Diosmanta wasin-wasin willakunapaq huñunakuyqa ancha allinmi
1. ¿Imapaqmi Diosmanta willakunapaq huñunakuyqa?
1 Jesusmi 70 qatiqninkunata Diosmanta willakunankupaq manaraq kachachkaspan huñurqa (Luc. 10:1-11). Chaypim kallpancharqa Dioswan yanapasqa kasqankumanta willaspan. Chaymantapas imayna ruwanankumanta willaspanmi iskay-iskayninka rinankupaq nirqa. Kunanpas chay huñunakuyqa kallpanchawanchikmi hinaspa imayna ruwanapaqmi yachachiwanchik.
2. Abril killamantaqa, ¿hayka minutollañam wasin-wasin Diosmanta willakunapaq huñunakusun?
2 Wasin-wasin Diosmanta willakunapaq huñunakuymi 10 utaq 15 minutopi apakurqa. Chaypim Diostapas mañakuspa piwan hinaspa mayman rinanchikpaq kamachiwarqanchik. Kay abril killamantam ichaqa 5 utaq 7 minutollaña kanqa. Huñunakuyninchikpa qipallanta kaptinqa, aswan pisillaraqmi kanan huñunakuypiña kasqanchikrayku. Pisilla kaptinqa astawanmi Diosmanta willakuyta atisun. Madrugawmantaraq lluqsiqkunataqa manañam Diosmanta hinalla willakunankuta harkanqachu.
3. ¿Ima ruwaykunataq iñiqmasinchikkunata yanapanman?
3 Diosmanta willakunapaq huñunakuyqa iñiqmasinchikkunata yanapananpaq hinam kanan. Wakin iñiqmasinchikkunam ninku iskay-kimsa qawaqpi huñunakuyqa yanapasqanmanta wasinkumanta karupi mana kasqanrayku. Chaynapim Diosmanta willakuypi kamachiq iñiqmasinchikkunapas allinta iñiqmasinkuta yanapanqaku. Ancianokunam tanteanqaku kasqanku lawpi imakunatawanraq ruwanankumanta. Manaraq Diosta mañakuchkaspam yachanankuña mayman hinaspa piwan lluqsinankuta.
4. ¿Imanasqataq wasin-wasin lluqsinapaq huñunakuypas ancha chaninniyuq?
4 Wakin huñunakuyninchik hinam ancha chaninniyuq. Diosmanta wasin-wasin willakunapaq huñunakuypi mana achka iñiqmasinchikkuna kaptinpas, manam chayraykuchu nichwan mana chaninniyuq kasqantaqa. Aswanqa wakin huñunakuykuna hinam ancha chaninniyuq kuyanakuspa kallpanchanakunapaq kasqanrayku (Heb. 10:24, 25). Chaymi chay huñunakuypi kamachiq iñiqmasinchikqa imam rimananta allinta yachanan, chaynapi iñiqmasinchikkunata yanapananpaq hinaspa Jehova Diostapas hatunchananpaq. Diosmanta willakuq lluqsiqkunapas kallpanchakunankum chaypi kanankupaq.
Wasin-wasin Diosmanta willakunapaq huñunakuyqa wakin huñunakuyninchik hinam ancha chaninniyuq
5. (1) ¿Ima ruwayniyuqtaq Diosmanta willakuypi punta apaq anciano? (2) ¿Imaynatam bautizasqa warmikuna Diosmanta willakuypi kamachinmanku?
5 Kamachiqqa allintam yachanan imam rimananta. Pipas chay huñunakuypi allinta yachachinanpaqqa ñawpaqmantaraqmi payman tupasqanta yachanan. Diosmanta willakunapaq huñunakuy iskay-kimsa qawaqpi kaptinqa, chaypi kamachiq iñiqmasinchikmi utaq yanapaqninmi chay huñunakuyta ruwanan. Ichaqa llapan grupo huñunakuptinqa Diosmanta willakuypi punta apaq ancianoñam kamachinman imayna ruwakunanpaq. Diosmanta willakuypi punta apaq wakin ancianokunam, chay huñunakuypi kamachiq iñiqkunaman maykunapi willakunapaq kasqanta papelchapi qillqaspa qunku utaq Diosta yupaychana wasipipas lliwpa qawasqanpi churanku. Diosmanta willakuypi punta apaq ancianom allinta tanteanan chay huñunakuypi pikuna kamachinankupaq, chaynapi allin apakunanpaq. Sichum wakin punchawpi mana pipas kamachiq kaptinqa, chay ancianom tanteanan allin yuyayniyuq bautizasqa warmiña Diosmanta willakuypi kamachinanpaq (qaway “Bautizasqa warmikuna kamachiptin” niqta).
6. ¿Imatam puntamantaraq ruwanan chay huñunakuypi kamachiqqa?
6 Diosmanta yachachinapaq escuelapi utaq Diosmanta yachachinapaq huñunakuypi ima ruwaypas tupawaptinchikqa ñawpaqmantaraqmi allinta estudianchik. Chaynam wasin-wasin Diosmanta willakunapaq huñunakuypi kamachiqpas imam ninanta allinta yachanan pisi minutollaña rimananpaq kasqanrayku. Chaymantapas manaraq huñunakuy qallarichkaptinmi yachananña maykunapi Diosmanta willakuy tupawasqanchikta.
7. ¿Imakunamantam chay huñunakuypi kamachiqqa rimanman?
7 ¿Imamantam rimanman? Sapa llaqta mana chaynalla kasqanraykum mana kanchu chay huñunakuyta imayna ruwanapaq kamachikuyqa. Ichaqa “Imakunamantam rimawaq” niq yachachikuypim achka yanapakuykuna kachkan. Yaqa llapanpim chay huñunakuypi kaqkunapas rimarinmanku, chaynataq ñawpaqman lluqsispapas imayna ruwanapaq kasqanta utaq jw.org nisqanmanta huk kaqnin videotapas qawachinmanku. Huñunakuyta kamachiqqa tanteananmi imakuna iñiqmasinkunata yanapasqanta.
Wasin-wasin Diosmanta willakunapaq huñunakuypi kamachiqqa, yachachinanmi hinaspa kallpanchananmi iñiqmasinkunata
8. ¿Imamantam sabado hinaspa domingo punchawpi wasin-wasin Diosmanta willakunapaq huñunakuypi rimakunman?
8 Yaqa lliwmi sabado punchawpi Diosmanta willakunapaq Willakuq hinaspa ¡Rikchariy! qillqakunata servichikunchik. Chay punchawpi achka lluqsiqkunam wakin punchawqa mana lluqsinkuchu, chaymi Diospaq Llamkayninchik qillqapi lluqsimuq yanapakuykunata qunqanmanku. Chayraykum yuyarichiyqa ancha allin kanman. Chaymantapas qillqanchikkunamanta rimaruspaqa imapas pasakusqanmanta, costumbrekunamanta utaq qillqanchikkuna chaskiqman kutinamantapas rimakunmanmi. Ichapas ña huk iñiqmasinchik chay killapi qillqanchikkunataqa quchkarqaña, hinaptinqa nichwanmi imayna qusqanmanta willakunanpaq. Domingo punchawpas hina chaynallatam ruwakunman chay killapi llamkanapaq qillqakunawan. Sapa semana huñunakuyninchikpipas rimakunmanmi Allin noticiakuna, Diosta uyariy utaq Yachachiq qillqakunata imayna qunamanta.
9. Invitacionta utaq huk qillqatapas aypusqanchik killakunapiqa, ¿imamantam rimakunman sabado hinaspa domingo punchawkunapi?
9 Wakin killakunapim invitacionta utaq huk qillqatapas aypunchik. Chayna kaptinqa sabado hinaspa domingo punchawpim Willakuq utaq ¡Rikchariy! qillqawan kuskata imayna qunamanta rimakunman. Rimakunmantaqmi yachay munaqman yapapi kutinamanta ima ruwanamantapas. Ichapas huk iñiqmasinchik willakunman imaynata invitacionta aypusqanmanta.
10, 11. ¿Imanasqataq wasin-wasin Diosmanta willakunapaq huñunakuypi kananchikpaq kallpanchakunanchik?
10 ¿Imaynatam wakin iñiqkuna yanapakunmanku? Chay huñunakuy allin kananpaqqa chaypi kaqkunapas rimarinankum. Wasin-wasin Diosmanta willakunankupaq lluqsispankuqa yachanankuñam ima nispa runakunawan rimanankumanta, chayqa yanapanqam chay huñunakuypi rimarinankupaqpas. Chaypaqqa manaraq chay huñunakuyman richkaspam qillqanchikkunata hurqunanchikña, chaynapi mana tiempota usuchinapaq.
11 Kallpanchakunataqmi wakin huñunakuyman hina tiempollanpi wasin-wasin Diosmanta willakunapaq huñunakuymanpas chayanapaq. Punchawña chayaspaqa kamachiqtapas sasachachwanmi. ¿Imaynanpi? Huñunakuyta kamachiqmi tantearunña aslla kaptinkuqa mana tukusqanku lawman rinankupaq chaynataq rinanku karu kaptinqa atiqkunalla rinankupaqpas. Ichapas mana allin runakunapa kasqan lawman rinanku kaptinqa iskay-kimsa rinankupaq utaq kuskalla kanankupaqpas tantearunña. Wakinpiqa unquq iñiqmasinchiktam pampaniqllapiña Diosmanta willakunanpaq kamachinman, utaq chayllaraq lluqsiqkunawan achka wataña lluqsiqkuna kuska rinankupaqpas. Chaymi punchawña chayaptinchikqa tukuy chaykunata kaqmanta tanteanan kanqa. Arí, wakinpiqa imapas sasachakuywanmi punchawyachwan. Ichaqa, sapa kuti punchawyaspaqa Diosmanta willakunapaq huñunakuyta mana chaninchasqanchiktam hinaspa ima ruwayninchikpipas mana allin tanteakuq kasqanchiktam qawachichwan.
12. Sapa kuti hina kaq iñiqmasillanchikwan Diosmanta willakuspaqa, ¿imatam ruwachwan?
12 Diosmanta willakunankupaq lluqsiqkunaqa ichapas tantearqakuña piwanpas lluqsinankupaq utaq suyanqaku kamachiq iñiqmasinchik piwan rinanpaq ninantapas. Ichapas sapa kuti hina kaq iñiqmasillanchikwan Diosmanta willakunchik, chayna kaptinqa, ¿kallpanchakuchwanchu wakin iñiqmasinchikkunawanpas lluqsinapaq? (2 Cor. 6:11-13). ¿Atichwanchu chayllaraq Diosmanta willakuq iñiqmasinchikkunata allin yachachiq kanankupaq yanapayta? (1 Cor. 10:24; 1 Tim. 4:13, 15). Chay huñunakuypiqa allintayá uyarisun imakuna niwasqanchikta, chaynapi mayman rinanchiktapas yachanapaq. Huñunakuy tukuruptinqa chayllayá maymi tupawasqanchikman risun.
13. Kallpanchakuptinchikqa, ¿imaynatam wasin-wasin Diosmanta willakunapaq huñunakuyqa yanapawasun?
13 Jesuspa 70 qatiqninkunaqa ‘kusisqallañam kutimurqaku’ (Luc. 10:17). Manaraq Diosmanta willakunankupaq lluqsichkaspa huñunakusqankum ancha allin karqa. Chaynam Diosmanta willakunapaq huñunakuyninchikpas ancha allin. Sichu kaypi yachamusqanchikman hina kallpanchakuspaqa kusisqa hinaspa “llapallan nacionpi runakuna yachananpaq” allin yachachisqam kasunchik (Mat. 24:14).