¿Listochu kachkanki Diospa yachachikuyninkunata chaskinaykipaq?

1. ¿Imakunatam rurana achka mikuyta ruranapaq?

¹ Achka runapaq mikuyta rurayqa sasam: tukuytam rantina, sumaqtam aderezana, tiempowanmi yanuna, localta allichana, mesakunata churana, hinaspa mikuy haywakuqkunatapas maskana. Mikuyman invitasqa kaqkunapas tiempochakunankum, aswanraqmi karupi kaspankuqa. Chayna sasa kaptinpas, ¡ancha kusikuymi amistadninchikwan hinaspa lliw ayllunchikwan huñuykanakuspa miskillataña mikuyqa! Arí, hamuq killakunapim Jehová Diospa testigonkunapas enteron pachapi huñunakusunchik kimsa punchaw asambleapi miski mikuyta mikuchkaq hina yachachikuykunata uyarinanchikpaq. Sutinmi ‘Listollayá kaychik’ nisqa. Chay asambleapaqqa achkatañam rurakurun yachachikuykuna sumaq kananpaq. Llapallanchik chay asambleapi kananchikpaqqa, kunanmantapacham sapakama tiempochakunanchik (Pro. 21:5).

2. ¿Imakunatam rurananchik miski mikuyta hina asambleapi yachachikuykunata chaskinaykipaq?

² Ama faltakuychu: ¿Ñachu tiempochakurunkiña miski mikuyta hina chay asambleapi yachachikuykunata chaskinaykipaq? Kallpanchakuyá patronnikiwan rimanaykipaq hinaspa permisakuy mayqan punchawmanpas mana faltakunaykipaq. ¿Ima niwaqtaq maypi samapakunaykimanta hinaspa rinaykimantapas? Ancianokunapas manam qonqanankuchu yuyaqkunata, llumpay onqoqkunata hinaspa yanapana kaq iñiqmasinchikkunatapas asambleaman rinankupaq yanapaytaqa (Jer. 23:4; Gal. 6:10).

3. Huklaw nacionmanta iñiqmasinchikkunawan asambleamanqa, ¿imanasqataq mana invistasqa kaspaqa mana rinanchikchu?

³ Yachasqanchikman hinam wakin llaqtakunapiqa huklaw nacionmanta iñiqmasinchikkunapiwan asamblea apakunqa. Chaypaqqa sucursalmi tantearunña chay asamblea apakunan localman hayka yaykunankuta hinaspa maypi samapakunapaqpas, chaymi ruegakuykiku chay asambleaman rinankupaq invitasqa congregacionkunalla hinaspa huklaw nacionmanta invitasqa kaqkunalla rinankupaq. Mana invitasqa kaqkuna riptinkuqa sasachakuymi kanman.

4. ¿Ima yuyarichiykunataq yanapawasun sapa punchaw asambleapaq listo kananchikpaq?

⁴ Tiempochakuy asambleaman sapa punchaw temprano chayanaykipaq, chaynapi manaraq qallaykuchkaptin tiyanaykita tarinaykipaq. Chaymantapas manaraq asamblea qallarichkaptin programa nisqata qawariy chaynapi yachachikuykunata sumaqta uyarinaykipaq (Esd. 7:10). Asamblea qallarinanpaq takita uyarispaykiqa tiyanaykipiña atencionwan uyariy hinaspa takinapaqwan oracionpaq listoña kay.

5. ¿Imaynatam asambleata allintapuni familiayki uyarinman?

⁵ Asambleapi familiakuna huñulla tiyaptinkuqa, tayta-mamakunam yanapayta atinqaku wawa-churinkuna atencionwan asambleata uyarinankupaq (Deu. 31:12). Kallpanchaykikum Bibliapa textonkunata llapallanta maskanaykichikpaq. Papelpi pisillapi qellqaypas yanapakunmi atencionwan uyarinapaq, chaymantapas serviwachwanmi qepa punchawkunapi chay yachachikuykunata yuyarinapaq. Kallpanchakuy yanqapas-yanqa mana rimanaykipaq chaynataq mana yanqapuni purinaykipaqpas. Celularniki kaptinqa kallpanchakuyá uyariqkunata nama sasachananpaq. Sapa punchaw asamblea tukuytaqa, ¿imanasqataq uyarisqaykichikkunamanta mana rimankichikchu?

6. ¿Imatataq asambleapi rurayta atichwan, hinaspa imaynatam astawan kallpanchanakuchwan?

⁶ Kay asambleapiqa sumaq amistadtam iñiqmasinchikkunawan rurayta atichwan, chayna amistadqa manam rikukunchu Diosta mana serviqkunapiqa (Sal. 133:1-3; Mar. 10:29, 30). Kallpanchakuy iñiqmasinchikkunawan reqsinakunaykipaq hinaspa parlariy samarina chawpi punchawpi. Chaymi allin kanman qoqawninchikta asambleaman apakuyqa, mikuy rantiq lloqsinamantaqa. Allintayá tiemponchikta servichikusun kallpanchanakunanchikpaq (Rom. 1:11, 12).

7. ¿Imaynam asambleapaq pachakuyninchikqa kanan?

⁷ Pachakuymanta: Ñawpaq tiempopim Jehová Diosqa israelitakunata kamachirqa pachankupa patanpi kipuyoq qaytukunata siranankupaq hinaspa sapa kipupa hawanpi morado watuta churanankupaq (Num. 15:37-41). Kayna pachakusqankuwanmi paykunaqa reqsichikurqaku chuya Diosta yupaychaq kasqankuta. Chaynallataqmi kunan tiempopipas asambleapaq sumaq pachakuyninchikqa, reqsichiwanchikmi kay pachapi runakuna hina mana kasqanchikta, asamblea tukuyta mikuq lloqsiptinchikpas. Chayraykum allinta akllaspa pachakunanchik.

8. ¿Imaynatam asamblea apakusqan llaqtapi predicachwan?

⁸ Predicaymanta: Allinta tiempochakuspanchikqa atichwanmi asambleapa apakusqan llaqtapi predicaytaqa. Huk iñiqmasinchikmi señoranpiwan asamblea tukuyta restauranteman rirqa. Chaymi predicayta qallarinanpaq qasqonpi tarjetata qawachispan mikuy serviqta kaynata tapurqa: “¿Rikurqankichu kayna tarjetayoq runakunata?”, nispa. Chay runañataqmi rikusqanta nirqa, ichaqa manamá yacharqachu imarayku chayna tarjetayoq kasqankuta. Asllapi rimapayaykuspanmi asambleaman rinanpaq invitarqa.

9. ¿Imaynatam Jehová Dios agradecekusqanchikta qawachichwan?

⁹ Yachachikuykunata, demostracionkunata hinaspa tapuykunata asambleapi iñiqmasinchikkuna ruraptinkupas Jehová Diosmi yachachiwaqninchikqa (Isa. 65:13, 14). Jehová Diosta agradecekuyta munaspanchikqa, chay asambleapa mayqen punchawmanpas manachá faltakusunchu, chaynapim miski mikuyta hina Bibliapa sumaq yachachikuykunata chaskisunchik. Hinaptinqa, ¿listochu kachkanki chay sumaq mikuypaq?

[6 kaq paginapi recuadro]

Kimsa punchaw asambleapaq yuyarichiykuna

◼ Imay hora kananmanta: Kay watapi runa simipi asambleaqa iskay punchawmi kanqa, hinaspam 9.20 madrugawta qallarinqa. Punkukunañataqmi kichakunqa 8.00 madrugawta. Uyarinallapaq taki qallaykuptinqa llapallanchikmi tiyananchikña respetowan asamblea qallaykunanpaq. Sabado punchawmi 4.55 tardeta tukunqa, domingo punchawtañataqmi 4.00 tardeta. Huklaw nacionmanta iñiqmasinchikkunapiwan asambleañataqmi jueves 1.00 tardenmanta qallarinqa.

◼ Carrokuna sayananmanta: Carrokunapa sayanan sitiokuna mana hatun kasqanraykum, kallpanchakusun asambleaman huk carrollapi achka rinanchikpaq.

◼ Tiyananchikkunamanta: Maypi tiyananchiktaqa rakichwanmi carropi riqmasillanchikkunapaq, otaq wasipi yachaqmasillanchikkunapaq. Chayta ruraspaqa piensachkanchikmi yuyaqkunapi, onqoqkunapi hinaspa chayllaraq asambleaman hamuqkunapipas.

◼ Qoqawninchikmanta: Allinmi kanman qoqawninchikta apakuyninchikqa, chaynapi chawpi punchawta mikuy rantiq mana lloqsinanchikpaq. Tiyana asientopa ukunpi kamaqllatam qoqawnikitaqa apawaq. Manam apanachu hatun qepikunataqa nitaq pakina kaqkunatapas.

◼ Qollqewan yanapakuymanta: Asambleamanta agradecekuyninchiktam qawachichwan Salonpi otaq hina asambleapi cajakunaman sonqomanta qollqenchikta churaspa, chaynapi enteron pachapi predicacionta yanapananchikpaq.

◼ Imapas kaptin: Asambleapi qonqayllamanta imapas pasakuptin otaq pipas onqoruptinqa acomodador kaqmanmi willakuna, payñataq Primeros Auxilios nisqaman willanqa paykunaña atiendenankupaq.

◼ Zapatomanta: Sapa watam asambleapi urmanku zapatonku mana allin kasqanrayku. Chaymi zapatonchiktaqa allinta akllananchik gradasnintakama purispapas mana urmananchikpaq.

◼ Mana allin uyariqkunapaq: Wakin asambleakunapiqa discursokunam uyarikunqa radiopi localpa muyuriqninpi (FM). Chayna kaptinqa asamblea qallariytam willakamunqa radiopi imayna tarinamanta. Kayta allinta servichikunapaqqa audifonoyoq taksa radiotam apamuna rinrillanchikpi uyarinapaq.

◼ Discurso grabanamanta: Grabadorata apaspaqa manam asamblea localpi corrientemanqa hapichinachu. Manataqmi hukkunapa uyarisqankutapas pantachinachu.

◼ Wawakunata tanqanapaq kaqkunamanta: Wawakunata tanqanapaq kaqkunataqa manam asambleamanqa apanachu. Wawakunapa tiyanan sillachata apana kaptinqa, apanmankum tayta-mamankupa chawpinpi otaq waqtanpi kamaq kaqllata.

◼ Sírvase visitar nisqa papelmanta: Asambleapi predicaptinchik Bibliamanta yachay munaqkunapa sutintawan maypi yachasqanta qellqananchikpaqmi apachwan hukta otaq iskayta Sírvase visitar (S-43) nisqa papelta. Kay papeltam congregacionpi secretarioman qochwan (qawariy febrero 2005 Diospaq Llamkayninchik qellqapa 6 paginanta).

◼ Samapakuymanta: Wasinchikpi samachiyta munaspaqa congregacionpi secretario iñiqmasinchikwanmi rimachwan hinaspam samapakuymanta papelta qellqananchik. Sichum huk llaqtapi asambleaman rinayki kaptinqa hinaspa samapakuyta necesitaspaykiqa congregacionpi secretario iñiqmasinchikwanmi rimanayki hinaspam samapakuymanta papelta huntaspa qonayki, payñataqmi asamblea apakusqan llaqtapi encargakuqkunaman apachinqa. Manam asamblea chayamunantaraqchu suyanayki samapakuyta mañakunaykipaqqa, samapakuymanta encargakuq iñiqmasinchiktam sasachawaq (1 Cor. 14:40). Churi-wawankunawan samapakuspankuqa samachiqpa wasintam respetananku hinaspam mana imantapas hapipunankuchu nitaq mana yaykuna kaqmanpas yaykunankuchu. Ama qonqasunchu, samapakuna wasiqa asamblea punchawkunallapaqmi. Manachá allinchu kanman riy munasqanchik sitiokunaman rinapaq nitaq ima asuntonchik ruranapaqpas hinalla samapakuyqa.