Congregacionpi huñunakuykunapaq mosoq programa
1, 2. ¿Imaynañataq kanqa 2009 watapi enero killamantapacha huñunakuyninchikkuna?
1 Kay 2008 watapi abril killapa 21-27 punchawninkunapim allpantinpi Jehová Diospa testigonkunapaq kayna suma-sumaq willakuy karqa: “Aslla Huñunakuspa Bibliamanta Estudio nisqa huñunakuymi 2009 watapi enero killamantapacha kuskaña rurakunqa Diosmanta Willanapaq Yachachiq Escuelawan hinaspa Diosta Servinapaq Yachachiq huñunakuypiwan. Aslla Huñunakuspa Bibliamanta Estudio nisqa huñunakuyqa sutichakunqa Biblia Estudianapaq Huñunakuy nispañam”.
2 Hukllapi kimsa huñunakuymanta: Kay kimsa huñunakuymi kanqa huk hora tawa chunka pichqayoq minutolla, takikunawan oracionkunapiwan. Qallarinqam takiwan oracionpiwan (5 min.) hinaspam Biblia Estudianapaq Huñunakuy rurakunqa (25 min.). Chaymantam kanqa Diosmanta Willanapaq Yachachiq Escuela (30 min.). Qatiqninmanñataq takita takisun (5 min.) hinaspam Diosta Servinapaq Yachachiq Huñunakuy qallarinqa (35 min.). Tukunqañataqmi takiwan hinaspa oracionpiwan (5 min.). Chay huñunakuykuna rurakunanpaqmi sapa killa programa lloqsimunqa Reinopaq Servicionchikpi, chaynapi allinta preparakunanchikpaq.
3. ¿Imaynatataq Biblia Estudianapaq Huñunakuyqa rurakunqa?
3 Biblia Estudianapaq Huñunakuymanta: Llaqta Cuidaq revistata hinam estudiasunchik. Pasaq semanapi estudiasqanchiktaqa manañam rimasunñachu, aswanqa pisillata rimaspam qallarina. Chaynapi huñunakuypi kaqkuna astawan rimarinankupaq. Presidente kaq ancianom ruranqa huk programata sapa semana huk anciano chay huñunakuyta rurananpaq.
4. ¿Imaynatataq rurakunqa Diosta Servinapaq Yachachiq Huñunakuyqa?
4 Diosta Servinapaq Yachachiq Huñunakuymanta: Kay huñunakuyqa hina kaqllam kanqa. Willakuykunam ichaqa pichqa minutollaña kanqa chaynapi akllasqa willakuykunatawan sucursalpa apachimusqan wakin cartakunata leenankupaq. Predicanamanta, salonninchikta chuyanchanamanta, informes de cuentas nisqamanta hinaspa sucursalpa apachimusqan cartakunataqa manañam willakunqañachu aswanqa tableropiñam churasqa kanqa sapakama qawanankupaq. Kay huñunakuypi discurso qoqkunaqa allintam preparakunanku, tiempollanpim tukunanku hinaspa imayna rurananpaq nisqankuman hinam rurananku.
5. ¿Imaynataq kanqa arreglokuna congregacionkunata watukuq wawqenchik visitamuwaptinchik?
5 Congregacionta watukuq wawqenchik visitamuwaptinchik: Visitamuwasqanchik semanallapim kimsa kutita huñunakusun. Martes punchawmi kanqa Diosmanta Willanapaq Yachachiq Escuela hinaspa Diosta Servinapaq Yachachiq Huñunakuypas. Qatiqninmanñataqmi watukuq wawqenchik 30 minuto discursota qonanpaq huk takita takisun. Biblia Estudianapaq Huñunakuyqa huk punchawmi rurakunqa, chay huñunakuypa qatiqninmanmi huk takita takisun watukuq wawqenchik discurso qonanpaq. Huñunakuyqa tukunqa takiwan oracionpiwanmi.
6. ¿Imatam ruranqaku predicanapaq grupokunamanta encargakuqkuna?
6 Predicanapaq huñunakuymanta: Congregacionmanta encargasqa ancianokunam sapa grupokunapi predicanankupaq punta apaq ancianokunata akllanqaku, paykunataqmi chay grupokunapi kaqkunata iñiyninkupi kallpanchanqa. Sichum siervo ministerial chay grupomanta responsable kaptinqa “siervo de grupo” otaq predicanapaq grupokunamanta encargakuq nispam nisun.
7. ¿Imakunapitaq yanapawasun huñunakunapaq mosoq programa?
7 Kay huñunakuykunapiqa kallpanchasqa allin yachachisqam kasunchik, yanapawasuntaqmi allinta predicanapaq, allin yachachiq kanapaq hinaspa runamasinchikkuna Diosta servinankupaq allinta yanapanapaqpas (Efe. 4:13, 14; 2 Tim. 3:17).
8. ¿Imaynatataq yanapawasun huñunakuypaq allinta preparakusqanchik?
8 Kay huñunakuykunapaq allinta preparakuspanchikqa yachachikuykunatam allinta entiendesunchik, hinaspapas lliwmi rimariyta atisun chaynapi kallpanchanakunanchikpaq (Rom. 1:11, 12; Heb. 10:24). ‘Ñawpaqman risqanchikta’ qawanankuta munaspanchikqa ‘Diospa cheqap palabranmantam allinta yachachinanchik’ (1 Tim. 4:15; 2 Tim. 2:15).
9. ¿Imata rurananchikpaqmi kallpanchasqa kachkanchik, hinaspa imanasqa?
9 Anchatam kusikunchik huñunakuypaq mosoq arreglokunamanta. Chaynaqa ‘allin yuyayniyoq confianza sirvientepa’ niwasqanchikkunata kasukuspayá Señorninchik Jesucristota qatikusunchik, paymi preparawachkanchik hichpaykamuq “llumpa-llumpay ñakariy” punchawpaq (Mat. 24:21, 45; Heb. 13:20, 21; Apo. 7:14).