DIOSPAQ HINA KAWSANAPAQ
Pablom iñiqmasinkunata rikuykuspan Diosta agradecekurqa
Roma llaqtaman Pablopa chayananmanta iñiqmasinkuna yacharuspankum karu llaqtachakunamanta taripaq rirqaku, wakinkuqa yaqa iskay punchaw puriytam rirqaku (64 km). ¿Imaynam Pabloqa tarikurqa iñiqmasinkunawan tupaykuspanqa? Paykunata rikuykuspanmi “Diosta agradecekuspan kallpanchasqa karqa” (Hch 28:15). Pablom iñiqmasinkunata kallpanchaqqa karqa ichaqa chay kutipim pay kallpanchasqa kayta munarqa presochasqa kasqanrayku (2Co 13:10).
Kunanpas llaqtan-llaqtan watukamuwaqninchik punta apaq iñiqmasinchikmi lliw iñiqkunata watukuspan kallpanchan. Wakinpim ichaqa paykunapas pisipasqa, llakisqa utaq hukmanyasqa tarikunku. Hinaptinqa, ¿imaynatam ñuqanchikpas watukuq iñiqmasinchikta hinaspa warmichantapas kallpanchachwan? (Ro 1:11, 12).
Kallpanchakunanchikmi Diosmanta willakuq rispanchik puntata chayanapaq. Watukuq iñiqmasinchiktaqa anchatam kallpanchan watukamuwasqanchik punchawkunapi Diosmanta willakuq rinanchikpaq kallpanchakusqanchikta qawasqanqa (1Ts 1:2, 3; 2:20). Watukamuwasqanchik killapiqa astawan Diosmanta willakunanchikpaq kallpanchakusun. Chaymantapas watukamuwaqninchik iñiqmasinchikwan utaq warmichanwanmi Diosmanta willakuq richwan utaq bibliamanta yachachiqpas. Ichapas wakinpiqa nichwan chayllaraq Diosmanta willakusqanchikta utaq willakuyta mana yachasqanchikta, ichaqa amayá chayna nisqanchikwanqa harkachikusunchu. Paykunaqa munankum llapallanchikwan lluqsiyta.
Qukuykuqyá kasun. Wasinchikpim samaykachichwan hinaspa mikuykachichwan. Kayta ruwaspam kuyakuyninchikta qawachisunchik. Chaymantapas paykunaqa manam tukuy imataraqchu suyanku (Lc 10:38-42).
Niwasqanchikkunata uyarikusun. Watukuq iñiqmasinchikqa kuyakuywanmi yanapawanchik Jehova Diosta hinalla yupaychanapaq. Yaqapaschá wakinpiqa allinninchikta munaspan imamantapas anyawasun (1Co 5:1-5). Sichu niwasqanchikkunata kasukuptinchikqa payqa kusisqam yanapawasunchik (Heb 13:17).
Agradecekuq kasun. LLaqtan-llaqtan watukuq iñiqmasinchikta hinaspa warmichantam agradecekuchwan “allintam yanapaykuwankiku” niykuspa hinaspa imachallanchiktapas quykuspa (Col 3:15).