Jehová Diosqa bendecinmi yanapakuy munayninchikta
1. ¿Imaynatam qawachirqaku Davidwan Nehemiaspas yanapakuy munasqankuta?
1 Goliat sutiyoq runa Israelpa tropankunata burlakuptinmi Israelpa mayqan soldadonpas peleananpaq rinman karqa. Ichaqa oveja michiq mana guerrakunapi peleaq huk mozom riyta munarqa paywan peleananpaq (1 Sam. 17:32). Chaynataqmi Israel runakuna Jerusalén llaqtanman kutispanku llaqtapa perqankunata mana hatarichiptinkum; Persia nacionpi reyman vino serviq runam palaciopi llamkayninta saqeykuspan riyta munarqa chay llamkay allinta rurakunanpaq (Neh. 2:5). Jehová Diosmi kay iskay runakunata, Davidtawan Nehemiasta, bendecirqa yanapakuy munasqankumanta (1 Sam. 17:45, 50; Neh. 6:15, 16).
2. ¿Imanasqam cristianoqa yanapakuy munayniyoq kanan?
2 Kay ‘tukupay tiempokunapiqa’ manam kanchu yanapakunapaq munayqa: runakunaqa rurayninkullapim afanasqa kachkanku hinaspa ‘kikillankupaq munaqkunam’ kanku (2 Tim. 3:1, 2). Pipas rurasqallanpi afanakuptinqa manapaschá atinmanchu necesitaqkunata yanapaytaqa. Runakunamantaqa, cristianokunaqa Jesustam qatikuyta munanchik, paypunim kikinmanta runakunata yanapayta munarqa (Juan 5:5-9; 13:12-15; 1 Ped. 2:21). Chaynaqa, ¿imaynatam yanapakuy munayninchikta qawachichwan, hinaspa ima bendicionkunatam chaskichwan?
3. ¿Imapim yanapawanchikman yanapakuy munayninchik?
3 Wawqe-paninchikkunarayku: Huñunakuykunapi tapukuykunata kutichiptinchikmi iñiqmasinchikkunata rimasqanchikwan kallpanchanchik (Rom. 1:11). Huñunakuyninchikpi rimayqa Jehová Diostam hatunchan, astawanmi cheqap yachachikuykuna yuyayninchikpi hinaspa sonqonchikpipas takyan chaynataq huñunakuypipas anchata kusirichiwanchik (Sal. 26:12). Chaymantapas, Diosmanta Willakunapaq Yachachiq Escuela huñunakuyman mana discursaq hamuptinqa, niykuchwanmi ñoqanchikña rurananchikpaq, chay rurayninchiktaqmi yanapawanchik aswan allin yachachiq kanapaq.
4. ¿Imaynatawanmi yanapakuy munayninchikta qawachichwan?
4 Qarikunam yanapakuy munayninkuta qawachinmanku congregacionpi ruraykunapi astawan yanapakuspanku (Isa. 32:2; 1 Tim. 3:1). Llapanchikmi asambleakuna rurakunanpaqqa yanapakunchik imaymana ruraykunapi yanapakuspa. Tukuy sonqonchikwan circuito superintendente wawqenchikwan predicaypi llamkaptinchikpas otaq mikuyta invitaykuptinchikpas ‘kallpanchanakunchikmi’ (Rom. 1:12). Chaynataq mana tayta-mamayoqkunata, viudakunata, onqoq wawqe-paninchikkunata, wawachayoq mamakunata hinaspa congregacionpi hukkunatapas kikinchikmanta yanapaptinchikmi kusikuyta tarinchik chaynataq Jehová Diospa favornintapas chaskinchik (Pro. 19:17; Hech. 20:35).
5. ¿Ima ruraykunapaqmi necesitakun ancha yanapakuy munaqkunata?
5 Chaymantapas tiemponchiktawan kallpanchiktam servichikuchwan Huñunakunanchik Salonta limpiaspa hinaspa sumaqllaña qawakunanpaq yanapakuspapas. Hinaspapas achkallaña runakuna Jehová Diospa llaqtanman yaykumusqankuraykum, necesitakun Huñunakunapaq Salonkunata hinaspa chayta ruranankupaq yanapakuqkunatapas. Warminpiwan huk wawqenchikmi mana wasi rurayta yachachkaspankupas yanapakuyta munarqaku Grupo de Construcción de Salones del Reino, nisqanpi. Imayna ruranankuta yacharachikuspankum kunanqa ladrillowan perqaspanku yanapakuchkanku. Warminmi nin: “Turi-ñañaykunawan llamkaptiykum sumaq amistadta ruraruniku. Sapa punchaw llamkaspa pisipasqa tukuptiykupas espiritualpim ichaqa ancha kallpanchasqa kaniku”.
6. ¿Imaraykum nichwan Bibliamanta yachachiyqa ancha allin kasqanta?
6 Predicaspa: Kunan punchawkunapiqa Jehová Diospa Munaychakusqanmanta willakuymi ancha allin llamkayqa. Runamasinchikta Bibliapa nisqanta yachananpaq hinaspa rurayman churananpaq yanapaptinchikmi, imarayku kawsasqanta musyakun, kallpanchakuntaqmi mana allin costumbrekunata atipananpaq hinaspa yachantaqmi hamuq tiempopaq Diospa sumaq promesankunamantapas. Bibliamanta runamasinchikta yachachiptinchikmi kusikuywan mana qollqepaq hinaspa wiñay allinninkupaq yanapachkanchik (Juan 17:3; 1 Tim. 4:16). Ichapas musyakuchwan precursor auxiliar otaq precursor regular hina kayta otaq maypi mana achka predicaqkuna kasqanman rinanchikpaq chaynataq huk rimayta yachananchikpaqpas.
7. ¿Imanasqam ancha allin kunan tiempo yanapakuy munayniyoq kayqa?
7 Rey Davidmi nirqa Señorninchik Jesucristo kamachikuyninta qallariptin, Jehová Diospa llaqtanpi ‘runankuna entregakunankumanta’ (Sal. 110:3). Jehová Dios espiritualpi cosechata utqayman rurachisqanraykum yanapakunapaq achka llamkay kachkan (Isa. 60:22). ¿Ninkichu qam: “¡Kayqaya ñoqa kaypi kachkani! [...] Ñoqatayá kachaway”, nispa? (Isa. 6:8.) Segurom kachwan yanapakuy munayninchikqa Jehová Diostam kusichin hinaspam achka bendicionkunatapas chaskinchik.