Reinomanta willayqa anchata kusikunapaq privilegiom
1 Sapa punchawmi wara-waranqanpi runakunaqa kusikunku Jehová Diospa kuyakuywan kawsakunapaq tukuy imapas qosqanmanta (Mat. 5:45). Ichaqa, aslla runakunam Unanchaqninchikta agradecekuspanku kusikuchkanku Reinonmanta allin willakuykunata willaspa (Mat. 24:14). ¿Chaninchanchikchu ñoqanchikqa kay hatun privilegiota?
2 Reinomanta willayqa Diosta hatunchanmi hinaspa llakisqa runakunata suyakuytawan hawkayaytapas tarichin kay sasachakuy tiempokunapi (Heb. 13:15). Chaymantapas, chay willakuykunata kasukuqkunaqa wiñay kawsaytam chaskikunqaku (Juan 17:3). Kay pachapi, ¿ima llamkaytaq otaq ima profesiontaq chayna bendecionkunata tarichiwanchikman? Apóstol Pabloqa willakuytaqa anchata kuyasqantam qawachirqa chay ruraypi kallpanchakuspanmi. Paypaqqa qori hinam karqa (Hech. 20:20, 21, 24; 2 Cor. 4:1, 7).
3 Anchata chaninchasunchik hatun privilegionchikta. Predicacionta anchata kuyasqanchiktaqa qawachisunchik chaypi alli-allinta llamkaspam. ¿Tiempotachu rakinchik uyariqninchikkunapa sonqonman chayaqta rimananchikta preparakunanchikpaq? ¿Kallpanchakunchikmanchu aswan allinta runakunata Bibliawan yachachinapaq tapukuykunawan musyachinanchikpaqpas? ¿Tukuy sonqowanchu predicachkanchik qowasqanchik territoriota? ¿Yachanchikchu imayna qallariyta hinaspa qoyta Bibliamanta estudiota? Ñawpaq hinaspa kay tiempopi cristianokuna hinam, yachanchikmi kay rurayqa ancha allin kasqanta, chaymi kallpanchawanchik tukuy sonqowan servispanchik kay privilegiota anchata chaninchananchikpaqpas (Mat. 25:14-23).
4 Consuelawanchikmi yachaspa imaynatam Jehová Dios kuyasqanta predicacionpi tukuy sonqowan kallpanchakusqanchikta, maynaña machu-payaywan, onqoywan hinaspa huk sasachakuykunawan ñakarichkaptinchikpas. Diospa Palabranqa cheqaptamá niwanchik, anchata chaninchasqanta payta servinanchikpaq kallpanchakusqanchikta, maynaña wakinkunaqa mana valorniyoq hina kaptikupas (Luc. 21:1-4).
5 Reinomanta willayqa anchatam kusichiwanchik. 92 watayoq paninchikmi nirqa: “Anchata kusichiwanmi ñoqataqa 80 watata Diosta tukuy sonqoywan servisqayqa. ¡Manapuni imallamantapas pesapakunichu! Kawsasqaypi kaqllamanta qallariyta atispayqa, hina kaqllatam rurayman, ‘Diospa kuyapakuyninqa kawsakusqaymantapas aswanraq allinmi’ ”, nispa (Sal. 63:3). Ñoqanchikpas qawachisunchik Diospa Reinonmanta willananchikpaq qowasqanchik privilegiota anchata chaninchasqanchikta.