‘Willakusunchikyá allin noticiamantaqa’
1. ¿Ima allin notiaciakunataq kan runamasinchikunaman willananchikpaq?
1 Kay pachapi llakikunallapaq noticiakuna kaptinpas, favorecesqam kanchik ‘willakunanchikpaq Diospa favorninmanta allin noticiakunata’ (Hech. 20:24). Munanchikmi runamasinchikman willayta kay ‘tukupay tiempo’ tukuptinqa Jehová Diospa prometesqan mosoq pacha kananta, chaymi ‘ñawpaq kaqkunaqa pasanqaña’ (2 Tim. 3:1-5; Apo. 21:4). Willananchiktaqmi onqoykuna manaña kananmanta (Isa. 33:24); Diospa yuyayninpi kaq wañukuqkunapas kawsarimuspan familianwan hinaspa amistadninkunawan tupaykunankuta (Juan 5:28, 29); Allpantinpi suma-sumaq paraiso kananmanta (Isa. 65:21-23), ¡chaynataq wakin allin noticiakunamantapas! Willaytam munanchik.
2. ¿Imanasqataq Jesuspa wañukusqanta yuyarinapaq killakunaqa allinpuni kanman allin noticiakunamanta willakunapaq?
2 Marzo, abril hinaspa mayo killakunapim allinpuni kanqa Diosmanta allin noticiakunata willakunanchikpaq, yaqa enteron pachapim chay killakunapi astawan predicananchikpaq allin tiempo kanqa. Chaymantapas Jesuspa wañukusqanmanta allpantinpi Yuyariymi rurakunqa marzo killapa 22 kaq punchawninta Inti seqaykusqan qepata. Chaymi, kunanmantapacha kallpanchakunanchik astawan predicananchikpaq.
3. ¿Ima ruraytaq familiapi yanapanqa astawan predicanankupaq?
3 Precursor auxiliar hina servispa: ¿Atiwaqchu allin arreglokunata ruraspa huk, iskay otaq kimsa killa precursor auxiliar hina servinaykipaq? ¿Manachu familiaykiwan Bibliamanta estudiasqaykichikpi kaymanta rimawaqchik? Familiapi yanapanakuspaqa atiwaqchikmi mayqannikichikpas otaq llapaykichikpas precursor hina kayta (Pro. 15:22). Oracionpiyá Jehová Diosta mañakuychik, Chayna kallpanchakusqaykichiktam bendecinqa (Pro. 16:3). Familiapi mayqannikichikpas precursor kayta mana atispaqa, kallpanchakuwaqchikmi precursor kaqkunawan astawan predicanaykichikpaq.
4. ¿Ima arreglokunatataq rurawaq precursor auxiliar hina servinaykipaq tukuy punchaw llamkaspaykiqa?
4 Tukuy punchaw llamkaspaykiqa, allin arreglota ruraspam atiwaq precursor auxiliar hina serviyta. Ejemplopaq, docesqayki horapipas predicawaqmi. Encargasqa wawqenchiktam predicanaykipaq sitiota mañakuwaq llamkasqayki lawpi otaq wasikipa hichpankunapi predicanaykipaq huk hora hina llamkasqaykiman manaraq rispa otaq kutimuspapas. Chaymantapas tiempochakuwaqmi chay killapi wakin ruranaykikunata huknin killapiña ruraspa otaq sabadonpi, domingonpi tiempochakuspa tukuy punchaw predicawaq. Chaymantapas wakin wawqenchikunaqa llamkasqankumantam huk otaq iskay punchaw hina permisakunku predicanankupaq.
5. ¿Imaynatataq yanapachwan yuyaq otaq onqoq wawqe-paninchikkunata precursor auxiliar hina servinankupaq?
5 ¿Yuyaqñachu, onqoqchu otaq kallpaykichu pisyarunña? Atiwaqraqmi precursor kayta sapa punchaw atisqaykiman hina predicaspayki. Jehová Diosta mañakuy ‘hatu-hatun atiyninwan’ yanapasunaykipaq (2 Cor. 4:7). ¡106 watayoq paninchikmi precursora kayta atirqa! Admirakuypaqmi, familiankunawan hinaspa wakin wawqe-panikunapa yanapasqanwan wasin-wasin predicarqa, Bibliamanta yachay munaqkunamanpas watukurqa, Bibliamanta estudiachiqpas rirqam hinaspa atisqanman hinam maypipas predicarqa. Bibliamanta chunka estudiokunatapas qorqa. Nirqataqmi: “Precursor auxiliar hina servisqay mayna sumaqllaña kasqanta yuyarispaymi Jehová Diosta, Churinta chaynataq kuyakuq llaqtanta sonqoymantapuni kusisqa agradecekuni” nispa.
6. ¿Imaynatataq bautizasqa warmakunaqa escuelapi kaspapas precursor auxiliar hina servinmanku?
6 Escuelapi estudiachkaspa bautizasqaña kaspaykiqa atiwaqmi precursor auxiliar hina serviyta. Imaynam tukuy punchaw llamkaq arreglonta rurarqa chaynatam qampas tiempochakuwaq sabadonpi, domingonpi astawan predicanaykipaq chaynataq semanapi mayqen punchawpas lloqsiwaqmi predicaq. ¿Kachkanchu escueylaykipi mayqan feriado punchawkunapas predicanaykipaq? Precursor auxiliar hina serviyta munaspaykiqa tayta-mamaykiwan rimariy.
7. ¿Imatam ancianokunaqa ruranmanku predicacionta kallpanchanankupaq Jesuspa wañukusqanta Yuyarinapaq sapaqchasqa killakunapi?
7 Predicanapaq kallpanchay: Congregacionpi ancianokunapa ejemplonmi wawqe-panikunata anchata yanapan (1 Ped. 5:2, 3). Predicanapaq huñunakuykuna kananpaqmi arreglokuna kanan, tutamanta tiempochakuqpaq, escuelamanta lloqsispa otaq llamkay tukuyta lloqsimuqkunapaqpas. Predicacionmanta cuentallikuq ancianom arreglota ruranan akllasqan wawqekuna predicacionpaq huñunakuyta diriginanpaq chaynataq predicanankupaq sitiokunata, revistakunata hinaspa sapaqchasqa killakunapaq Bibliamanta qellqakunatapas.
8. ¿Imatam yachanchik huk congregaciopi rurasqankumanta?
8 Huk congregacionpi ancianokunam ñawpan killakunamantaraq kallpancharqaku precursor auxiliar hina servinankupaq, hinaptinmi sapa semana willaqku hayka wawqe-paninchikkunañam precursor auxiliar hina servinankupaq aprobasqa kasqankuta. Chaynata ruraptinkum astawan predicay munaq wawqe-paninchikkunaqa kallpanchasqa karqaku wakin precursorkunawan predicanankupaq. Ancianokunapas arreglokunatam rurarqaku tutamanta otaq tutaykuqta predicacion kananpaq. Chayna rurasqankuwanmi abril killapi karqa 53 precursor auxiliarkuna, ¡congregacionpa yaqa parten!
9. ¿Imanasqataq Jesuspa wañukusqanta Yuyarinapaq sapaqchasqa killakunapiqa ancha allinmi kanman chayllaraq predicay qallariqkuna Diospa allin noticianmanta willakunankupaq?
9 Hukkunata yanapay predicananpaq: Biblia estudiaqkuna otaq wawqe-panikunapa churinkuna predicacionpaq aprobasqa kaptinkuqa predicanmankum unay tiempoña predicaqkunawan. Jesuspa wañukusqanta Yuyarinapaq sapaqchasqa killakunapiqa achka wawqe-panikunam astawanraq predicanqaku, chaymi ancha allinqa kanqa. ¿Kachkanchu Bibliamanta estudiachisqayki Jehová Diospa yachachisqanman hina vidanta cambiaspa kallpanchakuq? ¿Allintachu churikichikqa kallpanchakuchkanku Bibliapa nisqanman hina kawsasqankupi ichaqa manaraqchu predicanku? Mayqenninpas predicaytaña munaptinqa hinaspa Bibliapa yachachisqanman hina kawsaptinkuqa congregacionpi ancianowanmi rimawaq. Presidente kaq ancianom arreglota ruranqa iskay ancianokuna qanwan churikipiwan otaq estudianteykiwan rimanankupaq.
10. ¿Imaynatataq ancianokunaqa yanapanmanku iñiyninkupi chiryaruqkunata?
10 Qatiqnin killakunapipas allinmi kanqa iñiyninkupi chiriyasqa wawqe-panikunata congregacionwan kaqllamanta predicanankupaq kallpanchayqa. Aslla Huñunakuspa Bibliamanta Estudio nisqa huñunakuypi yachachiq ancianom chaynataq wakin ancianokunapas kallpanchakunanku chiryasqakunaman watukuypi hinaspa predicacionman lloqsinankupaq kallpanchaypipas. Pipas unay tiempoña iñiyninpi chiryasqa kaptinqa iskay ancianokunam rimananku predicacionman kaqllamanta lloqsinanpaqqa (km-S 11/00 pág. 3).
11. ¿Imata ruraspataq astawanraq ‘Diosqa favorecerqa’ runakunataqa?
11 Jesuspa wañukusqanta yuyarinapaq alistakuy: Rantinchikpi Jesuspa wañukusqanmi astawan qawachin ‘Diospa favorninmanta’ (Hech. 20:24). Allpantinpim marzo killapa 22 kaq sabado punchawnintam Intipa seqaykusqan qepata millonninpi runakuna huñunakunqaku Cristopa wañukusqanta yuyarinankupaq. Kallpanchakunanchikmi llampu sonqo runakunata invitamunapaq kay ancha allin huñunakuypi Jehová Diosqa lliw runakunaman favorecesqanmanta yachanankupaq chaynataq atisqanchikman hina yanapasunchik rinankupaqpas.
12. ¿Pikunatataq invitamuchwan Jesuspa wañukusqanmanta Yuyarinapaq?
12 Kallpanchaykikum invitanayki kaqkunata listapi qellqanaykipaq. Paykunaqa kanman aylluykikuna, vecinoykikuna, llamkaqmasikikuna, estudiaqmasikikuna chaynataq Bibliata manaña estudiaqkuna otaq hinalla estudiaqkunatapas hinaspa sapa kuti watukusqaykikunatapas. Sichum pipas Jesucristopa wañukusqanmanta tapukuptinqa allinmi kanqa Enseña sutiyoq Libropa sapaq yachachikuyninkunapi 206-208 paginankunata Señorpa Cenanmanta astawan yachananpaq qawachiwaq. Chaymanta parlaspanchikqa Bibliamanta yachachiytapaschá qallarichwan, chaynataq Bibliamanta yachachinanchik librotapas qochwan.
13. ¿Imaynatam Jehová Diosqa bendecirqa iskay wawqe-paninchikkunata Jesuspa wañukusqanta Yuyarinapaq invitaypi kallpanchakusqankuta?
13 Huk paninchikpa listanpim 48 ayllunkuna kasqa. Sapakamaman invitacionta apaspanmi sutinkuta listanmanta rayaspan qellqarqa imay punchaw chay rurasqanta. ¡Anchatam kusikurqa 26 invitasqankuna Jesuspa wañukusqanta yuyarinankupaq riruptinku! Huk wawqenchikpas tiendanpi llamkaqtam invitarqa, chay runaqa ñawpaqtas tayta cura kasqa. Invitasqanwan rispanmi, chaymanta nirqa: “Huk horallapim Bibliamanta astawan yacharurqani Catolica Iglesiapi kimsa chunka wata kasqaymantaqa” nispa. Chay qepallatam Enseña sutiyoq librowan Biblia estudiayta qallarirqa.
14. ¿Ima sumaq arreglotaq allpantinpi qallarinqa marzo killapa 1 kaq punchawninmanta?
14 Sapaqchasqa killapi predicanapaq sumaq arreglo: Marzo killapa sabado 1 kaq punchawninmantam 22 kaq punchwkama allpantinpi arreglo kanqa invitacionta runamasinchikman apanapaq. Llapanchikchá chayta rurananchikpaqqa kallpanchakusunchik, ¿aw? Ichaqa wasipa punkunpi invitacionta saqenanchikmantaqa kikin runamanmi qonanchik. Predicanapaq lawkuna achka kaptinqa hinaspa wasiyoqkunata mana tarispanchikqa invitacionta saqechwanmi wasiyoq tarinankupaq hina sitiopi sichum congregacionpi ancianokuna niptinkuqa. Sabado-domingotaqa revistakunawanmi predicakasun.
15. ¿Imaynatataq Jesuspa wañukusqanmanta Yuyarinapaq invitacionta qochwan?
15 Chay sumaq arregloqa manam unay tiempochu kanqa, chaymi pisillata rimaspa kusisqalla invitananchik. Invitawaqmi kaynata nispa: “Munachkanikum qampas, aylluykipas chaynataq amistadnikikunapas Marzo killapa 22 kaq punchawninpi ancha allin huñunakuyman hamunaykichikpaq. Qampaqmi kay invitacionqa. Kaypim chay huñunakuymanta astawan yachanki” nispa. Wakiqnin runakunaqa tapuwasunpaschá; hukkunaqa manam chaskiyllachu chaskiwasun aswanqa hamunankupaqmi niwasunchik. Interesakuqkunaman watukunaykipaq qellqanaykim sutinta hinaspa maypi yachasqantapas chaynataq niwaqtaqmi haykapi kutinaykitapas.
16. ¿Ima experienciataq yachachin predicasqanchik lawpi Jesuspa wañusqanmanta Yuyarinapaq invitasqanchikqa allin kasqanta?
16 Qayna watam huk soldado wasinpa punkunpi tarirurqa Jesuspa wañukusqanmanta Yuyarinapaq invitacionta. Chayman riyta munaspanmi kamachiqnin sargentota permisakurqa. Chay invitacionta sargento qawaykuspanmi upallalla karqa; chaymantam nirqa tayta-maman Jehová Diospa Testigon kasqanta hinaspa paykunawan huñunakuyman risqanmanta. Chaymi manam soldadollantachu permisaykurqa aswanqa kuskankum Jesuspa wañusqanta Yuyarinapaq rirqaku.
17. ¿Imata ruraspam qawachichwan Jehová Diospa favorecewasqanchikmanta?
17 Agradecekusqaykita qawachiy: Jesuspa wañukusqanmanta 2008 watapi Yuyarinapaq hichpaykamusqanrayku, allinpunim kanman Jehová Diospa favorecewasqanchikmanta yuyaymanayqa. Apostol Pablom qellqarqa: “Ruegakamuykiku, amayá despreciaychikchu Diospa hatun favornintaqa” nispa (2 Cor. 6:1). Chaymi munanchikpuni Diospa favorninmanta willakuyta, ¿imaynatataq chaytaqa rurachwan? Pablom nin: “Aswanqa lliwpim qawachikuniku Dios serviq kasqaykuta” nispa (2 Cor. 6:4). Chaynamiki, allin rurayninchikwan chaynataq Diospa allin noticiakunamanta predicaspa qawachinchik Jehová Diospa favorninkunamanta agredecekusqanchikta. Chaymi Jesuspa wañukasqanmanta Yuyarinapaq killakunaqa ancha allinmi kanqa Diospa allin noticiankunamanta astawan willakunanchikpaq.
[3 kaq paginapi recuadro]
¿Pikunataq precursor auxiliar hina kanankupaq piensanmanku?
◼ Familiapi kaqkuna
◼ Tukuy punchaw llamkaqkuna
◼ Yuyaqkuna otaq onqoqkunapas
◼ Escuelapi kaqkuna
[4 kaq paginapi recuadro]
Jesuspa wañukusqanmanta Yuyarinapaq invitaspaykiqa:
◼ Kusisqa pisillata rimay
◼ Interesakuq runakunapa sutinta hinaspa maypi yachasqanta qellqay kutinaykipaq
◼ Sabado-domingonpi revistakunawan predicay