapaq. Hina respetoyoq runam kananchik runamasinchikkunawanqa (Mat. 7:12).
5. ¿Imaynatam tutaykuqta predicaspa peligrokunamanta cuidakuchwan?
5 Chaymantapas peligrokunamantam musyakunachik. Tutaykuqta predicaspaqa, allinmi kanman iska-iskaymanta otaq achkanpi predicayqa. Achkiyoq callekunapim predicananchik, manam karu lawpichu aswanqa seguro kananchik lawpim. Chaynallataqmi, tutapi peligro kaq lawkunamanta karunchakunanchik (Pro. 22:3).
6. ¿Ima yanapakuytaraqmi chaskisun tutaykuchkaqta predicacionman lloqsispaqa?
6 Tutaykuqta predicaymi yanapawanchik precursor regular hinaspa precursor auxiliar kaqkunawan predicanapaq (Rom. 1:12). Chaynaqa, ¿atichwanchu runakunapa tiempon kasqanman hina tutaykuqta predicayta?