¡Sapaqchasqa willakuymi kanqa! 20 octubremanta 16 noviembrekama
1 Octubre killapa 20 punchawninmantam ¿Munawaqchu cheqapmanta yachayta? niq qellqawan tawa semanapuni Allpantinpi yachachisunchik. Kay qellqawanmi Diospa cheqap yachachikuyninmanta runakunaman astawan yachachisunchik (Juan 17:17).
2 Kay mosoq qellqam kutichinqa kayna tapukuykunata: ¿Nanachikunchu Dios ñoqanchikmanta? ¿Haykapipas tukunqachu guerrakuna hinaspa ñakariypas? ¿Imataq pasawanchik wañuptinchik? ¿Kanmanchu ima suyakuypas wañusqakunapaq? ¿Imaynatam mañakunanchik Dios uyariwananchikpaq? hinaspa ¿Imata ruraspataq kusisqa kachwan? Kayna tapukuykunataqa manam religioso runakunapas allinniqtaqa kutichiyta atinkuchu. Bibliapa kutichisqanta mana yachachkaspankupas kaynataqa tapukunkum Cristopi mana iñiqkunapas. Chaymi kay qellqapa yachachikuyninmantaqa yachaytapuni munanqaku.
3 Lliwman willasun: Wasin-wasinmi lliwman willananchik. Predicananchik law llumpay hatun kaptinqa ancianokunam tanteananku wasiyoq mana kaptinqa qellqata saqenanchikpaqña. Mana qonqaspam qonanchik ayllunchikman, vecinonchikman, llamkaqmasinchikman, escuelapi kaq masinchikman hinaspa hukkunamanpas. ¿Atiwaqchu octubre otaq noviembre killapi precursor auxiliar kayta? Sichu wawa-churiki otaq Bibliamanta estudiachisqayki iñiyninpi ñawpariptinqa ancianokunawanmi rimawaqchik manaraq bautizakuchkaspa Diosmanta willakunankupaqña.
4 Imanispa: Lliw runakunaman yachachinanchikraykum mana unayta rimaspalla qellqapi mayqen tapukuytapas servichikuspa chaymanta kutichikuyninwan yachachichwan. Chayta ruraspaqa mana sasachakuspallam yachachisunchik. Pipas yachayta munaptinqa kutinaykipaq sutinta hinaspa maypi yachasqanta qellqay. Sabadonpi hinaspa domingonpiqa revistawan kuskatam mosoq qellqataqa qochwan. 16 noviembre killamantam ichaqa Yachachiq librotaña servichikusunchik chay puchuq qellqatañataqmi wakin qellqakunata hinaña servichikusunchik.
5 Bibliamanta estudiachinapaq: Kay qellqaqa Bibliamanta estudiachiyta qallarichinapaqmi rurasqa kachkan. ¿Imaynata qallarichwan? Kaqmanta watukuspam tapuchwan mayqen yachachikuynin yanapasqanmanta hinaspam qellqapa tukupayninpi Biblia estudianamanta yachachispa, Yachachiq librota qochwan. Munaptinqa yachachiwaqmi libropa iskay-kimsa parrafollantapas qellqapa yachachisqanman tupaqta.
6 Jehová Diosmi niwanchik ‘cheqap espiritupi yupaychay’ munaqkunata maskananchikpaq (Juan 4:23). Diosmanta yachanankuta munaspaqa ¡willakusunchikyá!